【花蓮租車攻略】花蓮轉運站出發！實試花蓮自駕遊！即睇台灣租車自駕注意事項

去台灣旅行，好多時候都係乘搭捷運或台鐵，當情侶拍拖兩個人去到無捷運嘅地方時，唔係乘搭公車，就係享受自駕遊。香港人去台灣自駕時，除咗租車細節之外，到底於馬路中自駕需要注意啲咩呢？台灣同香港道路同規則，又有咩分別？今次E.A.Two於花蓮租車玩，就為大家實測花蓮租車自駕遊，話畀大家知到底香港人租車有咩必須要特別注意！

租車取車實況

今次E.A.Two於花蓮選擇「格上租車」，預訂租咗2日，車為TOYOYTA 5人座房車，對於兩個人來說，空間充足，亦可以擺放行李。租車前，只需要於官網事前預訂就得，最好預早至系1星期預訂，以確保租車公司及早有回覆。當日租車費用為每日TWD2600，折合港幣約為HKD650一日。不過，呢間租車公司對外籍遊客有75折優惠，所以到最後埋單2日只需TWD3900，折合港幣2日租車費用約為HKD975。如果過鐘未還車，會以每小時加收十份一租金，超過6小時就會另加1日費用。

從花蓮火車站出發，徒步至對面馬上就可以見到多間租車公司，「格上租車」為其中一間，招牌頗大，踏出花蓮轉運站，抬頭就可以見到。甫抵達花蓮，就可以直接去租車遊玩，唔需要走太多路，又或者再搭車。取車時，記得要check清楚架車有無咩問題，影低相作記錄，例如本身有咩撞花，或者騎呢痕跡，以及車輛功能問題，比如係車燈、排檔、行車記錄器等，以免還車時有任何爭拗。

購買租車保險

無論到台灣邊個城市租車，總之到台灣租車，都需要攜帶國際駕駛執照，以及護照、信用卡，皆因租車公司可能唔收現金。而當事人要租車，佢嘅國際牌必須於入境30日內先可租車，而且合法租車年齡係20歲，而非18歲。到台灣租車，記得一定要購買租車保險，包括車體險、第三責任險、竊盜險、車輛碰撞險、駕駛乘客險、強制險等，呢種錢真係唔可以慳，強烈建議貴啲最好買全保，因為台灣最多嘅就係交通意外，加上當地人通常都係偏向信當地人，一旦架車被撞花，隨時都要自己額外畀錢賠償。

所謂車體險，即係車輛本身嘅損傷，換言之即係需要賠償車輛因碰撞而維修嘅費用，無論係炒車定係自炒，都可以獲得賠償。而竊盜險即係保障返司機當事人因撞車而受傷或死亡，都係可得到保險金；駕駛乘客險就係保障坐車乘客，如果有損傷，就可以得到保險金。至於強制險，就係只保揸車嗰位傷亡，但唔保任何車輛財物嘅損失，而台灣法例係校規定必須買強制險。而第三責任險就係幫車主賠償，保險金就係幫手賠畀所有人同車。另外，重有竊盜險，可以保障返車輛被竊盜，又或者搶奪所造成嘅損失，不過唔包括車輛入面嘅財物、零件；若成架車唔見咗，呢個保險通常會幫手賠償，產生自負額。所以，都係買全保啦！

駕車所需費用

至於油錢方面，基本上係以里程數計算，租車公司會喺車上面附有加油卡，每公里為TWD2.9。出發前，記得要同租車公司確認架車係用邊個油款，例如係92、95、98汽油，又或者柴油，方便之後自己去入油。入油後，記得要攞單據作證明，保存發票。

詢問負責人時，對方有提到通常花蓮會有2款油站，一間係台灣中油，另一間係台塑石油。如果要入油，最好都係去台灣中油，油站分店較多，自駕遊更方便，而台塑石油分店比較少。雖然有幾間分店係24小時營業，但要留意部份油站營業時間可能截至夜晚8點。還車之前，謹記要注滿油缸，否則就要到時畀返油錢租車公司。還車同一開始租車一樣，手續簡單快捷，非常方便。

自駕遊除咗租車費用、油錢之外，有機會重有高速公路ETC通行費、停車費，甚至係罰款等額外費用，其他費用會於還車之後一次過扣除。此外，於台灣花蓮租車，唔單止一般人要繫上安全帶，亦要留意4歲以外小童必須要用兒童安全座椅，基本上車輛上會有提供。

GPS使用問題

車上會有GPS，方便自駕時跟GPS去目的地，不過基本上要用手寫，而接觸畫面係比較困難，所以寫字都需要時間。雖然GPS基本上唔會有錯，但用GPS嘅同時，最好同時用埋Google Map，確保自己行嘅路線無偏差。

使用租車公司提供嘅GPS導航時，可以用中文或英文輸入資料，有唔少地方都可以直接輸入地名。不過，一旦要去導航無嘅地方，你可以選擇輸入目的地附近嘅地名，又或者直接輸入地址。雖然比較花時間，但咁樣就可以確保導航正確無誤。

自駕安全注意事項

基本台灣道路交通安全嚟講，於花蓮道路上駕駛時，要留意路面情況，尤其係測速影快相。同時，台灣道路係禁上逆向行駛，亦禁止醉酒駕駛，呢幾點同香港揸車無異。超過0.15 mg飲酒量，就已經需要罰款，台灣有句標語係「開車不喝酒、喝酒不開車」！接下來，E.A.Two會講吓台灣自駕特別要注意嘅事項，有唔少同香港揸車並唔一樣，而香港人有可能未必清楚嘅地方，希望大家於台灣花蓮揸車唔會違反當地法例，又唔會糊里糊塗做錯決定，自駕遊都可以安心又放心。

