隱身灣仔街頭！富記麵家驚喜港式生牛肉河／清湯腩＋腩汁蘿蔔／自家製墨魚丸

好多人成日話拍拖兩個人搵唔到食乜好，E.A.Two走勻全香港十八區幾千間小店，都依然未能食晒每區香港人餐廳。越式生牛肉湯河食得多，你有無食過港式生牛肉湯河呢？今次前往灣仔街頭一角，當中有一間潮州粉麵店隱身於灣仔中心位置，唔單止有自家製墨魚丸、清湯腩麵，亦有港式生牛肉湯河，店舖距離集成中心不遠，如果乘搭過海車，隨時落車即達！

「富記麵家」位於灣仔道一隅，乘搭過海巴士線直頭可以直達，該店門面並非突出，連頂頭霓虹招牌都壞埋，而且舖頭地方不大，座位亦唔多，只係適合少數人同時進入。室內就似一般港式麵檔，牆上、鏡面都黏滿菜式介紹，廚房外有一個大大隻嘅「麵」字，驚你唔知係賣麵。雖然好似舊式老舖，或者傳統老字號，但其實呢間小店係來自年輕人。

講到店內招牌之作，應該係黑白墨魚丸河$44，包含自家製鮮墨魚丸，重有牛盛薈米粉$62。對上一次，編輯已經曾經食過該店嘅墨魚丸湯河，當時依然係需要食外賣。一碗墨魚丸湯河內，只係得4粒墨魚丸，包括有2粒黑色同2粒白色，size並唔算大粒，只係比陳皮魚蛋大少少，但都係彈牙嘅，而且粒粒有墨魚碎。整個畫面就好似玩圍棋一樣，將4粒墨魚丸排成2乘2嘅狀態，一個棋盤河粉馬上映入眼簾！點解唔直接叫圍棋河粉呢？

除咗墨魚丸河之外，腩麵都係出色嘅地方，一碗清湯牛腩麵$49，私心喜愛係加多碗腩汁蘿蔔$25，由於兩個人都食牛麵，所以加多碗蘿蔔都係剛剛好。店內嘅潮州粉麵係係港式口味，份量適中，牛腩唔單止軟腍，而且夠入味，河粉亦順滑。清湯腩好難做得好，牛腩要出色，湯頭都不容忽視，該店嘅湯頭鹹甜適中，質感香醇，唔會鹹到苦喇喱，亦唔會係味精湯，入口有種清香鮮甜味。而蘿蔔吸盡湯汁精華，絕對係一碗牛麵嘅點睛之筆。

剛才提到越式有生牛肉河，估唔到香港都有地道嘅生牛肉麵$58，將生牛肉配搭河粉，就真係港式生牛肉河啦！眾所週知，打邊爐淥牛肉嘅最佳時間係8秒，「富記麵家」大概就係採用呢個策略，牛肉麵從廚房端出，上檯時依然有少少粉紅色，但淡粉紅色於幾秒後已經變色，生牛肉轉瞬變得熟透，影完相後，正正係牛肉最佳食用時間！難得係牛肉質感軟嫩，比越式較厚，無渣又有牛肉香，只係帶有少少牛脂，入口就似牛頸脊嘅部位，但實際咩部位就唔太清楚，只係覺得生牛肉並非求其揀選，配合同清湯腩同樣嘅湯底亦非常配合。