【澳門自助餐】Sky21人均$138＋XX爽歎半自助餐正對旅遊塔！歐陸buffet＋自選意粉配黑毛豬戰斧扒／秘製非洲雞／黑椒和牛扒

平常食自助餐，人均通常幾百蚊起跳，情侶拍拖兩個人想要撐檯腳食好少少，五百蚊走唔甩！今次E.A.Two去咗澳門食自助午餐，竟然人均百幾蚊有交易，同平時普通食餐飯價格相近。該店甚至正對旅遊塔，新葡京酒店亦恍如咫尺之間，一隅可近距離享270度絕美海景！到底該店嘅半自助式自助餐水平如何、係咪物超所值呢？

今次我哋去食自助餐嘅餐廳，座落南灣湖畔，位於該幢大廈最高層，恍如天台餐廳。該店為「SKY 21」，座落「AIA Tower 友邦廣場」內，踏入大樓之後，上扶手電梯後再轉乘電梯上頂樓﹐就可以抵達餐廳。老老實實，由於「SKY 21」門面係採用暗黑風格，好似想營造神秘感，但格調騎呢，反而令人有唔舒服感覺。甫踏入餐廳，一度以為自己行錯路，因為餐廳單睇門面，唔似係一間食自助餐嘅地方。

該店大門口係位於21樓，該層的確係有用餐地方，但原來重可以上樓梯去上一層，換言之上一層就係22樓，亦是係該幢大廈最高點嘅地方。該層自助餐區以階梯劃分成兩邊，左邊係少量卡座同自助餐食物擺放嘅地方，另一邊就係吧檯同其他梳化雅座。

更意外嘅係，於左面用餐位置打開落地玻璃門，係可以通往第三個用餐區，係露天茶座，如果鍾意fancy同食飯打卡嘅朋友，不妨選擇外面露天座位。就算唔係用餐，都可以去外面望望澳門風景。從露台望出去，可近距離環瞰180度大海景，南灣湖風景一覽無遺，「新葡京酒店」、「嘉樂庇總督大橋」清晰可見，亦恍如咫尺之間。連同另一邊眺望「旅遊塔」風景，亦可眺望對岸氹仔景色，用餐係可以270度享海灣景，屬真正食環境嘅餐廳！

講返自助午餐，呢次澳門Lunch Buffet以亞太及歐陸美食為主，人均基本價只係MOP138。只要加上MOP98至128，除咗享用自助餐點，亦同時可以食埋每人一款主菜、一款意大利手工麵食，再加果汁、汽水或檸茶、咖啡，份量合理。其中，包括有280克嘅黑椒 · 和牛扒配黑椒汁MOP128、300克嘅挪威 · 三文魚配荷蘭醬MOP108、300克嘅西班牙 · 黑毛豬戰斧扒配蘑菇醬MOP108，而秘製 · 非洲雞MOP98，係最平嘅一款主菜，加埋人均低至MOP236，亦算經濟實惠。

今次揀咗西班牙 · 黑毛豬戰斧扒配蘑菇醬、秘製 · 非洲雞，雖然斧頭扒比非洲雞貴，但呢款秘製非洲雞就比黑毛豬斧頭扒更有驚喜。因為斧頭扒上檯感覺只係一塊扒加上一兜醬汁，配料亦簡單，只有兩三條長長盧筍同紅蘿蔔點綴，賣相欠奉。不過斧頭扒剛熟透，豬肉肉質有啲紮實，但入口係軟腍唔嚡口。

至於意粉麵食就是即叫即煮，則可以選意大利粉、長通粉、寬條麵，再選醬汁，例如蕃茄醬、忌廉醬、青醬、喇沙醬或冬蔭功醬，更可以選擇佐料，例如洋蔥、彩椒、車厘茄、蘑菇、火腿、煙肉、黑橄欖、巴馬臣芝士、甜粟米。個人比較偏好蕃茄醬長通粉，醬汁亦算黏滿長通粉，而長通粉亦煮得軟硬適中，但醬汁就未能夠入到長通粉嘅窿窿內。

至於自助餐有咩食呢？老實講，午餐選擇並唔算多，只係得基本料。呢邊有麵包籃、兩款雜錦壽司卷，嗰邊有自選沙律菜，但只係自選配料嘅沙律菜，同埋菠菜沙律、Waldori沙律、千層峰沙律。而熱湯就有紅豆粉葛豬骨湯、菲律賓三文魚酸湯，後者湯汁真係帶重酸味；另一邊重有馬來西亞肉骨茶。而自助餐常客冰鎮海鮮方面，午市自助餐只有紅凍蝦、青口、海螺可以選擇，亦算爽甜，不過不失。

而熟食選擇亦算少，除咗剛才提到嘅肉骨茶，亦有炒雜菜、beef stroganoff，最令人O嘴嘅係，竟然連白飯都算係一碟熟食！另一邊近甜品欄就有炸洋蔥圈、Sky21至尊薄餅。Pizza主要材料係餅底、芝士、蕃茄、車厘茄、洋蔥、菠蘿，不過不失。

甜品反而選擇算適中，當中有泰式芒果糯米飯、芝士蛋糕、杯子蛋糕、斑蘭奶油杯、芒果黑糯米酸奶杯、焦糖雞蛋布丁、兩款冬甩，加上西瓜、蜜瓜、哈蜜瓜作飯後果盤。「Sky 21」似乎甜品比熟食穩定，起碼無邊款係特別伏。編輯比較鍾意芒果黑糯米酸奶杯、焦糖雞蛋布丁，前者酸甜中有軟糯感，芒果亦香甜，整體唔會太甜膩；而後者則為香甜之選。至於芒果糯米飯就比較乾身，冬甩整體就太過甜膩。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式接受Visa、現金、銀聯。

❷ 店內有二人英式下午茶可以選擇，供應時間為14:30至17:30，兩位用MOP368，三位用MOP528。

❸ 店內收加一服務費，而且係會收取10%服務費同5%政府税。另外，都有酒精飲品提供。

❹ 必須要預先訂位，人均MOP138／位，用餐時間限11:45至14:30 。謹記唔好浪費食物，因為隨時會被收取額外費用。