【澳門景點】闖入當舖博物館！德成押搖身變典當業展示館！3層高民初建築物獲完整保留

澳門值得情侶拍拖兩個人遊覽嘅其中一個原因，係因為澳門將好多歷史文化都完整保留，連小小痕跡及小物都完好保存。其中，距離「議事亭前地」及「大三巴牌坊」不遠嘅「典當業展示館」，就將舊有嘅當舖變成一個小型博物館，展示當樓、貨樓，而且容許遊人前往參觀，恍如時光倒流，穿梭至舊時代！

「典當業展示館」座落亞美打利庇盧大馬路轉角位，外牆古色古香，上層更有騎樓。小巷一邊寫有「德成按」三個字，亦有「壹年期滿」、「十足按物」，唔單止舊時窗框、大門，連舊時從右至左寫嘅「此處不得擺設檔口」小型標語提示都予保留。至於正門處，頂端則放有簇新嘅「典當業展原館」牌匾，係唯一同整個空間唔融合嘅地方。

原先只係一個當舖遺址，目前搖身變成博物館。踏入呢個當舖博物館，迎面而來就係同以往香港依然見到嘅舊式當舖相似嘅景象，即係一面木造屏風，用作遮蔽入面典當過程。木製屏風上由右至左、上至下寫有「德成按」三個字，「按」字係比「德成」二字大一倍。旁邊重有一個打直寫嘅「德成十足按」招牌，感覺歷史悠久。

既然係小型當舖博物館，店內將同當舖有關嘅物件都展示出嚟，走廊位寫有「六個月期滿」、「再展期一個月」，簡單展示品已為年輕人講述舊時典當過程。原來以往每次典當，需要付押金100元，每月利息3元。其實，舊式當舖咪即係現代嘅財務公司？館內有展示典當工具、票據及相關記錄，等年輕人都可以更深入了解昔日當舖格局同典當過程。原來客人典當位置同坐鎮櫃檯嘅當舖「二叔公」高度真係相差頗遠﹐鍾意打卡嘅朋友可以企喺度扮當嘢打卡呢！

博物館內保留舊式裝潢，大廳頂端掛有以前紅底金字嘅「德成按」牌匾，字體從右字左排列；另一邊廂，大廳同時亦掛有當舖「蝠鼠吊金錢」嘅特色招牌，成日覺得圖案有啲似葫蘆，亦係香港已經少之又少嘅圖案。事實上，澳門「德成按」本身係於1917年開始營業，直到2003年先改為「典當業展示館」，被澳門評為具建築藝術價值樓宇之一。據了解，「典當業展示館」更榮獲《2004聯合國教科文組織亞太文化遺產保護獎》嘉許獎。

而「典當業展示館」內下層會先見到當樓，而貨樓就位於後半部份。當舖本來就係古老行業，博物館整個空間保留咗原本民初時期「前當舖、後貨樓」嘅中式當舖設計格局，裝潢陳設不變，實在難得！據悉，建築物設計獨特，唔單止防火、防水，甚至可以防盜、防土匪呢！

大廳背後係帳房，參觀遊人係禁止進入，只可以喺門口窺視。入面係以往辦理驗貨、議價等手續，多個擺放重要物件嘅儲物櫃都係鎖上。縱然係「閒人免進」，但其實都有機會係接待貴客嘅地方。另外，當舖有獨有文字嚟記載月份同數目字，外面櫃檯都可以見到，由七數到一就係「天」、「地」、「玄」、「黃」、「宇」、「宙」、「洪」，同時係代表九月至三月。