【澳門美食】雙皮奶PK賽！只識義順澳門雙皮奶／薑汁撞奶？福隆新街隱藏老店保健牛奶公司

情侶拍拖兩個人去澳門快閃遊食乜好？澳門除咗葡國菜、豬扒包，雙皮奶必然係澳門美食缺一不可嘅選擇！講到雙皮奶或薑汁撞奶，你又諗起邊間呢？好多人第一時間都會諗到最出名而分店眾多嘅「義順牛奶公司」，但E.A.Two今次就為大家實試另一間隱藏老店，同樣係售賣雙皮奶、薑汁撞奶等甜品，但遊客較少，而且只此一間！即睇兩間「牛奶公司」PK戰！

澳門雙皮奶（1）﹕義順牛奶公司

其中分店位於新馬路上嘅「義順牛奶公司」，基本上間間分店皆交通便利，而遊客一講雙皮奶都係大多第一時間就會諗到呢間，「義順」自設牧場飼養乳牛，由養牛到擠奶一條龍，招牌更有奶牛標誌。該店歷史悠久，澳門店已屹立超過160年，唔單止澳門有多間分店，甚至插旗香港，連香港店都有逾30年歷史，只係目前由4間分店縮減至1間。所以，論認知度絕對係澳門Number 1！

「義順」曾於2017年至2010年獲得《澳門米芝蓮指南》街頭小食推介，主打有雙皮燉奶、冰花燉蛋、薑汁撞奶，另有少量鹹點，但就有最低消費。總店位於議事亭前地，每間分店室內皆狀似舊式冰室風格，貫徹其老字號店舖形象。

店內冰花燉雞蛋MOP27，巧手薑汁撞奶MOP35只有熱食，雙皮奶則冷熱皆有，當日於夏天食用，故挑選凍馳名雙皮燉奶MOP32、凍雙皮紅豆燉奶MOP35。雙皮奶表面有一層好厚嘅奶皮，來自於加熱牛奶結成嘅薄膜。呢層奶皮係偏硬身，反而奶皮以下就比較嫩滑，有濃濃奶味，不過甜度就極高。如果唔使排隊嘅話，不妨去食。

澳門雙皮奶（2）﹕保健牛奶公司

至於「保健牛奶公司」，就係比較鮮為人知嘅一間雙皮奶、薑汁撞奶專門店。該店其實於1999年已經創立，座落毗連福隆新街嘅福隆新巷處，當地人比較多，遊客就較少，並無最低消費，至今依然維持「只此一間」！

「保健」同樣唔單止有甜品，亦有鹹點可擇，例如係葡式豬仔包、豬扒包。該店同樣係以舊式冰室設計，地方不大，只有幾張檯，相對「義順」係座位唔多，室內亦有「保健牛奶公司」招牌，亦有牛牛掛畫等裝飾，甚至有提及自家農場新鮮牛奶。

店內薑汁撞奶MOP38、冰花燉雞蛋MOP25，而E.A.Two挑選咗鳳城雙皮燉奶MOP36、芒果雙皮奶MOP38。以價錢計，其實「保健」嘅雙皮奶、薑汁撞奶都係比「義順」貴少少，但燉蛋就「保健」較「義順」平。呢間嘅雙皮奶有少少唔一樣，雙皮奶表面只有一層薄薄奶皮，偏軟身，奶皮下都係嫩滑燉奶，呢間燉奶比較香濃幼滑，滑順得似台式豆花。而「保健」嘅雙皮奶比「義順」雙皮奶甜度較輕，無咁甜膩，反而真係做到甜而不膩。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 義順牛奶公司分店眾多，地址包括新馬路381號、蓮花海濱大馬路澳門百老匯百老匯大街地下E-G022號舖、金光大道望德聖母灣大馬路澳門威尼斯人度假村酒店琳琅美食廣場2樓、羅結地巷5A號地舖、草堆街93A號地舖、亞美打利庇盧大馬路381號地舖。義順雙皮燉奶總店位於澳門羅結地巷1-19號。香港就只有1間海外分店。

❷ 付款方式只限現金。

❸ 保健牛奶公司只此一間，別無分店。

❹ 乘搭巴士路線2、3、3A、3X、5、6A、10、18、101X、N1B、N3至「新馬路/大豐站」，落車後即達「義順牛奶公司」分店，而徒步約2分鐘亦可到達福隆新巷「保健牛奶公司」。