【台中近郊景點】清境農場青青草原步道放眼百隻羊群！親手餵羊、打卡花園城堡

台中近郊景點不少，清境農場係南投縣境內知名旅遊點，唔單止有青青草原，亦有綿羊秀、小瑞士花園，更有天空步道、觀山牧區等，可以拍拖兩個人漫步農場，週邊綠草如茵，又可以一嘗餵吓綿羊。

台灣有3大農場，包括武陵農場、清境農場、福壽山農場，清境農場位於台灣南投縣，係台中近郊景點，海拔約有1750米，被稱為台版阿爾卑斯山。從台中火車站出發自駕，大概1.5小時就可以抵達。

清境農場最出名係可以睇綿羊，但據知最早期大概日治時期時，其實係一個牧牛場，用作放養牛隻。只不過，後來開發為新景點，目前青青草原一帶就係觀光牧場範圍，而且瞬速堀起，從90年代起已經成為一個收費觀光熱點。週邊至今依然有最初嘅山區原住民賽德克族居住，故呢一帶有機會搵到民族風嘅飾品。

草原農場週邊被連綿山景環抱，高山起伏層巒疊嶂，包括賞雪勝地合歡山、能高山、奇萊山，冬天可以經農場上合歡山賞雪。農場四季景色秀麗，藍天白雲底下，草原寬闊，空氣清新，環境恬靜，單單置身清境農場內，景色已足以令人忘卻煩憂。

而清境農場內就有一大片青翠大草原，綠草如茵，一隅又有綿羊城堡！唔單止可以悠閒漫步其中，依園區內草原步道走，亦可觀賞背後山巒景色。山丘之下，附近歐陸風特色民宿，有興趣可以選擇入住，唔需要趕住出返台中市區。青青草原上更有一大群綿羊，牧區內有約幾百隻羊群，不時有綿羊秀，即係小綿羊剃毛表演，而小綿羊亦係遊客必到打卡嘅主角！

牧場內嘅小綿羊非常可愛，遊客係可以近距離接觸一隻隻小綿羊，因牧羊人係會放羊出嚟，然後就可以睇羊群，甚至親手餵食小綿羊。不過，餵食之前，必須要去指定櫃檯購買飼料或牧草，唔可以隨便餵食其他食物，大概TWD20至30就可以買到一份。小綿羊低頭食草，只要將飼料取出，就會有一群小綿羊圍住你團團轉，真係名副其實可以親親綿羊！

E.A.Two當日係從綿羊故事館一端進入清境農場，再徒步向青青草原一帶睇小綿羊，並無上山。事實上，週邊同清境高空觀景步道連接，可以登山，而且係新手都可以走嘅山路，據悉全程大概有1.2公里，唔算太長，但原來已經算係全台最高而最長嘅步道。

清境農場地方偌大，要徒步走完整個園區需要花上頗長時間，一日未必行得完，但其實園區內設有清境農場接駁車，可以來往清境景點，但要留意小瑞士花園並非清境農場門票範圍內，如果要去就要另外購票入場。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 清境農場入場費全票為TWD200，除咗青青草原、綿羊秀，重有清境高空觀景步道、觀山牧區、小瑞士花園可以逛。

❷ 如果從台北出發，可以於台北轉運站轉乘國光客運，經埔里換南投客運，可達松崗、翠峰至清境農場﹐但車程要約5小時，唔太化算。

❸ 若從台中出發，可於臺中火車站乘搭通往埔里嘅南投客運6670、6899，或全航客運6268，到埔里轉運站轉乘前往清境農場站，但只限朝早8點至12點，每班次大概20至30分鐘，只有4班次。而高鐵臺中烏日站都可以乘搭南投客運6670，到埔里轉運站轉乘即可到達清境農場。於埔里轉運站可以乘搭南投客運6658、6659、6664，都可以直達清境農場站，班次只限於朝早6點至下晝4點。

❹ 於臺鐵或高鐵臺中站轉乘「台灣好行」6670A、6670D日月潭線，又或者6670H埔里線，都可以於埔里轉運站轉車，再轉乘「台灣好行」另一條路線6658、6659、6664清境線，最後於清境農場落車即達。

❶ 清境農場設免費停車場，如果無晒車位，可以去附近收費停車場，每次收費TWD200。

❷ 園內禁止攜帶動物入園，避免小動物互相感染。

❸ 園內禁止使用航拍，以免嚇親羊群同影響遊客。