藍屋有新店！灣仔素食三餸飯可免費添飯！麗姐廚房無味精真素菜連湯水人均$60

香港小店愈來愈難做，唯獨兩餸飯店依然能佔一席位，仿如香港兩餸飯中心。不過，大多數香港兩餸飯都係比較油膩，素食兩餸飯就夠晒健康。而灣仔就有間唔只賣素食兩餸飯，賣嘅係素食三餸飯，以中式齋菜及私房菜為主，健康美味，中午更大受附近打工仔歡迎。素食有益健康，適合情侶拍拖兩個人去支持！近月，該店於同區更開設分店，由逢星期日休息變成每日營業，Vegan必揀！

座落灣仔市中心嘅「麗姐廚房」，隱藏於商業中心大廈內，相信對於附近打工仔應該唔陌生。該店中午主打嘅係傳統素食，選用健康食材，夜晚就有傳統、創新融合嘅素食選擇。店舖打通4個單位，連接A至D室，地方偌大，座位充足而舒適。

香港素食餐廳選擇話多唔多，話少唔少，近年兩餸飯店更加係開頭成行成市，而將素食及兩、三餸飯融合嘅小店，就比較少有。如果要睇埋食物水平同質素，就更加難搵！「麗姐廚房」就係一間素食三餸飯專門店，價格適中，包含無味精靚湯之餘，亦可以免費添飯！

對於灣仔區工作嘅打工仔嚟講，「麗姐廚房」嘅素食三餸飯$60 都算係恩物﹐正常價錢有飯有湯有家常小菜。該店菜式不時轉換，但每日都有6款菜式可以選擇，當日就有南乳齋、欖菜芥蘭頭、炸素肉排、粉絲杞子蒸蛋、韓式茄子（小辣）、時蔬（菜心苗）。加上合掌瓜湯作例湯，內有合掌瓜、紅蘿蔔、粟米等，無味精又健康有益。至於白飯，亦非普通白飯，內有乾坤，竟然加入薏米粒。

其實，除咗芥蘭頭好硬好多絲之外，其他小菜水平亦頗高，但芥蘭頭切到好似蘿蔔片，幾有創意。炸素肉排就係模仿葷肉質感嘅新式素菜，味道香口。而南乳齋、粉絲杞子蒸蛋、韓式茄子、菜心苗都係一般真傳統中式素菜，其中南乳齋係頗受歡迎嘅選擇，係以南乳燜煮嘅中式齋菜，內有雲耳、豆卜、白菜等，足料又入味，但醬汁唔會過份濃郁，好怕濃到太鹹嘅南乳齋。

「麗姐廚房」已經營超過20年，最近擴充營業，於灣仔「藍屋」開設分店「蓮子麗姐健康素食」，同區已有兩間分店。而「藍屋」店亦係自家製菜式為主，但就無素食三餸飯，全日餐牌都係偏向模仿葷食嘅菜式，比如係咖喱素羊腩、素餃子、椒鹽炸蓮藕餅、醬燒素鰻魚、滷水素雜錦、咖喱素魚蛋等等。

該分店變成一個餸$50至$60，大部份平均都係$60，糖水就$40，而招牌靚湯加$20。選擇亦算唔少，比如係咖喱素羊腩飯、欖角素叉燒飯、唔喱素魚蛋飯、滷水素集錦飯、清湯蘿蔔素羊腩飯、椒鹽炸素雞髀飯、椒鹽炸蓮藕餅飯、醬燒素鰻魚飯、醬燒素鴨飯、素餃子飯、鮮茄紅汁燴麵含五辛、炸芝士黃金球、招牌酸梅湯、竹蔗矛根水。