【澳門夜市】康公廟前地100米澳門人康公夜市！實試20蚊米芝蓮碗仔翅、重蒜波士頓龍蝦／手臂長泰國瀨尿蝦

夜市向來係香港人鍾意拍拖兩個人去掃街嘅地方，台灣有夜市，香港有夜市，原來地方細細嘅澳門都有夜市！澳門有一個夜市座落市中心內，但就係週末假期限定，到時到候先會開放，其餘時間只係一道普通澳門街。該夜市全長只有約100米，但就聚集澳門人，美食不少，價格亦算親民，E.A.Two亦為大家實試呢個澳門康公廟前嘅夜市，即睇夜市地址及開放時間！

據編輯同澳門人搭訕所知，澳門其實並非只有一個夜市，只不過座落「康公廟前地」旁邊嘅「康公夜市」，就係現時一個固定地址及開放時間嘅澳門夜市，其餘都唔係穩定開放。「康公夜市」位於「十月初五日街」內，「信發百發有限公司」下面就係「康公夜市辦事處」，而「康公廟前地」則近「老街牛雜」，基本上位置並唔難搵。

由於前臨「康公廟」，所以呢個夜市就叫做「康公夜市」。而實際上，「康公夜市」只有約100米長嘅空間，已經包含美食小攤及玩樂攤檔嘅地方，大概就係連接澳門亞美打利庇盧大馬路至康公廟一小段嘅「十月初五日街」。講到呢條街道，香港人可能只係諗到一套電視劇叫《十月初五的月光》，其實「十月初五日」係紀念葡萄牙於1910年10月5日革命成功，推翻帝制並建立共和國，由澳葡政府將原來嘅「泗𠵼街」易名為「十月初五日街」。

「康公廟」座落「十月初五日街」中段，如果夜市一端「澳門亞美打利庇盧大馬路」係街頭，咁「康公廟」前就係夜市街尾。該廟宇本身叫「康真君廟」，建於1860年，歷史悠久，可以追塑至咸豐十年，供奉住康公真君等神佛，廟前有空曠石階廣場。

「康公夜市」係近兩年先建成嘅澳門人知名夜市，由澳門中區南區工商聯會主辦，免費入場，內有唔同種類小攤販，文創產品零售店較少，而平常台灣夜市常見嘅老少咸宜玩樂攤檔亦只有廟前寥寥可數小攤，例如係撈金魚、射飛鏢、保齡球等，都係舊時60至70年代嘅小玩意。澳門「康公夜市」主要就係美食攤檔，而且係集中喺另一邊出入口。

夜市內有多個小攤檔售賣地道懷舊小食，但只有大概100米長嘅夜市其實唔算太多小攤檔，加上大多都係本來就位於「十月初五日街」嘅食肆，只不過將部份小食搬出嚟賣。當日所見十零廿間係有嘅，肯定無50至60間咁多，數量上唔單止少過台灣夜市，連香港「廟街夜市」都比唔上。只不過，澳門「康公夜市」嘅小食選擇，就比香港「廟街夜市」優勝。而編輯所見嘅「康公夜市」，無論數量定食物選擇上，都同其他媒體稍有分別，似乎該夜市不時會轉換攤檔同食物選擇。

「康公夜市」有唔少地道懷舊小食，單單澳門碗仔翅就有兩間，同樣係每碗MOP20，若「康公廟」係街尾，呢間《米芝蓮》碗仔翅就係街頭，寫明採用古法炮製。碗仔翅內有鴨絲、冬菇、木耳、粉絲等，同港式碗仔翅有相似地方，只係唔會需要加入胡椒粉、麻油、紅醋。另外，該店亦有地道牛雜MOP30至50、咖喱魚蛋、牛肉麵，今次只揀咗白蘿蔔，滷得入味，入口軟嫩無渣，比起車仔麵嘅白蘿蔔好。

整條夜市街道內，小食亦算多，包括有雙皮燉奶、水牛奶、滑雞粥、涼粉、芝麻糊、雞蛋仔、咖喱魚蛋、烤香腸，亦有鮮榨斑蘭蛋糕、泰式炒飯、龜岺膏、夾餅、漢堡包、咖喱魷魚、荷葉飯，更有MOP10至15一個車輪餅、手打檸檬茶、果汁等。至於夜市常見嘅串燒亦有，比如係魷魚鬚、牛肉串、羊肉串、金菇肥牛、烤粟米、雞髀，其中魷魚一串賣MOP30，兩串賣MOP50，烤完再炒，再加入醬料調味，都算係不敗手法，魷魚入口軟腍，唔會黐牙﹐醬汁濃稠偏鹹。

講到整個「康公夜市」嘅重點，不得不數夜市內嘅平價燒海鮮！主打燒烤海鮮嘅攤檔只有兩間，食材相近，都係大隻波士頓龍蝦、大瀨尿蝦、蟶子皇、扇貝、生蠔、青口、鮮魷魚、花螺等，如果要講有咩唔同，大概就係套餐唔一樣。靠「康公廟」嘅係前臨叫「豬肚雞」嘅餐廳，大瀨蝦套餐MOP180有一隻龍蝦、兩隻生蠔、一隻扇貝，MOP78至100有烤生蠔8隻、MOP100有烤扇貝6隻，大龍蝦一隻就賣MOP100。另外，重有臂咁長嘅瀨取尿蝦，一隻賣MOP150，兩隻賣MOP280，至於大龍蝦套餐MOP180就含一隻龍蝦、兩隻生蠔、兩隻扇貝。

至於另一間賣平價燒海鮮嘅就叫「阿志麵家」，原店地址靠近「關前薈」。當中，有蒜茸波士頓龍蝦，半邊賣MOP70、兩邊賣MOP120，亦有招牌椒鹽泰國瀨尿蝦MOP100／隻、原色胡椒炒羅氏蝦MOP100／份、每隻MOP200起嘅避風超炒大肉蟹。另有蒜蓉泰椒燒生蠔，MOP100有12隻，XO醬炒原隻澳洲青邊鮑魚MOP250／份、蒜茸燒紐西蘭蟶子皇每隻MOP25、羅勒豉汁炒白蜆MOP80／份、川辣汁炒海花螺MOP100／份。

大大隻龍蝦開邊後，烤至香口，上面舖滿海量炒香蒜蓉，亦有少量蔥花紅辣椒，而半邊同兩邊都包含蝦頭蝦身同蝦鉗，蝦肉爽口彈牙，重蒜更香口惹味。至於烤生蠔，唔單止有大量蒜蓉，更有粉絲底，生蠔置於粉絲蒜蓉底，有少量蔥花、蝦乾，多料多汁，亦夠香口，其實呢啲配料都係不敗之作。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭巴士路線1、3、3X、4、6A、8A、18A、18B、19、26、26A、33、61、101X、MT4、N1A至「十六浦站」，過對面馬路，徒步約2分鐘即達。

❷ 夜市只開星期六及日，平日只係普通一條街道。

❸ 夜市攤檔並唔多，而且只係佔十月初五日街嘅一小段路。

❹ 夜市內座位唔多，想要坐低食可能就要先搵位再點餐，或者與同行嘅人分頭行事就最好，一個點餐而另一個搵位。而食完之後，記得自己將垃圾掉落垃圾桶，因為無人會負責清理！