【澳門美食】近瘋堂斜巷！台中過江龍萌爆小熊造型台式豆花／粒粒黑糖珍珠餡微笑雞蛋仔Sweet Sweet｜打鐵豆花

澳門美食不少，今次E.A.Two前往藝術文化勝地「瘋堂斜巷」一帶，原來當中有一間係來自於甚受情侶拍拖兩個人歡迎嘅台中豆花店，以可愛棉花糖豆花及微笑雞蛋仔為主，造型萌爆，難怪成為網紅店，打卡必食！

來自台中嘅「打鐵豆花」，於當地早就有10間分店，而我哋於澳門亦先後見到兩間分店。「打鐵豆花」台灣原創人其實係來自「打鐵業」，然後將打鐵同傳統豆花合一，將手工製造嘅鐵碗盛載豆花。據悉，澳門店係源自於一位獲得藍帶嘅甜品師，為澳門提供一間台中過江龍嘅豆花店，唔需要搭飛機都食到。

一碗普通打鐵豆花MOP38，另外有多款可愛造型款式，其中一款係布丁熊套餐，將布丁熊同布丁豆花混合，另加一支布丁造型飲品；另一款係豬豬系列MOP58，包含草莓豆花豬豬、豬豬草莓飲品。而編輯所選嘅係熊熊豆花MOP58，就係將Coffee BonBon與打鐵豆花融合，上面為棉花糖。值得一提，澳門限定有得將整個不鏽鋼容器帶走，每個加MOP298，平定貴就有讀者自行判斷。

「打鐵豆花」上面有一團圓咕碌嘅棉花糖，上面放上朱古力片製作嘅「眼珠」同「嘴巴」，同平時香港蛋糕店嘅生日蛋糕牌所用嘅朱古力片無異。黏貼好後，就形成一個熊熊豆花，造型萌爆！食完頂端嘅棉花糖，就輪到主角豆花，店內嘅豆花果然同台式傳統豆花相似，豆花質感滑嫩，入口細膩，豆香同清甜味夾雜，味道天然。而平鋪豆花上嘅芋圓，則入口煙韌，略帶微甜。不過，豆花碎冰太多，入口太過冰凍，有敏感牙齒嘅朋友要小心，碎冰亦溝淡咗黑糖水嘅甜味。

而微笑雞蛋仔就係店內繼豆花之後，另一款人氣招牌小食，打鐵微笑雞蛋仔就係人氣之選，當中有4種口味餡料，包括黑糖珍珠雞蛋仔MOP36、芋圓雞蛋仔MOP36、布蕾雞蛋仔MOP39、朱古力雞蛋仔MOP39。另外，亦有魚蛋雞蛋仔，有Pudding、Oreo口味，一份MOP38至39。

「打鐵豆花」出品嘅雞蛋仔，大小恍如一隻真實雞蛋，所以每一隻都擺放於小型雞蛋紙皮盒內，果然同豆花一樣，睇得又食得！每一隻雞蛋仔，表皮都畫有笑臉表情圖案，相當可愛。將雞蛋仔咬開，會發現雞蛋仔表皮微脆，內裏鬆軟，而且新鮮熱焫焫，充滿蛋香味。雞蛋仔內餡依自己選擇，今次揀咗黑糖珍珠口味，感覺更有台灣風格，雞蛋仔內餡滿佈珍珠，最多一粒有6至8粒珍珠，多黏附一齊，不過最少一隻只係得3至4粒。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 「打鐵豆花」本身係位於台中區嘅甜品店，合共有10間分店。

❷ 本身雞蛋仔應該有5款口味，不過當日有一款係無得供應，所以未知另一款係咩口味，部份口味有機會無得食。

❸ 店內只接受現金付款。店內只有大概4至5組座位，每組可以坐2個人。豆花、雞蛋仔都係即叫即製，所以不妨坐低慢慢等，需時大概10至15分鐘。

❹ 該店距離「瘋堂斜巷」只有約1分鐘距離。