【花蓮景點】舊酒廠、舊宿舍搖身變文創園區！花蓮文化創意產業園區／又一村文創園區文青聚落

台灣文創風非常熾熱，幾乎每個地區都有文創園區，可見當地好尊重原創文化。而花蓮就有好多文創園區，市中心5分鐘步程之間就有2個文創園區，適合情侶拍拖兩個人去逛一逛。

花蓮文化創意產業園區

「花蓮文化創意產業園區」係花蓮市其中一座文創園區，座落於中華路一帶，係台灣五大文化創意產業園區之一，地方偌大，廣場上經常有市集舉行，文創活力極大。

據悉，園區前身其實係一間舊酒廠嚟，名為「臺灣總督府專賣局花蓮港支局花蓮酒工場」，主要用作製造米酒同經酒。該酒廠於1988年因遷廠至美崙區，而於此地結束營業，當時由1913年設廠起，有超過60年製酒經驗，於2008年先正式由文化部改建為文創園區。

雖然已經唔再係酒廠，但轉變成文創產業園區，仍然不失甘醇氣息同復古滄桑感覺。該園區裝潢以日式檜木配襯水泥建築，依然樸實無華。園區唔單止設有小劇場、展覽地區，亦有倉庫同辦公室，懷舊味中不失現代感。園區內有唔少空地同走廊，更有大草地，適宜散步同拍照。

花蓮舊酒廠演變而成嘅文創園區，其實係來自於日治時期，係當地首座大規模酒廠。呢個地方其實曾經歷二戰時期，亦受過地震摧殘，不過不時都會修繕，所以即使飽受風霜，依然整齊企理。園區有26個場館，建築物依舊維持日治同民治時期嘅形態，更有聳立煙囪。而當年釀造酒嘅工廠依然屹立不搖，包括釀造米酒、清酒、紹興酒等工廠。

又一村文創園區

至於另一個就係「又一村文創園區」，佢雖然唔係舊酒廠，但就係前菸酒公賣局員工宿舍，曾經丟空30年﹐然後先發展成文創基地，每逢星期五至六都會開放戶外職人手作市集。

呢個花蓮文創園區其實就好似台北市集，又或者台中嘅「審計新村」，都係以戶外文創市集為主，亦有室內文創店面。而「又一村文創園區」距離上述嘅「花蓮文化創意產業園區」，只有約5分鐘步程，適宜同一日穿梭2個園區，悠閒過一個下午或夜晚。

事實上，該園區係一間經歷半個世紀嘅花蓮老宅，就好似台灣平常見到嘅眷村，由兩排8戶組成，有足足8幢老宅，裝潢質樸感重，恍如時光停流，因為係舊宿舍嘛！

不過，相對於「花蓮文化創意產業園區」，「又一村文創園區」地方較細，基本上只係得一道巷弄嘅空間，舖頭亦唔算多，所以好快已經可以行完成個園區。雖然係地方不大，但依然有唔少眷村味餐廳可以選擇。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭台鐵至「花蓮火車站」，徒步需約30分鐘，亦可以轉乘市區公車或太魯閣客運301，或者花蓮客運1129、1132、1139，於「花蓮文創園區站」落車即達。

❷ 「花蓮文化創意產業園區」戶外園區就全日開放。

❸ 「花蓮又一村文創園區」對面有個停車場。

❹ 兩個園區都唔需要門票進入，兩個園區只係相距約5分鐘步程，所以可以一次過行晒佢。