【澳門景點】座落瘋堂斜巷！痳瘋病院變藝術地帶瘋堂十號創意園藏小型電影院！

以往澳門瘋堂區曾為唔少情侶拍拖兩個人嘅打卡景點，近年該區有個新文創熱點，唔單止有藝術展覽、小型電影院，亦有旋轉階梯可以打卡，創意園就似文創區，一改以前週邊痲瘋病院嘅形象，有時間不妨去逛一逛！

「瘋堂斜巷」其實只係一道長約220米、闊約10米嘅小巷弄，源自於16世紀，以七彩斜坡聞名。斜巷距離「澳門大三巴」僅有約5分鐘步程，交通便捷。「瘋堂斜巷」位處瘋堂區內，座落澳門市中心，又叫「望德堂坊」，附近更有為「望德聖母堂」，本身整個區就係聚集天主教徒嘅地方。

由於瘋堂區一帶曾經係聚集痲瘋病院，所以呢一區先會叫瘋堂區，而後來有大量華人天主教徒聚居，令該地區宗教色彩濃烈，該教堂就係為痲瘋病人而設嘅地方，所以曾經被人叫「發瘋寺」。

整條斜巷內皆為文創地帶，充滿葡萄牙風格，地面鋪滿葡萄形碎石，兩側亦座落色彩斑爛嘅葡式建築物，南歐風盡現，本來就已經係打卡必到！現時，整道巷弄間有唔少知名建築物，藝術建築愈來愈多，例如文創店、畫廊，有時亦有期間限定文創市集。

其中，「仁慈堂婆仔屋」就係其中一座藝術建築物，亦有百年歷史，本來都係一座收容窮人同難民嘅地方，後來更變成女性老人院，所以被稱為「婆仔屋」；至於另一幢就係「瘋堂十號創意園」，同樣係黃色建築物，鮮艷奪目。

事實上，「瘋堂十號創意園」於2008年已經開幕，毗連「婆仔屋」，同樣座落「瘋堂斜巷」內，可以從斜巷或上面嘅「美珊枝街」進入。本身創意園係當地廉政公署、環境委員會辦事處，只係後來先改建成藝術勝地，用作推廣藝術文化，成為文創基地之一。

地下花園有182平方米，不時會舉行講座、工作坊、座談會、展覽等活動，而室內則樓高三層，當中有兩個展覽廳、10個展示室，比起陽光猛烈時打卡，其實更適合落雨前往，真正屬雨天好去處！整幢葡式建築物呈淡黃色調，建於1919年，採新古典主義設計，充滿南歐風格。

「瘋堂十號創意園」有多間小房間，每一間都有唔同藝術展覽，樓層之間有一道旋轉樓梯貫穿，公眾可以於開放時間期間自由穿梭其中，樓梯亦可以打卡！

各房間展覽琳瑯滿目，當日有藝術街作品展、小童作品展、畫室、閱書室、澳門光景展覽，最特別之處係有一個「影藝館」，就好似澳門半島知名戀愛巷嘅「戀愛電影館」，可以隨便坐低睇返場戲呢！澳門對於電影、編劇、攝影、創作、繪畫、雕塑等都好重視，反觀香港就幾乎走到盡頭。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

❶ 「瘋堂十號創意園」位處「瘋堂斜巷」最頂端。

❷ 乘搭巴士路線7、8，於「社會工作局站」落車，徒步1分鐘即達。

❸ 留意創意園星期一係唔開放。

❹ 店內展覽不時轉換。

EATWO

Miss A