取代McGriddles！激罕小店三層班戟漢堡！Coffee Question設假日限定多品料理

香港美式連鎖快餐店麥當勞推出嘅McGriddles一度風靡唔少香港人，好多人都忍唔住去排隊試食期間限定嘅McGriddles。但有唔少唔想食M記嘅朋友嚟講，反而想去搵小店取代，今次E.A.Two前往一間荔枝角咖啡店，當中就有能夠取代McGriddles嘅真班戟漢堡，並非改用熱香餅製作，而係真正嘅班戟製作，而食物同咖啡水平都不俗，更加可以坐低chill吓，適合情侶拍拖兩個人前往！

早前班戟漢堡曾經大受香港人歡迎，有部份食肆都於餐牌中加入班戟漢堡，即Pancake Burger。不過好奇怪，有啲食肆雖然寫「班戟漢堡」，但結果出嚟變咗「熱香餅漢堡」，今次呢間叫「Coffee Question」嘅咖啡店，餐牌中寫住「熱香餅漢堡」，偏偏出嚟就係我哋想食嘅「班戟漢堡」，實在奇妙！

「Coffee Question」原先係位於福華街近荔枝角方向，營業有超過5年，後來因舊樓重建而被逼結業搬舖；目前已經搬遷至近「添福漢堡」嘅麗新商場入口旁邊地舖。該店本來只係一間咖啡店，售賣咖啡同極少量輕食，基本上係唔會飽肚。現時該店唔單止比以往地方大，有正常座位，有窗邊座位，亦有榻榻米座位，更有迷你小型座位。而且該店現時加入主食選擇，並非單單售賣咖啡，而主食亦可有飽肚感。

除咗All Day Breakfast、多士、沙律、意粉、Risotto，假日更設有限定多品料理，包括2款四五料理$98、1款五品料理$108。五品料理有鹽燒蒜香大蝦、南瓜牛油玉米沙律、昆布清酒煮蜆、煙三文魚菠菜卷、日式蕃茄牛肉煮，可配蕎麥麵或明太子飯糰，或者加$10要讚岐烏冬，更可以加$18要埋豆腐菇菇湯同雪糕。呢份五品料理擺位精緻用心，恍如日式料理，每小碗小食都有一定水平，而非求其放啲嘢落去。蕎麥麵於木盤中所佔空間較大，以大碗盛載，麵條勉強亦算爽彈，略嫌軟身咗啲。

旁邊唔睇餐牌以為係味噌湯，其實內有乾坤，內有昆布同蜆肉。沙律由南瓜、牛油粟米組成，煙三文魚菠菜卷就係煙三文魚包裹一奢菠菜。細心會發現鹽燒蒜香大蝦只係雪藏蝦肉，但肉質卻有爽口感覺。至於蕃茄牛肉煮就係編輯較喜愛嘅小食，牛肉配搭蕃茄煮至軟腍，夠入味，有啲似炆煮定燉煮嘅感覺。

店內嘅班戟漢堡 Pancake Burger就係編輯目標之選，當中有3款口味，包括三層熱香餅煙肉漢堡$88 、極邪惡炙燒芝士流心雙蛋熱香餅$88，以及比較創新嘅蔥花蛋x日式五花腩叉燒熱香餅$88。今次選擇極邪惡炙燒芝士流心雙蛋熱香餅內有唐揚岩燒炸雞、發達芝士拌車厘茄沙律、自家製蜜糖醬，擺盤精美，班戟漢堡中層同上層各放有一塊太陽蛋，亦加入香口惹味嘅日式炸雞，而芝士份量唔多，所以唔太膩，旁邊則有車厘茄同沙律菜，用色豐富，顏色甚鮮艷奪目。

班博漢堡層次豐富，可以一啖入口，亦可以斯斯文文地逐層品嚐。一碟上下有兩塊班戟，呈淡黃色，煎香後帶微暖，入口依然鬆軟。於班戟上淋上蜂蜜糖漿，畫面療癒，入口帶有啖啖香甜感覺，令班戟整體鹹中有甜。

該店嘅咖啡係零失敗嘅選擇，比較特別嘅係Earl Grey Based Coffee 鴛鴦咖啡$44、Baileys Coffee$50、Whiskey Coffee$54，重有3款口味嘅Creamy Latte$40，包含有開心果鮮奶，加$5甚至有麻糬粒粒。鴛鴦咖啡由伯爵茶混合咖啡，令咖啡內滲出啖啖甘甜茶香；而開心果鮮奶Latte就有濃濃果仁香氣，表面除咗有開心果粒粒，內裏亦混有開心果香，整體呈淺綠色。