慈雲山兩三碗車仔麵／米線／餃子兩店距離僅1分鐘！招牌豬頸肉、胡椒豬扒、柱侯牛腩可配銀針粉！

車仔麵、米線、餃子都係香港人鍾意食嘅菜式，多數都係貪佢價錢平，而且快靚正，配合香港人步伐急促嘅節奏。身處香港，於呢個選項之內，情侶拍拖兩個人可以有唔少選擇，其中有一間小店同一區1分鐘步程之內，就可以去到另一間地舖，車仔麵、米線同餃子都係任君選擇！

以「兩三碗」命名嘅小店，一間叫「兩三碗餃子」，另一間則叫「兩三碗車仔麵」；餃子店主要賣餃子，而車仔麵店就主要賣米線同車仔麵。一間位於毓華街﹐另一間就位於毓華里，但徒步只需1分鐘即達另一間舖頭！

「兩三碗餃子」位於毓華里內，以自家製餃子為主，包括鮮雞湯餃、蕃茄薯仔湯、麻酸辣湯餃、生煎餃、口水汁撈餃，$44/8隻起，連粉麵同價有5隻餃。餃子餡料款式唔少，有皇帝菜鮮豬肉、斥菇雲耳椰菜鮮豬肉、香芹芫荽鮮豬肉、大白菜鮮豬肉、韭菜鮮豬肉西洋菜鮮豬肉、紫菜蔥花鮮豬肉、泡菜芝士鮮豬肉、洋蔥牛肉、芝士粟米雞肉、菠菜南瓜芝士、京蔥羊肉等。店內另生滾飯、湯飯、石鍋飯、酸菜魚飯等，亦有醉雞、口水雞等可以選擇。

至於「兩三碗車仔麵」，就位於毓華街大街之上，更接近舊慈雲山南巴士總站。店內可以揀米線或車仔麵，米線兩餸$36，三餸$44，有麻辣湯、酸辣湯、麻酸辣湯、金湯酸菜湯、沙嗲湯，餸菜同一般自選米線差唔多。而車仔麵與米線同價，兩餸$36，三餸$44，可揀麻辣湯、香辣沙嗲，或者加辣汁、腩汁，唔加辣汁嘅車仔麵，湯底好似有種微微鮮甜味。麵條就同一般車仔麵差唔多，係多咗銀針粉、臺灣麵、營多撈麵。呢個價錢，的確依然係街坊價。

最意外係呢間舊區街坊車仔麵店，近年竟然成為人氣車仔麵，更於深水埗開設分店，據悉每日賣幾百碗車仔麵。如果香港人日日都咁支持香港小店，就唔會咁多小店忍唔住結業啦！

店內嘅車仔餸中，比較特別嘅係招牌豬頸肉、柱侯牛腩、五香牛筋、胡椒豬扒、南乳豬手、鮮甜蜆，而其他同一般車仔麵差唔多，蘿蔔、甜酸齋、豬大腸、瑞士雞中翼。招牌豬頸肉果然係別樹一格，肉質唔只軟腍，而且入口有香茅香味，但表面又唔似有咁多香料，似乎係將香茅切碎再醃，豬頸肉入口亦有少量魚露、檸檬香殘留，煎得甚香口。