分店結業！和平飯店上海菜館2024年底僅剩1間！假日限定下午茶優惠、即睇指定時間！

以滬京川菜為主打嘅「和平飯店」，近月宣佈南昌V City分店因租約期滿而結業，昔日連鎖上海菜館已經只係剩返油塘大本營分店。如果想拍拖兩個人舒舒服服坐低食上海菜，去酒樓飲吓茶，就要去油塘區啦！

「和平飯店」於2007年創立，至今有17年歷史，餐廳來自於黃傑龍先生旗下嘅敘福樓集團，即係與「牛角」系列、「牛涮鍋」、「温野菜」、「THE MATCHA TOKYO」、「好呷台灣火鍋」、「永華日常」屬同一個背景。

該店一般設有午市同晚市，午市就似平時酒樓飲茶一樣，而晚市就有唔少二人、三人、四人等套餐可以選擇，菜式都係以上海菜、四川菜、北京菜為主打。而當中有假日下午茶﹐全單低至75折，而且指定時間僅限1.5小時，優惠可享用嘅時間為14:00至15:30。假日下午茶包含有前菜、點心、甜品，每款都比原價平近$10，大多數平均平咗約$9。如果叫5至6款點心，就平咗大概$50！

「和平飯店」最受歡迎嘅點心要選不等你小籠包、四川擔擔麵、雞絲粉皮、高力豆沙、上海粗炒、話梅骨、和味燻魚、豆沙窩餅等。今次編輯於下午茶就只揀咗5款點心，其中有兩款特別驚喜！

不等你小籠包原價$48／4件，特價$36／4件，小籠包表皮厚薄適中，唔會容易桔穿，亦唔會太厚實，內裏豬肉鮮嫩，湯汁溢出，直頭有爆汁感覺，蘸上少量淅醋更可以提鮮，呢一款招牌點心的確幾年都無退步。而生煎牛肉餅原價$50／3件，特價$38／3件，即係麵包夾洋蔥免治牛肉餡，肉質腍滑，混有洋蔥香，就似生煎包，麵包外面都煎得金黃香口。

酸辣湯餛飩原價$55／4件，特價$41／4件，份量頗多，大概可以盛載3至4個小碗，餛飩頗大隻，餡料紮實，酸辣湯亦有層次，酸中有辣﹐但辣味唔多，容易入口。最新甜品有脆炸雙皮奶，原價$36，待價$27，諗清楚其實咪即係炸鮮奶！而高力豆沙，原價$50／3件，特價$38／3件，都係店內頗受歡迎嘅甜品。

最有驚喜嘅係以下兩款小吃，一款係花雕醉雞，原價$76，特價$57，雞肉軟腍入味，滲透花雕酒香氣，醉雞同時滲出藥材香，顯然花雕酒內混有藥材味，而酒味其實並唔係太多，反而同藥材味平均分配。至於另一款就係梁溪脆鱔，原價$96，特價$72，鱔魚切成一絲絲，再炸到脆卜卜，比薯片更香脆，直頭係吱吱作響﹐炸鱔表面再以醬汁包裹。醬汁酸酸甜甜，頗開胃，感覺有啲似話梅骨定糖醋魚咁。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 南昌V Walk分店已經結業，所以目前「和平飯店」僅剩油塘大本營分店。

❷ 最後落單時間為﹕午市15:30、晚市21:45。

❸ 付款方式接受Visa、Master、現金、八達通、AE、銀聯、Apple Pay、Google Pay。另收加一服務費。

❹ 該店接受電話訂座。成為「KABU PASS」會員可以有更多優惠。