【花蓮一日遊】地震後需7年時間還原？七星潭＋太魯閣歎原住民午餐！砂卡噹、燕子口、九曲洞、布洛灣、長春祠原貌

花蓮太魯閣風光明媚，景色絕美，向來係情侶拍拖兩個人一日遊之選，但一場大地震將天然風景摧毀，多條步道受損。據台灣有關新聞顯示，要於地震後重建還原本來面貌，大概需要7年時間。E.A.Two有幸於天然災禍前探索太魯閣原先最美風景，即睇花蓮呢個必到景點本來模樣。

七星潭

當日E.A.Two跟隨local tour旅遊巴行程走，從市區出發，先走過七星潭，再上山至太魯閣國家公園，走過逐條步道。第一個景點係位於花蓮市區東北面嘅七星潭，呢個海邊係一個海岸風景特定區，海灣呈弧形，故又叫月牙灣，海水清澈湛藍。

七星潭最特別之處係海浪前有大量可礫，構成天然環境。平常海灘係滿佈沙粒，形成沙灘，但七星潭嘅就係一個石灘，整個海岸都滿佈小石頭，石頭偏黑，卻晶瑩剔透，有如精緻藝術品，唔少人更會利用小石頭疊石，砌成理想造型。七星潭海岸更設有賞景步道、亭台樓閣、賞星廣場等，方便大家可以盡情聽海、觀星。

雖然七星潭係花蓮唯一縣級風景區，適宜觀景，但七星潭石灘係一個斷層海灘，所以於岸邊向海走嘅話，行前幾步就會到達深水區，而且係極深嘅區域，所以七星潭係不宜落水嘅海灘！

太魯閣

一大清早走過七星潭，然後就上山至太魯閣國家公園，呢個公園係台灣第4座國家公園，亦係國家級風景區，最特別之處就係各式峽谷同斷崖，環境清幽，天然景色巍峨壯麗。至於太魯閣一詞，其實係源自於16世紀，由賽德克族到太魯閣族，原名為Truku，後來被現代人譯為Taroko。

太魯閣國家公園步道及景色眾多，花蓮一日遊基本上難以走完全部，所以當日跟團行程都只係走過其中幾個。不過，其實太魯閣著名景點不少，除咗有清水斷崖，亦有燕子口、九曲洞、砂卡礑、天祥、合歡山、布洛灣、白楊、錐麓、長春祠等。

燕子口

於進入太魯閣國家公園後，行程第一站就係燕子口，而進入前導遊會為大家攞齊頭盔。當日每個進入燕子口嘅遊人，都已必須要戴上頭盔，確保安全，皆因燕子口本身就隨時會有碎石掉落，所以地震對燕子口造成嘅損毀會特別嚴重。

燕子口步道全長有1.37公里，亦係太魯閣峽谷最精彩嘅一段，穿梭燕子口，可以觀賞當中嘅峽谷、湧泉、壺穴，而燕子口內更有印地安酋長岩、大理石層等天然景象。另外，燕子口都有一段深而窄嘅路，被稱為一線天，因為淙淙溪流沖過時特別快速，所以對週邊大理石侵蝕更強，雕鑿出奇特峭壁自然奇觀，實在鬼斧神功。

燕子口一段有少量商店及紀念品店，當中有一間小吃店太魯閣第一味，售賣一款燕子串串燒，表面似一款雞蛋串串燒，每粒都無內餡，食到最後時發覺只有最後一粒有餡，狀似果醬。

九曲洞

下一站就係前往九曲洞步道，全長有700米，九曲洞同燕子口一樣，都係太魯閣重點精華路段，分別在於燕子口可以從另一端離開，但九曲洞就必須原路折返。

九曲洞入口處就係新設景觀明隧道，由九曲洞隧道延伸出嚟，可以穿梭原石隧道同山壁，海拔其實都有300米高。穿梭九曲洞時，唔單止可以觀賞峽谷風景，亦可探索大理岩壁地形，天然雕鑿嘅斷層、褶皺、節理等猶如藝術品。後段可見靠近溪谷嘅水景步道，然後又可以抵達被稱為魚躍龍門嘅溪流。

