【花蓮景點】花蓮必去最美秘境景觀玻璃屋！360度俯花蓮景、零死角觀海岸線

位於台灣最東面嘅花蓮，海岸線極其吸睛，除咗花蓮東海岸海旁位置，其實重有一個可以居高臨下、360度全方位觀賞風景嘅好地方。呢個地方係隱藏最美玻璃屋，花蓮山、海、市景色一覽無遺，如果情侶拍拖兩個人去花蓮自駕遊，一定要去參觀一下！即刻睇睇E.A.Two自駕上山，入場參觀玻璃屋實況！

從花蓮火車站出發，可以自駕前往，只要Google Map導航定位「花蓮最美秘境景觀玻璃屋」，就可以直達山頂最佳觀景位！經過花蓮市區、吉安鄉，然後向壽豐鄉走，車程大概只係30分鐘。上山時，中途會經過「花蓮遠雄悅來大飯店」，而該山路有部份路段可能會比較狹窄，而且係單程路，所以要特別小心揸車。

上山路段會不斷見到「花蓮最美秘境景觀玻璃屋」嘅指示牌，只要沿路一直上行就會見到，單單上山一段需時約10分鐘。玻璃屋門口為該店專用停車場，但車位並唔算多，任何入園嘅人都可以將車輛停泊低。

園主特別於山頂設有幾個典型打卡裝置，包括巨型時鐘、粉紅弦月、大紅心心、純白韆鞦、彩虹雲朵、純白鋼琴、動漫風石中劍，可以打卡夢幻美景，通通都係IG打卡靚景位！

走入打卡裝置背後嘅玻璃屋﹐地下為一堆檯櫈，方便客人可以坐低休息，每位客人都可以去後面攞嘢飲，只要憑入園券就可以無限暢飲，當中包括熱茶、果汁、咖啡、冰水等等，無乜特別，不過影完相口渴可以飲杯嘢幾貼心。最難得嘅地方係入園唔限時，所以鍾意影相嘅朋友，或者鍾意睇風景嘅朋友，既可以瘋狂影過不停，亦可以隨意於玻璃屋內放空chill吓！

從地下向上走，會發現呢幢玻璃屋就好似一間別墅，樓高2層連天台，第一層樓有房間，有間房開放入內，房間以粉紅色為主調，大床就似一張公主床，旁邊有敲擊鼓樂，亦有透明韆鞦，背後則為偌大玻璃窗，外望山海景。

再向上走，徒步樓梯即可以攀登天台位置，登頂後自然會發現當中有一個八角形天台。玻璃屋天台位置360度無死角呈現，湛藍大海映入眼簾，視野遼闊，海岸風景一覽無遺！如果剛巧係黃昏日落時份，相信景色會更加醉人！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 星期一至五收費人均TWD100，5歲以下TWD75，長者、身心障礙TWD100；星期六、日及公眾假期收費人均TWD120，5歲以下TWD75，長者、身心障礙TWD120。入場費包飲品，內有果汁、咖啡、熱茶、冰水，免費任飲。上google寫5星review可以獲得一包小食包。

❷ 留意中午有1小時係消毒休息時間。最遲入園時間為18:00。園區無小黑蚊，內裏設有戶外拍照區、室內遊戲區。基本上該店係全年無休，但最好事前check check官方fb或ig會唔會提早休園。

❸ 該店可以自帶外食，不過就唔包服務費、清潔費，唔可以明火煮食，亦唔可以太濃味嘢食。

❹ 直接導航定位搜尋「花蓮最美秘境景觀玻璃屋」就得。門口對出有免費專用停車場。