荔枝角D2 Place新開、番茄師兄姊妹店！牛脷芯係限量推出？米青百搭港式野菜蛋包飯 x 和牛漢堡／黑毛豬／龍脷柳

近年，香港唔少小店都因經濟問題忍唔住結業，但依然有部份小店於逆市中開新店。「番茄師兄」係以蕃茄湯麵為人熟悉嘅小店，近月就於荔枝角開設姊妹店，反而以港式蛋包飯為主打，份量頗合理，主題色就由受歡迎嘅蕃茄紅色，變成養眼嘅青翠綠色，可以拍拖兩個人一試。

荔枝角D2 Place本身就有「番茄師兄」分店，該店近月就於同一商場開設姊妹店，只係唔同期數。該新店以「米青蛋包飯專門店」為題，主打就係港式蛋包飯，店內寫有歌曲《別來無恙》嘅一句歌詞點題﹕「我現時自己肯做飯」。其實「番茄師兄」本身係有蛋包飯可以選擇，尤其係荔枝角分店，但每次入「番茄師兄」，都係為咗蕃茄湯，蛋包飯真係有啲缺乏吸引力，難以搶fo。唔通係因為大部份人都只會挑選蕃茄湯，所以店家索性開設姊妹店主打蛋包飯，等大家留意其蛋包飯作品？

店內嘅蛋包飯份量不少，都算係港式碟頭飯咁大碟，真係可以拍拖兩個人醫吓肚！蛋包飯口味偏向港式風格，大概係因為為港人而設，而賣相亦色彩豐富，除咗配上肉類，亦配搭蔬菜，都算係港式野菜蛋包飯。而蛋包飯同時配有多款醬汁，其中有一款係招牌咖喱汁，入口係偏向港式口味，感覺似食緊唔辣嘅咖喱魚蛋。

該店嘅招牌作應該係厚切牛脷芯$96，除咗單點亦可以選擇雙拼厚切牛脷芯配100%和牛漢堡扒$128、厚切牛脷芯配蘑菇和牛免治牛脷肉醬$116。不過，編輯去咗兩次，都係係唔到牛脷芯，一次係下午茶時段，另一次就係午餐時段。所以，估計牛脷芯係限量供應，並非經常出現。另外，值得一讚係員工好勤力，好快睇到客人用餐完畢，主動將餐盤回收，雖則呢個做法好容易令其他客人覺得係另類趕客方式，但我哋覺得快手快腳其實係正面嘅。

蛋包飯就好似車仔麵檔嘅點餐方式，可以自由配搭，包括餸菜、醬汁、配料、小食、飲品。「米青」嘅蛋包飯配搭頗多，最特別係每一份蛋包飯都係配搭蔬菜，既可以令賣相顏色豐富，亦可以更健康，野菜包括有甘筍、粟米、車厘茄、翠玉瓜等。而部份主食配搭都算有驚喜，驚嘅係行入兩次都食唔到牛脷芯，喜係其他選擇其實都係幾有水準。套餐可以免費選擇茶品，例如凍頂烏龍冷萃茶、四季春冷萃茶，水準基本上同「番茄師兄」差唔多。

平均嚟講價錢係偏高，只係份量上算平衡。鹹蛋西班牙黑毛豬肉餅$88，加$12配日式醬汁菜飯，今次挑選洋蔥牛肉汁，再加$14小食唐揚炸雞塊2件，合計為$110。而100%純和牛漢堡扒配洋蔥騸牯牛柳絲雙拼價為$114，可以免費配白飯，呢款就挑選招牌米青咖喱汁。據悉，該店嘅咖喱汁來自日式同泰式咖喱，再加入魚露調味，不過出嚟效果就似港式咖喱口味，只係唔係有辛辣感。反而，本來以為平平無奇嘅洋蔥牛肉汁就有啲意外驚喜，與蛋包飯似乎配合得恰到好處，似洋蔥牛肉飯。