【澳門景點】塔石隱藏葡式建築「澳門八間屋」！官方藝墟、最大圖書館、藝文館

多數人去澳門半島遊覽，都會集中逛大三巴一帶市中心區域，而「大三巴牌坊」以東就有一個隱藏文藝通道，位置亦算靠近「瘋堂斜巷」，既有藝文館，亦有藝墟，連澳門最大嘅圖書館都座落呢一帶，想拍拖兩個人逛逛即睇詳情！

整個範圍基本上都係集中於「塔石廣場」週邊，而廣場內不時會舉行官方「塔石藝墟」，係當地每年舉辦嘅活動，來自旁邊澳門文化局嘅活動，用作推廣民間創作同促進藝術交流。不過，呢個藝墟有一年就曾經因為部份攤位被指售賣淘寶貨，引起熱議。

「塔石廣場」地方偌大，有超過1萬平方米，係澳門當地四大廣場之一，附近重有一個盧廉若公園，乘搭巴士路線可以於呢度落車，呢個站會較多路線可以選擇。而「塔石廣場」地面亦同「議事亭廣場」一樣，鋪滿葡式碎石，另一端有條地底行車隧道，搭巴士時通常都會經過，隧道僅有200米長，呈U形設計，重有雙線行車，搭巴士時不妨留意一下！

香港赤柱有著名嘅「八間屋」，澳門都一樣有「八間屋」，「塔石廣場」週邊有被稱為「八間屋」嘅土黃、酒紅色建築物。呢八幢建築物同赤柱唔一樣，19世紀末至20世紀初時，其實係貴族式住宅、學校﹐樓高2層，只係現時並非住宅，反而係用作各行政、商業中心，甚至係文化藝術館。

改建之後，「八間屋」分別成為「文化局」大樓、「塔石衛生中心」、「澳門中央圖書館」、「塔石藝文館」、「澳門檔案館」、「饒宗頤學藝館」、「澳門茶文化館」、「澳門樂團總部」嘅集中地，對面重有一座「玻璃屋」，下一篇E.A.Two再為大家詳談。

「塔石藝文館」係一個藝文空間，外觀以搶眼土黃色、酒紅色為主調，以為葡式典型住宅建築設計，「八間屋」都係幾乎一式一樣，樓高兩層，上層有陽台，木製百葉窗，前面有花園、拱廊，石柱為塔司干、科林斯柱，週邊紋飾亦獨特細膩，似歐洲新古典主義風格。據悉，內裏重有兩座古井，不過當日就未能進入館內，「八間屋」有好多間都係唔俾公眾進入。

其中，「澳門公共圖書館」係「八間屋」中最肯定能夠每日進入嘅一間屋。當地雖然有15間圖書館，但呢座圖書館就係澳門嘅中央圖書館，係當地最大嘅一間圖書館，進入人次同藏書量亦係最多，上層重有個藏書樓。走入澳門嘅圖書館，既有台灣書籍，亦有香港書籍可以閱讀，連英式殖民歷史嘅書籍亦能閱讀。呢個圖書館甚至當日較新嘅台灣電影小說《誰是被害者》都能閱讀，而香港圖書館只能聽到台灣19年前嘅電視劇《惡作劇之吻》CD。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 「塔石藝墟」開放時間為星期四、五17:00-22:00；星期六、日：15:00-22:00。

❷ 澳門圖書館需要有身份證先可以借書，否則就要有當地有身份證嘅人擔保。

❸ 乘搭澳門巴士2、2A、5、9、9A、12、16、16S、22、25、25B、28C、N2都可以抵達「盧廉若公園站」，往後走徒步約2分鐘即達。如果乘搭巴士路線7、8，於「高美士中葡中學站」落車，就會較近，但就只有呢兩條線。

❹