台灣路權問題

台灣全部車輛都係左軚行駛，軚盤操作同行車方向同平常右軚唔一樣，一開始最好慢慢揸，車速可以放慢啲，先去比較近市區嘅地方，有咩事求救都容易啲。等熟習咗架車之後，就可以去遠少少嘅行程。自駕時，出入路口都要睇清楚有無車，然後先駛出路口，尤其係花蓮巷弄。於花蓮揸車，記得要注意路權問題，通常直行車會先走，然後就到左轉嘅車，最後先會輪到右轉嘅車。如果上幹道或支道，要留意自己身處幾號線道，主幹道嘅車輛行到路口時可以先走，比如2號線會比右線1號線優先行駛。

於台灣駕駛，如果有人企喺斑馬線上，車輛需要先讓行人過馬路，同行人紅燈一樣，否則近年車輛有可能會被罰款。除咗要睇行人，於台灣揸車重需要睇機車，皆因台灣機車數目繁多，密度極高，所以左右轉彎時要留意埋啲縫隙同死角位，以免同機車有碰撞。

自駕時，一般會見到車道係分內線、中線同外線，內線係超車用，外線就係慢車用，而多數情況其實最好用中線，進可攻退可守。而右邊又叫路肩，當遇上塞車時，會睇情況嚟開通作紓緩車流量，紅色交叉為唔開放，綠色圈則為開放狀態。

駕駛速度限制

香港人於香港揸車，好多人都會好急躁，不時於馬路上聽到響咹，不過台灣響咹情況極少，所以唔好撳超過1秒，更加唔好多過3下，以免同台灣人發生任何衝突，更加要避免因此而被在地人檢舉，最後收當地嘅告票。台灣當地速度限制方面，市區限速50-60km/h，快速道路為70-80km/h，而高速公路則為100-110km/h，罰款由TWD1600至TWD8000不等，謹記唔好超速！

馬路上有唔少測速相機，更有區間測速，以平均速率計算，非常先進。如果喺手機安裝一個「神盾測速照相」app，當使用Google Map時，就會有測速相機提醒。

馬路交通標示須知

一般台灣道路上，好多時都會出現唔同顏色嘅線，除咗白色之外，重有紅色、黃色，而每種顏色又分為虛線、實線等，到底分別係咩意思呢？原來白線嘅實線即係唔可以轉換車道，虛線即係可以換線或超車，而雙白實線就同樣唔可以轉換車道。黃線實線即唔可以轉線或迴轉，甚至超車，而虛線就係若情況安全就可以超車，至於雙黃線就係唔可以轉線或迴轉，甚至超車，因為條一條分隔線。

而花蓮馬路上一般有白色、紅色、黃色實線，都係同停車有關。白色線即係表示可以停泊車輛，順方向停車，唔需要畀停車費，只要唔超過白線就得。而紅色線就係禁止停車嘅地方，更加唔可以上落客或上落貨。至於黃色線，雖然可以上落客或貨，但就唔可以停車超過3分鐘，只係一個臨時停車位，同白色線有啲分別。另外，有部份馬路會有停車格，有機會係按每格或區域收費。

對於台灣花蓮嘅紅綠燈，自駕過就會清楚，同香港嘅係唔一樣，所以要注意咩情況可以走，咩情況其實仍然需要停低﹐因為當地嘅紅綠燈並非只係得紅黃綠三格。台灣嘅馬路紅綠燈，唔單止有紅色同綠色，更有箭嘴標示。部份路口會出現閃黃燈，即係你身處嘅道路係主幹道，需要慢速行駛，確保左右無車；若然係出現閃紅燈，代表你身處嘅道路係支幹道，屆時必須要停低該路口，等左右兩邊車輛走過之後，先可以繼續行駛。

當交通燈顯示為綠色時，表示可以直行、轉左或轉右；當交通燈顯示為紅色時，車輛必須停低，唔可以向前走或左右轉。當交通燈同時顯示綠燈同向左或右嘅箭嘴時，車輛可以直行，亦可以轉左或右。當交通燈同時顯示紅燈同向左或右箭嘴，記得車輛只係可以轉左或轉右。如果交通燈同時顯示為直行箭嘴同向右箭嘴，即係表示你可以直行或轉右，但就唔可以轉左。

台灣有唔少路牌都會令人混淆，比如係禁止迴轉同左轉，禁止左轉牌係唔可以左轉同迴轉，而禁止迴轉牌雖然唔可以迴轉，但其實可以左轉。

發生車禍點算

於台灣自駕，基本上好大機會都會遇上車禍，因為台灣本身車禍發生率頗高。於租車公司取車時，謹記必須要向該公司攞一個即時聯絡方法，有電話號碼就最好，否則用Line聯絡都好，對方都會有負責人答覆。

如果唔好彩真係遇上車禍，無論係大小車禍，要保持冷靜。發生車禍後，一定要影相或拍片記錄低，保障自己，例如係人或車輛損傷。發生意外後，最好打埋110報警，同時打埋畀該租車公司，向租車公司報告情況，等該公司可以直接向你提供協助。謹記唔好同對方私下和解，因為有咩問題係完全無保障，一定要有白紙黑字記錄，皆因保險賠償都要有記錄。