【澳門景點】戀愛巷隱藏樓上電影館／圖書室／展覽！非主流文藝／劇情／動畫片首播、日台港經典電影重溫

「大三巴牌坊」樓下嘅「戀愛巷」係唔少情侶拍拖兩個人浪漫打卡嘅熱門勝地，巷弄其實唔單止可以側望大三巴，重有一個隱藏樓上電影館，館內係唯一播放非主流電影嘅小型戲院，而呢啲電影都係主流戲院好多時候都無得睇。館內遊人較少，想兩個人靜靜哋睇吓戲，不妨走入呢個迷你電影館！

「戀愛巷」座落澳門半島市中心地帶，既係「澳門大三巴」以下一道受情侶及網紅歡迎嘅巷弄，更加獲選為「澳門新八景」之一。小巷全長其實只係大概50米，葡文以「Travessa da Paixão」命名，雖然「Paixão」意指迷戀、激情，但全句其實有「耶穌受難之路」嘅意思，符合上面大三巴前身修道院嘅形象。整道小巷嘅樓房以粉紅色、淺黃色為主調，繽紛歐式建築物猶如髹上馬卡龍色，近年轉瞬成為IG網紅打卡位。而樓房建築風格上，其實設計係來自於新古典主藝同現代主義。

短短一道「戀愛巷」內，外面遊人不計其數，偏偏好少人會走入大樓內。除咗有「戀愛七號旅館」，當中重有一座「戀愛電影館」，樓高3層，結合展覽空間、電影院及圖書室，內有售票處、放映廳、控制室同電影資料室，甚至有唔同種類嘅電影專題作品展覽，更有兩至三部來自唔同國家嘅電影作首輪公映！

「戀愛電影館」內嘅戲院係全澳門唯一播放非主流電影，唔似其他戲院咁播放主流電影。簡單嚟講，館內播放嘅電影通常都係文藝電影、劇情電影、動畫電影，好多都係主流戲院無得睇嘅電影，亦係來自各地影展或得獎電影。

今次E.A.Two未有時間欣賞電影，只係前往佈滿電影資料嘅圖書室、包含香港電影嘅展覽廳。圖書室內有收藏好多電影資料、離誌、期刊等，於門口作簡單登記後，任何人都可以自由查閱，等大家可以更了解當地電影文化。而展覽廳就可以參觀電影器材等，一端更有電影介紹，當日見到有廖子妤、余香凝、梁詠琪主演嘅《骨妹》介紹，該電影係來自於2016年。

據悉，「戀愛電影館」不時會舉辦講座、工作坊，邀請電影工作者參與其中。而館內唔單止有新上映嘅非主流電影，不時更有舊電影經典重溫呢！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 戀愛電影館位於戀愛巷內，而電影資料室及展覽館則需要走向後方，上行樓梯就見到。

❷ 電影資料館位於樓梯右邊，進入需要簡單寫低名同電話。樓梯右邊就係展覽室，不時有唔同電影展覽，甚至有香港電影嘅介紹展覽。

❸ 電影院票價人均為MOP60。

❹ 戀愛．電影館開放時間為10:00-23:30，電影資料室開放時間為10:00-20:00，展覽空間開放時間為10:00-20:00，逢星期一休館，公眾假期照常開放。