【路環景點】S形馬路海邊堤岸接清靜海灘！竹灣神秘樹洞小路通往澳門最南點！

澳門路環係近年唔少遊客都能夠搵到嘅地方，大多數人都會走路環市區或「黑沙海灘」，甚至「龍抓角海岸徑」。大家似乎忽略咗「路環」與「黑沙」之間，其實重有一個「竹灣」，唔單止係別墅集中地，而且擁有細小但清靜嘅海灘，當中更有一道神秘樹洞小路，可以通往澳門最南點，情侶拍拖兩個人遊覽嘅話，不妨去探探險！即睇全澳門最南端路線！

路環本身就係澳門後花園，路環市區、「黑沙海灘」皆為近年受歡迎嘅網紅熱門旅遊點，而中間嘅「竹灣馬路」有如S形般迂迴曲折，分岔路口更連接鄉村小路，能通往路環市區。若從擁有全海景觀、環境清幽自然嘅「黑沙龍爪角海岸徑」終點站「竹灣豪園」出發，依循「竹灣馬路」走，不消5分鐘就可以轉入小路「法司令士古街」。

小路可以下行至「竹灣酒店」及「竹灣青年旅舍」，只要走到最底，就可以前往隱藏於竹灣一帶嘅神秘澳門沙灘。全個澳門其實只有兩個沙灘，一個係連綿千幾二千米嘅「黑沙海灘」，比較吸引外藉人士；另一個就係聚集澳門在地人嘅「竹灣海灘」。只需要下行約400米左右，自然能夠享受鮮為人知嘅海灘風光。

不過，「竹灣海灘」呈橄欖形，地方不大，甚至可以話佔地只係好細小，沙灘面積比赤柱後灘、石澳後灘等更細，成個沙灘大概只係約1300平方米，但水深就竟然有3米！只不過﹐沙灘人數唔多，前臨大海，青山環抱，環境較清靜，即使只係坐喺沙灘一隅大石上吹吹海風，亦可享受慵懶、悠閒感。沙灘內，海水算清，沙粒亦可接受，同其他沙灘一樣有水上活動中心，亦係正式泳灘之一，有救生員服務。

如果再想前往今次路線重中之重嘅「澳門最南點」，就先要經過盡頭「竹灣泳池」，上行直長階梯至巴士站頭，步程約為5分鐘，視乎走樓梯速度。然後，只要從偏僻沙灘前行至分岔路，轉入鄉村馬路，中途有唔少獨立村屋。依馬路向前走約10分鐘，左邊就會見到一棵大樹生出橫向樹枝，並勾劃出一個樹洞小路，穿梭其中能通往最南端嘅神秘大海！

「澳門最南點」位於路環市區至「竹灣泳池」之間，依山傍海，背後有懸崖，前面又有海浪，繼續前行亦有小漁村。最南端係澳門路環島天然海岸線，下行樓梯後就能到達最南端大海。盡頭可享超過90度、但少於180度嘅澳門南面海景，亦可欣賞白浪拍打礁石嘅畫面，環境秀麗，黃昏時甚至觀賞日落景。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 從澳門半島或氹仔乘搭巴士路線15、21A、26A﹐都可以直達竹灣一帶，需時約30至45分鐘。只要於「竹灣海灘－2站」落車，就可以經「竹灣青年旅舍」、「竹灣酒店」下行至「竹灣沙灘」。而從「竹灣泳池－2站」落車，亦可從「竹灣馬路」下行至「竹灣沙灘」，但就唔係行斜路，而係行樓梯。

❷ 如果想去「澳門最南點」秘景，同樣可以喺「竹灣泳池－2站」落車，然後依「鄉村馬路」走向「路環」方向，大概10分鐘步程就可以見到海岸小路入口。

❸ 「竹灣馬路」同「鄉村馬路」都係人車同行，唔單止有私家車，而且有巴士，所以要特別小心安全，盡量靠邊走。

❹ 於「澳門最南點」離開時，既可以原路折返搭車，亦可以再繼續前行，10分鐘左右就可以到達路環市區邊緣「譚公廟」。