中環巷弄隱密酒吧Brick by Brick賣馬拉菜？藥材砂煲肉骨茶／叻沙湯麵套餐人均$2XX

中環蘇豪區向來以酒吧為主，餐廳價格大多數都係比較高，想要拍拖兩個人搵間餐廳小店都唔容易。今次E.A.Two就發現一間位處巷弄之間嘅酒吧，最意外係主打竟然唔係西餐之類，而係馬拉菜！

位處中環蘇豪區嘅「Brick by Brick」，原來至今已開業4年左右，雖則餐廳地址寫明係座落中環「史丹頓街」，但其實入口處並非喺嗰條街，若然走到「史丹頓街」，保證你搵唔到入口！因為該餐廳入口頗為隱密，大門口係位於後面俊榮里小巷內。

店內餐牌簡單，除非想單點，否則基本上就只有兩款兩個人套餐，都係包括2款主食、1款小食、2杯特飲或升級酒類飲品。紅色餐牌係特級二人晚市套餐$556，價格上較高，食材當然稍有不同；而綠色餐牌就係人氣招牌二人晚市套餐$476，價錢上就較低。對於比較窮嘅E.A.Two嚟講，就選擇咗平啲嘅綠色餐牌。

當以為酒吧通常都係賣西餐之類菜式，呢間酒吧竟然主打馬來西亞菜，類似一間中環Fusion酒吧。一望而知餐牌最大特色係招牌秘製馬來西亞咖喱喇沙麵、肉骨茶，因為紅色餐牌同綠色餐牌都有養生藥材砂煲肉骨茶。而紅色主食另有招牌喇沙烤雞半份，或加$30玫瑰酒煮卜卜大蜆配蒜蓉包；綠色主食另有咖喱叻沙湯麵，可以選鱻魚三寶、雞絲扎肉、惹味肥牛堆，或者加$30珍寶大蜆拼海蝦。

雖然叻沙係配上珍寶大蜆拼海蝦，但只係得兩隻雪藏蝦同兩隻連殼蜆肉﹐麵條亦得米粉，並非摻摻。不過蝦肉、蜆肉都係爽口，只係湯底唔係有濃稠椰漿味，比較稀身，味道偏淡。反而肉骨茶先係比較有驚喜嘅一款菜式，肉骨茶以熱焫焫砂煲盛載，上檯滾燙，肉骨茶配搭白飯、油條等﹐而肉骨都係啖啖肉。肉骨茶湯底濃郁，內有藥材香味，甜味中滲出甘味，感覺頗為滋補。

小食就唔一樣，紅色餐牌有迷你小食拼盤、和風柚子冰山蚌刺身沙律、南蠻炸雞、泰式酸辣無骨鳳爪；綠色餐牌就有日式海藻沙律、泰式酸辣無骨鳳爪、日本三得利黑啤雞翼、脆炸梅子一口雞。今次就只係選擇咗日本三得利黑啤雞翼，醬汁頗香濃，鹹中有甜，真係有少少啤酒嘅甘香味，醬汁配搭雞翼好似特別容易入味。

二人套餐包含兩杯$72以下飲品，如果另加$25可飲生啤，加$28更有本地手工支裝啤酒，加$35甚至有Beertails或House Wine。而無酒精飲品就有菠蘿海燕窩海鹽梳打$76、泰式香茅斑蘭葉薑茶$68，桔仔話梅梳打$72，如果唔怕話梅味，可以試試桔仔話梅梳打。當中，泰式香茅斑蘭葉薑茶無乜太大特別，杯入面除咗液體就乜都無，斑蘭味蓋過所有味，連香茅味都比較少。反而菠蘿海燕窩海鹽梳打就比較特別，雖則菠蘿只係罐頭菠蘿，但海燕窩就係比較少見嘅原材料，屬一種深海藻類，既有豐富纖維，亦可以解渴，感覺清爽。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式接受Visa、Master、現金、八達通、AE、Apple Pay、Google Pay。

❷ 店內有加一服務費。Happy Hour時間為18:00-20:00，限星期一至四，4杯House Wine $228（Daily After 20:00）。

❸ 該店同時係酒吧模式，有提供酒類。餐牌後面同時有賣急凍包，包括肉骨茶、咖喱叻沙湯等。

❹ 建議6、7點去，人流會比較少。