【氹仔新景點】近官也街、還原益隆炮竹廠原貌！澳門炮竹工業遺址活化僅加400米遊徑

澳門氹仔景點不少，唔少香港人只識去大三巴、官也街，甚至路環市區，但其實澳門有更多值得欣賞嘅地方。皆因澳門將歷史文化保育良好，唔單止將該地獨有嘅殖民地歷史文化完整保留，連該地自身嘅歷史遺跡都完好保存。最近，E.A.Two實地參觀咗距離官也街不遠嘅炮竹工業遺址，發覺整個活化空間只係加上一道400米遊徑，而且整個面貌並未有作出任何刪除改動，反而還原本來真面目，值得拍拖兩個人睇一睇。

距離「官也街」不遠處，有一個全新景點「益隆炮竹廠」工業舊址，處於氹仔市中心一帶。雖然位置稍為隱蔽，但現時都係交通便捷。該炮竹廠建於1926年，當時係炮竹業興盛嘅時候，係兩大炮竹廠之一，亦曾經係澳門重要經濟產業。只不過，該炮竹廠於80年代中期結業，為當地營業時間最長嘅炮竹廠，後來輾轉落入發展商手中，發生唔少換地風波。直到2022年，「益隆炮竹廠」終於獲文化局進行活化工程，更將整個遺址改為「益隆炮竹廠舊址遊徑」，活化後15個月終開放公眾參觀。

澳門炮竹廠其實即係爆竹廠，亦即係煙火工廠，「益隆炮竹廠」地方唔細，據悉有約25000平方米，原先喺60至70年代係最輝煌嘅時候，可算係當時嘅澳門龍頭產業，爆竹同神香、火柴曾並列為澳門三大手工業，舉足輕重。惟於約1984年結業之後，現時「益隆炮竹廠」已經係碩果僅存而完好保留嘅昔日炮竹廠遺址。爆竹廠活化後，澳門當局只係加上400米遊徑，讓遊人可以於遺址其中圍繞一圈參觀，並加上水牌介紹「益隆炮竹廠」。

荒廢咗40年之後﹐澳門有關當局亦只係將「益隆炮竹廠」稍作修復同保育，確保無危險物品，並加入各種展覽館、資訊中心、工作坊、文創禮品店，以及咖啡店等現代化產物，推廣炮竹廠文化。當中，展覽有「煙硝迴響——澳門炮竹業歷史展」，包含實物收藏品、圖片等。

從現場400米遊徑可見，以天然木材作路徑，融合自然環境，遊人可以觀賞炮竹廠原貌。有關當局將原有佈局還原，連一旁廢屋都無任何改動，只係做修復工作。整條遊徑將歷史還原，由歷史引導，沿途會經過炮竹廠每個角落。穿過遊徑，可以走過炮竹廠嘅漿引區、水道、池塘、鑿炮房、貨倉等，更可探索製作藥引嘅地方，例如打引房、漿引房、烘引房等。除咗水牌，更可以scan QR code睇埋炮竹生產過程同運作程況，大家可以從中穿越歷史加深了解澳門爆竹廠，呢度係澳門全新文藝人景點。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 參觀遊徑於06:00－17:00開放入場參觀；而展覽館、文創禮品店營業時間則為10:00－19:00，逢星期三15:00－19:00休息。

❷ 另有「藝遊點」，星期五六日會有「藝遊人」進行展演。園區內設有「炮竹廠歷史導賞遊」，為公眾導賞，有粵語可擇，唔使報名，只需要屆時喺入口就可以參與。

❸ 乘搭巴士路線11、15、22、28A、30、33、34至「嘉模泳池站」，對面就係入口處。

❹ 活化區遊徑免費入場。遊徑於同一時段參觀人數有限，最多為200人。