新即是舊定新不如舊？荃灣小商場人氣米線貴香園重新出發雲南酸辣、麻辣、酸麻辣、沙嗲湯底

米線向來係香港人特別鍾情嘅美食類別，尤其係雲南酸辣米線！唔少情侶都鍾意拍拖兩個人去食米線，貪快捷同平靚正。荃灣原先有間叫「貴香園」嘅米線店，後來結業，目前原來已重開，而且改名為「新貴香園」。到底改名後嘅「貴香園」，係新即是舊，抑或係新不如舊呢？

相信荃灣人一定好熟悉「貴香園」米線，該店以往一直係區內人氣米線之一，雖然舖頭細小，但就吸引唔少人朝聖。後來，該店一度疑似結業，只係剩返從舊荃灣店分拆出嚟嘅太子店，而太子店又一度分拆出旺角店。不過，據編輯以往實試所得結論，旺角店係最難食，回頭率甚低嘅一間，唔單止酸辣米線，連蒜泥白肉都唔係炸花椒油嚟，只有紅油，蒜泥少得可憐。而太子店則為不過不失嘅一間，酸辣米線亦算合格水平，而蒜泥白肉至少係花椒酒同大量蒜泥。

原先舊荃灣店，據以往實際試過經驗所得，真係3間「貴香園」中最高水準嘅一間，回頭率最高！而現時荃灣店嘅「貴香園」，竟然改名做「新貴香園」？據讀者報料，呢間加上「新」字嘅貴香園，已經開返一段時間，其實就係荃灣「貴香園」舊店，老細同舖頭位置皆不變。

單睇餐牌，店內有唔少川味小食，包括川味黃金皮蛋$26，對編輯嚟講，最失望嘅係無蒜泥白肉，未能試到最能夠睇到水平嘅一款餸菜。但當日無皮蛋，故此，我哋只能試到米線單一菜式。

點餐紙內，先選湯底，再選麵類及辣度，再選配菜。「新貴香園」嘅湯底有雲南酸辣$33、招牌酸麻辣$33、四片麻辣$33、香濃沙嗲$33，另有清湯$31及熱拌$33可以選擇。每碗米線都含有炸醬、芽菜、酸菜、韭菜、芫荽、蔥花，當中更有7種辣度可以選擇，例如由小小辣到勁辣，夠堅嘅你可以試吓第7級勁辣！

今次選擇一碗雲南酸辣$33，另一碗係招牌酸麻辣$33，酸麻辣就係添加少少麻嘅酸辣湯，BB辣嘅辣度極輕微，而少辣亦唔算太辣，辣度恰好，而米線亦軟腍，都算掛到湯。不過，湯底似乎水份比以前多咗，感覺係太watery，溝淡咗酸辣味同麻辣味，米線今次完全比小食搶鏡。

店內米線配料價格由$7至$11，連豬腸都係軟腍同入口即溶，甚難得。當中，最有驚喜嘅係炸雞翼、炸豬頸肉、炸豬扒，甚至比米線及湯底更令人意外！雞翼炸成金黃色，酥香惹味，但必須即時食，浸喺辣湯內表皮就變軟。而豬扒切成小塊，據悉係以咖喱粉醃完再生炸。即使浸湯都唔會影響質感，豬扒連骨位置比無骨位置更軟嫩同醃得入味，唔會太乾柴。