實試台中5大交通方法！全新捷運設4個轉車站、台鐵／公車一樣方便！到底搭Uber定的士好？

以往情侶拍拖兩個人去台中旅遊，通常都要租車，自行駕駛到目的地，或者join local tour；因為以前未有台中捷運，而且交通又唔太方便。不過，現時去台中基本上唔需要特別去租車，近年連台中捷運都已落成，交通就更方便！只要跟住E.A.Two走，台中5個交通方法一樣可以遊覽台中各大景點，唔需要怕迷路，或者要畀好高嘅交通費。

台中交通（1）﹕捷運

台中捷運於近年先正式通車，目前只係得綠線建造完成，其集藍線、雙港輕軌、大平霧線則未開通。捷運綠線係第一條台中捷運線，可以到達各知名景點，來往「高鐵台中站」至「北屯總站」，全線合共有18個站，點對點長將16.71公里，全程只需35至40分鐘。

若乘搭高鐵至台中，落車後轉乘捷運就係總站「高鐵台中站」。每次乘搭台中捷運，同高雄捷運或台中捷運一樣，唔需要特別買乘車票，只要使用悠遊卡、一卡通、icash2.0，都可以直接入閘。

捷運有4個轉車站可以轉乘台鐵，除咗轉乘「新烏日火車站」嘅「高鐵台中站」，亦包括轉乘「烏日火車站」嘅「烏日站」、轉乘「大慶站」嘅「台中捷運大慶站」，以及轉乘「松竹車站」嘅「松竹站」。

留意台中捷運首班車同尾班車時間分別係朝早6點至凌晨12點，一般捷運每班次大概10分鐘，尖峰時段會縮短至約每班次6分鐘，而夜晚11點後就會拉長至約每班次15分鐘。至於票價，捷運成人車費搭足全程就都係TWD50，而一日票就賣TWD120。

台中交通（2）﹕台鐵

台鐵其實即係火車，台中舊火車站目前經退役，只係得新站，亦即係目前見到嘅「臺中火車站」。若然乘搭高鐵至台中，落車後要轉乘台鐵，就可於「新烏日火車站」上車，4個站就到「台中火車站」。而台鐵有分區間車，即非對號同對號，例如係新自強號等。如果無買位，記得唔好亂上車，於台鐵App睇住該鐘數係區間車先好上車，免生麻煩。

台鐵區間車即係站站停嘅列車，而其他非區間車就係只停部份車站，而且係設有預訂座位。乘搭台鐵區間車，上落車唔需要特別買票，只要使用悠遊卡、一卡通、icash2.0，均可以直接入閘。

台鐵雖然有好多分站，能夠來往唔同地區景點，但需時就較長，下載台鐵App可以睇到每班車實時狀況。以台中火車站前往清水車站為例，車站需要約1小時。又以來往新烏日火車站至台中火車站為例，區間車需時12分鐘，快車就只需6分鐘，車費剛為TWD15。而若然從大慶車站前往台中火車站，車程只需約6分鐘，車費為TWD15。

台中交通（3）﹕公車

留意客運唔等如公車，抵達台中嘅客運包括有國光客運、統聯客運、和欣客運、阿羅哈客運，台中市中心設有客運轉運站，包括靠近台中火車站嘅台中轉運站，以及朝馬轉運站，可以來往台中至其他縣市，可以於台中火車站、市政府、東海、逢甲夜市等地標落車。而如果係台中市內交通，其實乘搭公車已經足夠。

如果係來往台中清泉崗國際機場，來往台中火車站嘅話，就只能夠乘搭9號公車，或者國光客運A2路、中台灣客運302路，否則只能以的士或Uber往返。而台中捷運未通車前，公車已經頗為發達，可以來往多個知名景點，無論係高美濕地、逢甲夜市、彩虹眷村，抑或係去一中街、台中火車站、審計新村等都好方便，同台鐵一樣，只要使用悠遊卡、一卡通、icash2.0就可以上落車，不過記得要上落車都各拍一次卡喔！

今次以來往台中港三井摩天輪、台中港旅客服務中心觀景台至台中市中心為例，只要於「臺中港旅客服務中心」旁嘅公車站等車，就可以乘搭308、678、111、170、688號，其中688號可以來往高美濕地、清水車站。而當日回程選擇310號，會經過靜宜大學、東海大學、秋紅谷、市政府，總站就係台中火車站，若然要去逢甲夜市，喺秋紅谷站落車，徒步約10分鐘即達。

舉吓其他例子，公車160號可來往逢甲大學、159號可來往台中一中街、70號可來往彩虹眷村、161號可來往台中國家歌劇院、153號可來往谷關、155號可來往麗寶樂園。

台中交通（4）﹕的士

台中街道上有唔少的士，尤其係市中心一帶，對於唔擅長睇台中複雜巴士路線嘅人，可能會直接選擇做伸手黨截車，直達目的地。事實上，台中的士同香港的士一樣係按錶收費，起錶價係TWD85，首1.25公里之後就會開始跳錶收費。的士每200米會跳錶一次，而台中的士嘅跳錶價係TWD5，如果車輛有延滯，每1分鐘又會跳錶一次。夜晚時份喺台中乘搭的士，則會額外收費TWD20。

以當日落大雨乘搭的士為例，由逢甲大學一帶前往捷運水安宮站附近，距離約為3.9公里，最後落車收費為TWD240，折合港幣大概係HKD60。