【台中住宿】打卡網美波波池！葉綠宿．川閱市中心平價旅館、近宮原眼科、設免費停車場

台中平價旅館不少，今次E.A.Two入住嘅係鄰近「台中火車站」嘅旅館，週邊有唔少夜貓設施，室內設備齊全，更有個小型網美波波池可以打卡，拍拖兩個人亦算適宜，但就絕對係女生獨遊或同遊不宜，到底點解？

「葉綠宿-川閱」係一座旅館，毗鄰綠川河畔，室內基本上只係簡約風格設計。旅館係「葉綠宿」品牌旗下分店，於2021年方才開業，係第三間分館，選址「台中火車站」附近，置於「東協商場」範圍內，同時靠近知名景點「宮原眼科」。

旅館週邊其實就好似日治同民國時期嘅老城區，「川閱」都係來自於日治時期嘅綠川「Midori Kawa」，意指同河川共處。而「東協商場」內A棟有分1同2、3，A棟1嘅8至12樓就係「葉綠宿-川閱」旅館範圍，而A棟2至3各層數就有有撞球場、KTV、酒吧、漫畫館等，夜貓必玩！當中，亦有另一間台中單人旅館，商場地下更似一個平價商場。

而旅館電梯12樓就係櫃檯大廳，電梯B3就係地下停車場，電梯1樓亦可直達「東協廣場」。旅館自設停車場，入住客人可以泊車，只要事前同旅館講聲就可以將車輛停到地下停車場。

「葉綠宿-川閱」每層都好似有唔同主題背景牆佈置，當日入住嗰層就係以布藝為主題設計，外面有唔同布藝同衣車擺設，房間入面就配搭布藝主題杯墊，造型又幾別緻。每層都設有免費水機，方便可以隨時自行斟熱水、凍水。

櫃檯大堂一層唔單止有免費洗衣房，亦有個公共空間，提供少量飲品、咖啡餅乾零食。自助茶水檯每日會有唔同自家製飲品，比如係異國香蘋茶、香草菊蜜茶，清晨更有限定經典美式咖啡提供。同一層樓內﹐既設有公共空間同檯櫈，一隅亦有一個小型雲朵波波池，偌大窗戶外望台中市景，波波池迷你得可愛，打卡必到！

旅館總共設有60間房間，設有雙人房、三人房、四人房，有部份房間可望市景，甚至山景。不過，E.A.Two入住嘅係最平嘅雙人房，所以係無窗兼並無任何風景可言。該房間於Agoda更寫明係「無隔音房間」，開頭以為係會聽到火車經過嘅聲音，但原來只係會聽到外面有人行過嘅聲音，間中有少少似隔離啲人玩緊嘅聲，或者係因為該層數鄰近KTV，影響唔太大。

12樓除咗係櫃檯大廳、洗衣房，重有少量客房，而8至11樓則全為客房空間。入住雙人房地方偌大，唔單止有兩張大床，中間有充裕空間。電視櫃都有茶包、咖啡包等提供，呢間應該係兩大一小嘅房間，皆因檯面有三個杯提供使用。而浴室同樣極寬闊，空間十足，浴廁亦分隔開，兩者皆設有門，就算同朋友入住，使用時都好方便。

不過，旅館地下一帶比較複雜，附近就好似東南亞人聚集嘅地方，夜歸時明明唔係單獨行走，都有南亞裔跟蹤撩傾偈，去到旅館下有CCTV嘅地方先至停止，都真係幾倡狂！故此，呢間旅館只適合男女共同入住，但絕對唔適宜女生單獨入住，安全至上！

即睇【葉綠宿．川閱】住宿價錢及限時優惠﹕Agoda｜ Booking.com｜Trip.com｜Expedia｜ Hotel.com｜官網預訂

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 旅館位於「東協廣場」內，從「台中火車站」徒步約6分鐘即達。

❷ 大樓並非只為旅館，上下層都有其他用途，

❸ 櫃檯有梳子、浴帽、棉花棒、耳塞、刮鬍刀、潤絲精提供，亦可以借用洗衣袋、燙斗、餐具、充電線、行李秤、針線包、檯燈等。房間內就只有即棄牙刷、牙膏提供。

❹ 匙卡只有一張，所以謹記要好好保管！