【台中景點】毗連清水高美重要生態保育濕地！全新高美燈塔園區開放、紅白燈塔連旅宿！

台中「高美濕地」係聞名中外嘅知名景點，亦係一個野生動物保護區，擁有天然資源，適合拍拖兩個人散步。近月，有關當局將一座超過50年歷史嘅燈塔發展成「高美燈塔園區」，更設有旅宿空間，參觀「高美濕地」時，更可以入住從員工宿舍改建而成嘅合法民宿，據悉入住客人甚至可以進入「高美燈塔」最高點？

「高美濕地」以「天空之鏡」及日落靚景而為人熟悉，早早就成為國際級景點，吸引唔少遊客前往參觀。事實上，座落清水區大甲溪出海口嘅「高美濕地」，前身係「高美海水浴場」，現時面積依然有701.3公頃，地方偌大。「高美濕地」顧名思議就係一片超大濕地，同時係野生動物保護區，當中包括超過120種鳥類棲息，亦有少數幾處雁鴨集體繁殖，故「高美濕地」都係一條觀鳥路線。

由於前身係海水浴場，所以「高美濕地」有大量泥沙堆積，最終令沙灘遊客大幅減少，有關當局後來先至將沙灘改為「高美濕地」，造就生態資源豐富嘅地方。目前，「高美濕地」係泥質、沙質灘地，加上與河口沼澤融合，令天然濕地孕育更多生物。除咗候鳥類，更有蟹類、魚類、貝類，甚至無脊椎類，以及植物類等，比如係招潮蟹、彈塗魚，單單鳥類就有34科135種，遊人更可以下行至木棧道上近距離觀賞生態風貌。

「高美濕地」木棧道呈S形，全長有約690米，彎彎曲曲，中途雖然唔可以隨便下泥灘，但盡頭就有一個位可以下行至泥灘，唔少在地人都親親大自然。呢道木棧道唔單止係下瞰生態路線，同時係黃昏觀賞夕陽西下嘅好地方，對面更可眺望風力發電機小風車群，蔚藍天空與風車結合，構成被譽為「世界7大天空之鏡」畫面，非常浪漫！只要timing準確，走到另一端風車長堤、景觀橋，都係觀賞晚霞之處，IG打卡必到！

濕地既係來自日治時期嘅沙灘，現時棲息地眾多，包括沙地、草澤、泥灘、低潮區等。濕地一隅嘅「高美燈塔」同樣係歷史悠久嘅地方，燈塔設於民國56年，即1967年，至今原來已經有超過50年歷史！2024年初，有關當局將紅白色標誌燈塔改建成「高美燈塔園區」，從「高美濕地」徒步至燈塔園區只需約1至2分鐘！燈塔園區地方不大，卻設有全台唯一燈塔民宿，可讓遊人預訂入住，想要試吓就記得上網book定啦！

「高美燈塔園區」中央保留該紅白相間嘅八角形燈塔，週邊則設有小商店、民宿房間，而該燈塔民宿就由「小鹿文娛旅宿集團」經營改造。據悉，入住客人係可以進入燈塔內，穿過旋轉樓梯直達頂樓，再到塔頂觀景，而呢個參觀行程只限入住旅宿嘅客人。E.A.Two當日未有入住旅宿，故此未能進入燈塔頂居高臨下觀賞「高美濕地」風景。

紅白色相間燈塔非常搶眼，塔身樓高12層，有約34.4米高，本身係彌補返桃園白沙岬燈塔、澎湖群島北端目斗嶼燈塔之間海域嘅缺失。呢座「高美燈塔」其實於1982年已停用，近年先至改建為園，並於2024年開放。塔頂唔單止可以放眼生態區，亦可以俯瞰遊人徒步區，以至「高美濕地」全景！至於燈塔旅宿，以雙人房、四人房、家庭房為主，每晚價格約HKD329，兩個人入住人址僅約HKD160，CP值不低！

「高美燈塔園區」唔單止有民宿體驗，週邊都有少量小商台，例如甜點區、手作吐司店、冰淇淋店等，大部份都以「海」為主題。今次就試吓當中一間與台中海線「海線少女」虛擬人物合作嘅手工冰淇淋店，而海線少女團隊就來自於台中青年團隊，以在地生產冰淇淋店為主打，口味眾多，包括實試嘅開心果味及芫荽味，雪糕唔會好快溶化，無論開心果味定芫荽味都好重。

即睇【高美燈塔園區 (Gaomei Lighthouse)】住宿價錢及限時優惠﹕Agoda｜ Booking.com｜官網預訂

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 遊客中心旁設有偌大停車場及公廁，可以徒步至觀景台、步道，停車場收費為每架車TWD50／次。從「台中火車站」一帶出發，自駕前往「高美濕地」需時就大概係45分鐘，需經國道1號或3號﹐再轉台61線快速公路。

❷ 乘搭臺鐵至「清水火車站」，轉乘臺中市公車，178、179都可以前往「高美濕地站」；而客運688路公車就只限假日行駛，公車會於「高美濕地遊客中心停車，徒步約1公里就會去到高美濕地木棧道。另外，都可以從「台中火車站」出發，直接乘搭309路公車，直達「高美濕地」，需時約1小時。公車站設於高美濕地入口旁邊。

❸ 前往高美濕地之前，最好先到官網查詢木棧道開放時間，以及日落、潮汐時間，以免白行一趟。木棧道正常開放時間為08:00-18:00，因應每日潮汐時間可能會有所不同，若漲潮有機會暫時關閉，大潮前後各有1.5小時需要關閉，前後大概關閉3至4小時，完全退潮就會重開。

❹ 「高美濕地」一帶可以踩單車，沿途有自行車道，但謹記要做足防曬同補水。「高美濕地遊客中心」設有生態導覽解說服務，但需要事前致電預約。高美野生動物保護區步道其中有管制區，謹記唔好亂走或擅闖管制區，因為依規定可處新台幣5萬元以上到25萬元以下罰鍰。