【台中夜市】捷運台鐵直達！隱藏在地人大慶夜市13款美食旅程！黃金豆乳雞／蔥油餅／火烤魚／古法滷味／木瓜牛乳

台中有唔少知名夜市，如果要選最印象難忘而又最少遊客認知嘅夜市，E.A.Two首選「大慶夜市」！呢個夜市地方偌大，選擇眾多，全部並無重複，而且水準極高。既係在地人必到嘅夜市，亦係無遊客嘅台中夜市，至少走幾個圈都聽唔到一句廣東話或普通話，只聽到台灣中文！

前往「大慶夜市」，現時唔單止可以經台鐵「大慶火車站」，而捷運都已經開通，所以都可以經台中捷運至「大慶站」前往，交通更方便！只需徒步約10分鐘，就可以直接抵達夜市門口。甫踏入夜市，最先映入眼簾嘅除咗一片大旗海，重有右邊嘅機車停車場！從呢個機車爆滿畫面可以得知，「大慶夜市」有幾受在地人歡迎。

平常好多台中夜市都無每日開放，又或者只有一兩天唔營業，而「大慶夜市」目前每個星期只有一半時間營業！如果想要前往「大慶夜市」，謹記要留意營業日子同時間呀！

大慶夜市美食（1）﹕一也黃金豆乳雞

講到「大慶夜市」最印象難忘而又高人氣嘅小吃選擇，首選係「一也黃金豆乳雞」，而下面其他選擇就係排名不分先後。「一也黃金豆乳雞」以金黃色嘅酥炸黃金雞為主打，包含有雞翅TWD25、雞丁TWD60至110、七里香TWD30、薯餅TWD30，台灣連脖子TWD20都有！

其中，招牌雞翅每支TWD25，一次過買5支就賣TWD100。所有炸雞都係即叫即炸，入口熱焫焫，炸雞唔會好重豆乳味，豆乳味份量恰好，香口惹味。從現場真實銷售情況可見，炸雞翼反而比一般豆乳雞丁賣得更好！事實上，炸雞翼同樣係以豆乳醃製，所以都係滲出淡淡豆乳香味。

大慶夜市美食（2）﹕何佳佳手工蔥油餅

近夜市大門口嘅「何佳佳手工蔥油餅」，同「一也黃金豆乳雞」一樣，都吸引唔少在地人，攤檔前一直大排長龍。一份只係TWD30，全張就賣TWD100，連半張都有得賣，半張只係TWD50，塊塊即叫即煎。

大慶夜市美食（3）﹕古一滷老師傅滷總舖

近大馬路一邊，有一間頗受在地人歡迎嘅地攤，多人排隊到唔想排隊等候。呢間「古一滷老師傅滷總舖」，顧名思議係以滷味為主，以中藥滷製小吃，以傳統工法新鮮現做滷味，滷汁色調濃郁。滷味小吃有QQ鳥蛋、手工豆平、麻油鴨、米血、雞腱等。

大慶夜市美食（4）﹕小日腸

「大慶夜市」不時有新開業小攤，當日有間「小日腸」新開，更有新張優惠。該店以知名小吃大腸包小腸為主，一條賣TWD70，而分開賣都有，「小腸」古早味香腸賣TWD40、「大腸」花生糯米腸就賣TWD40。

大慶夜市美食（5）﹕電話亭無骨排骨酥

排骨酥本身一種充滿台灣味嘅小吃，都係「大慶夜市」內嘅人氣檔攤之一。無骨排骨酥就係一種炸得香口酥脆嘅小食，靠近大馬路同大門口嘅「電話亭無骨排骨酥」就係一個選擇。

大慶夜市美食（6）﹕楊記老潼關肉夾饃

另外，夜市內有間「楊記老潼關肉夾饃」，都係甚受在地人歡迎嘅選擇，小攤外不時有排隊大潮。香港人對於肉夾饃其實唔太熟悉，而台式肉夾饃其實就好似上下夾層嘅麵粉夾住中間嗰層肉。面層係酥脆，但就可能會較厚，而入面就包滿肉餡。

大慶夜市美食（7）﹕輝常美食

夜市內美食選擇眾多，而中間就有幾個平地空間，多數都擺放咗好多矮檯櫈，可以畀食客坐低慢慢食，唔需要企定定掃街。其中一間係「輝常美食」，以藥膳排骨、當歸土虱、麻油雞、瓜仔肉飯等為主。

大慶夜市美食（8）﹕塔莉班沙威瑪

沙威瑪已經係比較少地方有得賣嘅小吃，而「大慶夜市」內竟然有得賣沙威瑪，呢間「塔莉班沙威瑪」就位於近大馬路位置。從店名都可以睇得出係來自於中東菜式，以肉類製作，將羊肉切片之後，再砌成錐形，再轉旋放喺烤肉架上烤製，只係一種阿拉伯小食。

大慶夜市美食（9）﹕蔡記火烤魚

剛才提到「大慶夜市」中間有一大片空地，擺放好多矮檯櫈，另一間就有「蔡記火烤魚」。該店以烤海鮮為主，包含有鹽烤台灣魚，中份賣TWD270，另川燙鮮蚵仔TWD150、乾燒烤白蝦TWD100、乾燒大蛤蜊TWD100、鮮味蛤蜊湯TWD100等。

全條烤魚折合港幣大概係HKD60至70，只係以簡單鹽烤調味，魚皮鹽份頗多，會比較鹹。夾開魚皮之後，魚肉味道就反而剛剛好，有鹽烤嘅香味，魚肉亦軟嫩。

大慶夜市美食（10）﹕雪霸豐仁冰

喺夜市食得多鹹食，都會核飲吓嘢食吓甜點，其中「雪霸豐仁冰」就係賣台式飲料，包括香檳牛奶、香檳汽水、芋頭牛奶、紅豆牛奶等。

大慶夜市美食（11）﹕高北牛乳大王

另一間頗受歡迎嘅飲料店係「高北牛乳大王」，當中包括木瓜牛乳TWD60、香蕉牛乳TWD55、愛文芒果牛乳TWD70、牛油果布丁牛乳TWD70等水果口味，加TWD20重可以加多份牛乳濃度呢！其中，芒果牛乳即芒果牛奶，由於攪勻咗，所以芒果同牛奶融合，入口係綿綿質感，有牛奶味中滲出芒果香甜味。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 現時乘搭捷運或台鐵，於「大慶車站」落車，徒步約10分鐘即達夜市門口。

❷ 夜市位於建國南路與東興路口，自駕可以到旁邊停車場，機車停車場喺夜市內，普通停車場就喺旁邊。

❸ 夜市基本上都只接受現金或line pay作支付方式。

❹ 大慶夜市地方偌大，選擇眾多，而且大致上係無重複，所以可以先走一圈，再諗最想食邊幾間。