【九澳美食】唯一咖啡店！戒毒康復人士主理H2H Cafe 芝士蛋糕／馬介休球／葡國臘腸

九澳聖母村係來自於痲瘋病院，現時修復後環境變得清幽雅緻，加上遊人極少，清靜舒適。E.A.Two今次前往九澳唯一食肆及咖啡店H2H Cafe，該店係由戒毒康復者主理，情侶拍拖兩個人去到九澳，不妨坐低飲返杯咖啡chill一chill，食個下午茶先走！

穿過九澳聖母村，唔單止可以見到一連五棟以黃、紅色為主調嘅葡式建築物，毗連九澳七苦聖母小堂，當中有多間藝廊，盡頭就係一間咖啡店。該店係九澳唯一一間食肆，為「Hold On To Hope Cafe (H2H Cafe)」，樓梯下就係通往「九澳康復醫院」。

「H2H Cafe」背景別具意義，由社會工作局、文化局及澳門戒毒康復協會合作，實行「握緊希望」職訓實習計劃，為戒毒康復人士融入社會，提供一個培訓基地，所以呢間咖啡店係由呢班康復者主理。

咖啡店點餐地方同用餐地方分開，點餐區有少量手信可以購買，而一端冷氣間有室內高檯櫈，外面亦有戶外木檯櫈嘅座位，正對聖母村風景，打卡必到！店內以咖啡、輕食為主打，例如多款口味嘅芝士蛋糕，其中比較有葡國特色嘅係九澳pizza MOP75、Vendas Novas豬扒包MOP35、燒葡國臘腸MOP55，而馬介休球MOP10、芝士馬介休球MOP20更加係CP值高嘅選擇！

一個馬介休球大小就似一顆雞蛋，雖然係預先整起，然後翻熱，但味道亦不俗。咬開馬介休球，可見薯蓉、馬介休魚肉碎。而芝士馬介休球則較香口，唔單止有馬介休魚同薯蓉，更有微溶芝士。另外，店內特別選用非塑膠製餐具，環保人士適宜。

今次選取兩款飲品，包括鮮奶咖啡MOP33至36、鮮榨橙汁MOP35，橙汁係被新鮮香橙榨汁而成，並非加入糖水。而凍咖啡就呈上啡下奶，有別於平時飲嘅鮮奶咖啡，鮮奶佔三份二，咖啡佔三份一，奶味份量充足，咖啡不過不失。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式只接受現金。

❷ 澳門前往九澳只有一條巴士路線，乘搭21A至總站「九澳油庫站」，回轉頭徒步約1分鐘上斜即達九澳聖母村範圍。由澳門半島出發，必須預留1.5小時車程，氹仔出發亦要預留1小時車程，路環出發則只需30分鐘車程。

❸ 由巴士落車嘅話，上斜後轉右，直行到底至最後一間黃、紅色小屋就係cafe位置。

❹ 下午茶套餐供應時間為14:00-18:00，可選擇芝士蛋糕、葡式豬扒包、熱狗，都可以配搭咖啡或奶茶，價錢由MOP40至63。