最後，步道終段會見到九曲蝠龍四個大字，呢處就係九曲洞步道盡頭。西面為峽谷景色，東面就係一線天，兩岸岩壁極接近，恍惚伸手可及。

布洛灣

中午之後，行程到達布洛灣，而布洛灣係座落太魯閣國家公園立霧溪下游一帶，亦係以前太魯閣族人聚居嘅地方。布洛灣最出名嘅係布洛灣吊橋，亦叫做山月吊橋，另一端重有環流丘步道。

山月吊橋可以環瞰峽谷風景，可讓遊人穿梭其中，大橋設計呈月字形，全長有196米，闊約2.5米，而橋身距離谷底大概有153米。雖然吊橋中間同欄杆都設有格柵，以防峽谷風勢太大，不過呢道布洛灣吊橋並非24小時開放，如果人流多亦會限制人數，仍然確保遊人安全。

原住民午餐

布洛灣除咗吊橋之外，更可以一嚐原住民午餐，行程中段，導遊會帶大家到布洛灣山月村一帶試試原住民午餐。基本上，布洛灣餐廳會以原住民特色食材同花蓮地道食材融合，例如係竹筒飯、小米酒、剝皮辣椒、涼拌山豬皮等。

簡餐有紅燒牛肉TWD250，包含自選飲料、水果、湯，就好似平時一碟港式碟頭飯，白飯放大碟一邊，大半都係醬汁同餸菜，紅燒牛肉與紅蘿蔔薯仔混合，但牛肉又帶有微辣感。套餐含一碗清澈白蘿蔔湯，入口清甜，旁邊有原個橙同一份甜品，甜品煙煙韌韌。

而一份風味餐TWD450，正正係原住味風味套餐，以荷葉墊底，荷葉上面又放有竹蓆，並無食用碟。上面擺放有一個竹筒飯，旁邊有燒豬肉、燒腸、燒蕃薯，亦有恍如山野菜嘅涼拌菜，重有原個橙、甜品同自選飲品。竹筒飯的確係最有原始風味嘅一道菜，最特別係無餐具，所以我哋就直接用竹筒當匙羹食飯。而燒肉就更香口惹味，表皮香脆，油脂豐富，只係比較乾身。甜品同樣係偏向煙煙韌韌，甜度可以入口，不過不失。

砂卡噹

講到我哋對太魯閣最印象深刻嘅一段路，應該係砂卡礑步道！呢道砂卡礑步道全長有4.1米，依砂卡礑溪而建，而該溪流其實有16公里長。砂卡礑步道唔單止可以見到原住民部落，亦可見到岩石嶙峋，更可俯瞰溪水，當你向下望，自然會發現溪水清澈如玻璃水！

砂卡礑基本上位處立霧溪下游支流，附近有大理岩，當溪水流過大理岩時，由於溪水帶有微酸，會溶解大理岩嘅碳酸鈣成份，所以我哋肉眼見到嘅溪水係會呈現藍綠色狀態。

呢段路唔單止可欣賞天然奇觀，更加可見原住民部落，沿途會見到一隻隻放養山雞，不過該處係原住民保留地方，所以遊人係禁止進入，變成一個山谷神秘地方。

砂卡礑溪水將岩石琢磨過，令其變得更圓滑柔美，就似一幅天然風景畫。走到步道較後段，導遊帶領大家下行到溪流處，可安全地近距離感受清涼溪水。如果唔介意赤腳，係可以直接踩入呢段溪流內。

長春祠

最後一站係長春祠步道，全長只有約1.35公里，需時較短，距離太魯闊口不遠。步道係可以直通長春祠，不過就要穿過一道暗黑短隧道。長春祠亦可飽覽峽谷地形，後面更有獨特嘅之字形階梯。

長春祠本身建於1958年，係用作紀念不幸於台八線中橫公路闢建過程中因公殉職嘅225位榮民弟兄靈位。整個長春祠建築設計都係頗為中式北方風格，離遠睇有啲精緻，但又不失莊嚴，附近山壁有泉水湧出，猶如飛瀑，所以又叫做長春瀑布。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ klook拼團一日遊﹕https://www.klook.com/zh-HK/search/result/?query=%E5%A4%AA%E9%AD%AF%E9%96%A3%E4%B8%83%E6%98%9F%E6%BD%AD&spm=City.TopNavigation.SearchInput&clickId=cea69e2aba

❷ kkday拼團一日遊﹕https://www.kkday.com/zh-hk/product/productlist/%E5%A4%AA%E9%AD%AF%E9%96%A3%E4%B8%83%E6%98%9F%E6%BD%AD

❸

❹