【澳門美食】祐漢街市熟食中心逾30間街坊食肆任揀！雞湯瀨粉／炸腸／雙拼煎餃

情侶拍拖兩個人去澳門自由行，唔少人好多時都會去市中心知名地區，但澳門北端原來都有個美食廣場Food Court，躲藏於街市之內。整個熟食中心有超過30間街坊食肆，每間價格相宜，當中重有出名店舖，既係街坊之選，亦係澳門平價用餐地！

「祐漢街市熟食中心」位處澳門近最北面位置，同遊客區同市中心有一大段距離，向北行10分鐘就可以去到「關閘廣場」，不過就唔太關我哋事。但向西南面走10分鐘，亦可以前往「望廈炮台」、「澳門旅遊大學」，所以澳門地方其實唔大。

從巴士落車之後，由看台街行到長壽大馬路，然後轉入市場街，前行就會見到一幢紅色建築物。「祐漢街市」馬上就映入眼簾，頂端刻有4個大字，下方係街市，而上面就係熟食中心。不過，呢個方向進入熟食中心嘅話，就要經過街市，然後轉上樓梯。所以如果兜去後面入口，就唔使經濕漉漉街市，直接乘搭扶手電梯，上行至2樓或3樓即達熟食中心樓層。

今次選擇3樓用餐，每間食肆都係好似Food Court咁，先畀錢再入座用餐，無論2樓定3樓，中間都係以電梯貿隔開兩邊座位。穿過兩層樓嘅熟食中心，每間價格皆相宜，有幾間更特別多人排隊購買，都算係澳門平靚正選擇！

熟食中心內有主打咖啡嘅標記，主打餃子嘅文記美食、美味寶小食、濠記餃子美食、煎餃精點小食、其栢，主打沙嗲嘅316沙嗲仔、主打炸物嘅成記油炸美食，主打粥品嘅成記、北源美食，主打糖水嘅錦記，主打兩餸飯嘅培記美食。而最為人熟悉而人龍最長嘅必然係其記，主打腸粉同雞湯瀨粉。

至於2樓，則有主打粉麵嘅金記面食、興盛美食、日記美食、來自紅街市嘅樂記粉麵，主打飲品嘅海沛咖啡、咖啡佬小坊，主打咖喱嘅咖喱林，主打腸粉同粥品嘅標記、富源腸粉粥美食，主打點心嘅李林點心小食，主打煲仔飯嘅煲仔佬美食，主打餃子嘅春來美食，主打水餃嘅肥佬雲吞水餃，主打瀨粉嘅玉姨鄉村小食，主打炸物嘅33油器美食，主打喇沙嘅強記特色美食，主打豆腐花嘅順記豆腐花、豆腐佬美食，

由於當日見到其中一間其記大排長龍，好奇心軀使下當然排埋一份。該店營業已超過30年，招牌作似乎係黨心杞子雞湯瀨粉、巴戟杜仲豬骨湯瀨粉、胡椒沙仁豬肚湯瀨粉，每碗MOP31。另有麵食，例如豬紅、雞翼、冬菇、豬皮，單料MOP27、雙料MOP40，一餸麵MOP17，單點好似有啲貴，而且除咗冬菇同雞翼特別入味，其他都一般。店內重有款幾多人點嘅炸腸MOP20，即亦係香港人嘅炸兩，份量頗多﹐砌起有3條腸粉，每條都有厚厚油炸鬼。炸兩表面淋上大量醬料，麻醬尤其多，入口呈黏糊狀，最初食係惹味，但愈食就愈膩，最後幾乎食唔晒。

另外，亦試咗韭菜豬肉、椰菜豬肉煎餃MOP22/8隻，份量不少，可以混搭，所以每邊有4隻。餃子煎香，餡料亦令餃子脹卜卜，韭菜肉香較重，椰菜層次感豐富，較有咬口，配搭辣醬會較惹味。至於豬扒包MOP16就麻麻啦，麵包硬過條香港人條命，豬扒亦嚡口，入口乾爭爭，一定唔會想食第二次。罐裝汽水只係MOP6，而一杯檸檬西柚蜜MOP12，就等如柚子蜜，其實無咩分別。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭巴士路線2、3A、6A、7、10B、12、18、18B、19、22、30、34、N1A至「祐漢街市站」，對面就係街市熟食中心。如果係從港珠澳大橋澳門口岸前往，乘搭101X至「看台街/騎士馬路」，徒步約7分鐘即達。

❷ 熟食中心位於街市樓上，搭扶手電梯嗰邊唔使經下面街市。就好似香港嘅熟食中心，都係位於街市樓上，都係似大排檔模式。

❸ 2樓同3樓都有食肆，但3樓嘅舖頭會比較多人食。

❹ 基本上最好用現金付款，葡幣可能會更方便。基本上人均大概MOP60至80已經足以食到飽。