全港20間分店！牛角60分鐘半自助燒肉放題似舊時邊種自助餐？

來自日本嘅日本燒肉專門店「牛角」，向來係唔少情侶拍拖兩個人食自助燒肉嘅地方，認知度高。喺香港就係已全線結業嘅「敘福樓」姊妹店，目前依然有20間分店。最近再去食「牛角」，方才發現呢個半自助燒肉放題，竟然似舊時學生時代一種平價自助餐，到底係邊種同點解呢？無咩事，都係去食返一人燒肉。

所謂嘅「燒肉放題」，即係「燒肉」加「放題」，簡單嚟講就係半自助餐加燒肉。入座前先選擇要邊款燒肉套餐，輕量級$88／60g 有5片牛五花、5片豚肉燒或6件雞腿肉；中量級$108／120g 有5片牛五花、5片豚肉燒、5片豬頸肉或6件雞腿肉；而重量級$128／180g 則有5片牛五花、5片豚肉燒、5片牛舌或6件雞腿肉；另有一款係人氣我選$160，含澳洲和牛牛肋肉﹐亦可揀5片牛五花、2件牛頸脊、2件腹胸肉、4片薄燒澳洲和牛赤身或4件厚切日本熊本豚腩肉。更有全牛餐，秘傳醬汁牛五花$128／200g或$148／300g、上級牛肋肉$188或豪華日本國產牛$268。

今次一款選擇重量級$128／180g 含有5片牛五花、5片豚肉燒、5片牛舌或6件雞腿肉，數量唔算太多，但60分鐘時間其實都要燒得頗快；另一款則選擇秘傳醬汁牛五花$128／200g或$148／300g，肉量大概就係60g嘅4倍，同樣呢盤燒肉係要同時間競賽。檯面則有5款醬汁可以選擇，燒肉醬汁就已經有2款，一款普通燒肉汁，另一款係秘製燒肉汁，其實無乜太大分別。肉片偏薄，有少量油花，一般般啦，只係我哋寧願去食返「牛繁一人燒肉」。

今次E.A.Two前往尖沙嘴分店，並選擇午市60分鐘半自助餐，包含自選肉片，以及出面buffet自助吧檯食物。當中，包括有果汁、汽水、茶，雪糕、小甜品，沙律、蔬菜、關東煮、昆布湯、日式咖喱飯等等。整個吧檯格局，其實好似以前學生時代食嘅平價自助餐，即係嗰啲韓國燒肉自助餐，好似漢乜苑咁。唔單止肉片質素平平，而吧檯出面嘅自取食材，都係參差不齊。

開始燒肉之後，不斷有油煙上升，但就唔見每張檯有抽風系統，只係見有盞射燈。週邊環境昏暗，唔多睇到抽風系統喺邊，只係樓底特高，油煙散得頗快，唔會太大油煙味。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 香港牛角分店地址﹕屯門鄉事會路83號V City 1樓L1-18號舖、屯順街1號屯門市廣場1期2樓2182號舖、青山公路 - 元朗段249-251號元朗廣場3樓322-323號舖、楊屋道18號荃新天地2地下G69號舖、安邦路8&10號大埔超級城C區1樓521-526號舖、深旺道28號V Walk 2樓L2-116A號舖、南寧街ac4 1樓45號舖、達之路80號又一城LG1樓LG1-29號舖、廣東道3-27號海港城海運大廈3樓LCX 37B號舖、太子道西193號MOKO新世紀廣場3樓342D號舖、黃埔天地享膳坊(第4期) 地下G1號舖、銀城街1-2號置富第一城1樓132號舖、告士打道311號皇室堡1樓112-115號舖、太子道東638號Mikiki 1樓120號舖、偉業街33號德福廣場2期4樓425號舖、康山道1-2號康怡廣場北座2樓S37-S38號舖、筲箕灣道393號形薈1樓L1-04號舖、小西灣道28號藍灣廣場地下G11A號舖、唐俊街9號PopCorn 2地下G58-60號舖、坑口重華路8號東港城1樓183號舖。

❷ 最後落單時間為22:30。店內有加一服務費。

❸ 付款方式接受Visa、Master、現金、八達通、AE銀聯、JCB、Apple Pay、Google Pay。

❹ 普通午餐用餐時間僅限60分鐘，加$30多30分鐘，再加$33有生啤放題。有其他套餐會有長少少嘅用餐時間，例如90分鐘。