澳門都有死場？國華戲院大舞臺結業再活化風光不再 5層高商場吉舖林立冷冷清清

香港出名遍佈「死場」，即空置率極高嘅商場，或者係丟空後關閉，但無任何發展嘅地方，不時吸引情侶拍拖兩個人探索。原來澳門都有個冷冷清清嘅「死場」，商場來自於一間已結業嘅戲院，樓高5層，但E.A.Two實地探視，發覺雖然已經進行活化，但除咗地面有少量小食店，大部份樓層都係吉舖林立，頂樓戲院更唔隨便開放公眾。商場社交媒體更曾經表示﹕「金錢可以買到金碧輝煌，卻買不到歷史氣息。」

「議事亭前地」同「大三巴牌坊」一帶向來係遊客區，人聲鼎沸，氣氛熱鬧。不過，市中心內原來都隱藏咗一個冷冷清清嘅商場，猶如「死場」！呢個商場係「國華戲院商場」，座落「白馬行2號」，本身係由已結業嘅「國華戲院」活化而成。

而「國華戲院」於1931年開業，屹今其實有93年歷史。開業時曾經播放德國導演劉別謙執導嘅《璇宮艷史》，二戰後香港邵氏亦曾經經營。直到60至70年代，唔單止有播放西片，亦有播放國語片，不過70年代後就變成風月片為主。戲院於1987年一度停業，被收購後演變成戲院及商場，並於90年代重開，曾經擁有過最後嘅光輝。不過，戲院營運不足10年，喺1997年又再次宣佈結業，只係剩返大概100間商場商舖，後來好多商舖亦相繼撤走。

目前，我哋見到嘅「國華戲院商場」已經被改建成商場，好多業權已經被收購，建築物於2018年已重建，依然係澳門唯一被被列為文物保護建築嘅戲院建築物。戲院已被翻新，但係「國華戲院大舞臺」只係用作團體包場等出租用途，公眾一般係唔可以進入參觀。據悉，戲院內本有304個座位俾公眾觀賞電影，數量就大概同文化中心內嘅小劇院相近。

商場其實整體環境本身係類似香港嘅葵涌廣場，業權複雜，只不過並唔非好似葵涌廣場咁熱鬧，同時係比較古舊，又無水電提供。現時，商場只係剩返少數商舖依舊營業，地面一層大多係小食店，例如係奶茶、可麗餅、冷麵、雞蛋仔、夾餅、薄餅、麻辣醬料、果汁等，其實選擇並唔算多。至於1樓至4樓，即小食店同戲院之間嘅樓層，吉舖極多，所以極少人會上行逛街。

至於戲院入口位於4樓，需要徒步上樓梯先可以到達頂樓戲院位置。不過，一般人係唔可以進入，寫明「私人地方、非請勿進」，所以只可以睇到門前嘅壁報板。「即日放映」嘅電影頗為吸睛，包括全盛時期嘅香港電影，例如係許氏兄弟主演嘅《鬼馬雙星》、《半斤八兩》、《天才與白痴》，李小龍主演嘅《精武門》、《龍爭虎鬥》，張曼玉主演嘅《甜蜜蜜》、《花樣年華》，張國榮主演嘅《倩女幽魂》、《東邢西毒》，以及分別由「雙周」周潤發、周星馳主演《賭神》、《和平飯店》、《西遊記之月光寶盒》、《大內密探零零發》、《喜劇之王》等等。