【台中地標】地牢有美食廣場！大魯閣新時代購物商場連保齡球／棒壘球打擊場

去旅行遇著落雨點算好呢？去台中旅行唔需要擔心，市內有唔少室內好去處，其中台中火車站旁邊有一個大型商場「大魯閣新時代購物商場」。如果拍拖兩個人遇下雨天，可以走入商場內，上面有保齡球場、棒壘球打擊場，中間有條空中飛梯。而地牢就有一個大型美食廣場、家樂福超市，美食廣場選擇不少，內有唔少平價台式餐廳。

「大魯閣新時代購物中心（TAROKO MALL）」毗鄰台中火車站，前身係德安購物中心，商場於2015年開業，地面以上有11層樓，商舖林立，包括ABC Mart、Uniqlo、Daiso、2nd Street、Poya、Nitori、威秀影城、健身工廠、Roller186滑輪場等。地下有6層中有4層係停車場，揸車去都有大量車位。有2層就係商舖同家樂福超市，有1層就係美食廣場。

甫踏入商場，中間一條大型滑梯馬上映入眼簾，原來商場有一條滑梯連接2樓、3樓至地下！呢條滑梯叫做「空中飛梯」，僅星期六、日下晝1點至夜晚9點開放，拍拖情侶可以玩，親子家庭更適合玩。最特別嘅地方係既可以憑消費玩，亦可以直接購票入場，2樓同3樓出發價格唔同，每次分別係TWD60、TWD90，普通人都可以現場購票，以「曼麗卡友」購票就會平TWD20至TWD30。

此外，商場內重有好多玩樂場所，唔單止有「空中飛梯」，更有大魯閣棒壘球打擊場、保齡球館、CocoBar迷你KTV、遊戲愛樂園等。棒壘球打擊場以代幣為主，人均約TWD1499至TWD1799。打保齡人均TWD300有7個token，入會一般球局TWD140、租鞋TWD30；如果入會，會員費TWD300、場租費TWD1000／30枚token，真係玩樂新地標！

走到商場B1層，唔單止可以進入「家樂福」超市，全層更加係「大魯閣美食廣場，間間食肆價格相宜，連在地人都會去搵食。通常地牢美食廣場都係帶畀人殘殘舊舊嘅感覺，但台中「大魯閣」就以網美粉色系為主調，加上地方偌大，用餐環境舒適，令呢條地下食街更吸睛。

地下食街美食眾多，既有連鎖店，亦有地道食店，唔單止有「麥當勞」、「丸亀製麵」、「繼光香香雞」、「定食8」、「Mister Donut」、「Coco都可」、「鮮茶道」、「One&One燒肉」，亦包括「hot7鐵板燒」、「這一小鍋」、主打烤雞嘅「21 Plus」、主打炸雞嘅「頂呱呱」、「牧上麵包」，亦有主打鍋貼同水餃嘅「盛煎」、「尖牙義式廚房」、「想想咖喱」、「食待嗑」、「KATZ卡司韓石米拌」、「松賀木桶燒飯」、「三商巧福」、「蓋厚呷」、「廟東清水排骨麵」、「正海城酸菜白肉鍋」、「酸奶先森」、「Cold Stone Creamery」。

美食廣場嘅好處就係可以同一時間食唔同餐廳，就算兩個人有唔同口味，都可以買唔同菜式。今次試咗3間食肆，除咗「繼光香香雞」人手較少，職員要一個人一腳踢，等候時間較長，其他基本上唔需要等太耐。一份香香炸雞賣TWD95至TWD145，炸雞即叫即炸，所以都係入口香脆可口。

另一間係「廟東清水排骨麵」，排骨湯麵套餐TWD170，可以選燙青菜或私房小碟，麵條可以揀米粉、板條或冬粉，其中有款小碟係醬汁雞爪，醬汁頗濃稠。排骨湯又幾濃，有鮮甜同香醇感，麵條亦算彈牙，口感唔差，湯麵內有豆芽作拌菜。而排骨酥就係炸起排骨放湯麵之上，都係有酥香。

重有一間係「三商功福」原汁牛肉麵，套餐配搭韓式泡菜、中杯飲料，原來汽水重可以任斟！牛肉麵低至TWD189，半筋半肉牛肉麵TWD199，麵條更寫明係自家製作，重有酸菜同豆干小碟。牛肉麵雖然只係美食廣場內，但水準亦不俗，牛肉都好軟腍。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭高鐵至「高鐵烏日站」，轉乘台鐵至「台中火車站」，徒步約5分鐘即達「大魯閣新時代」。

❷ 商場可以停車，星期一至五每小時TWD40元，星期六及日每小時TWD50。不過，消費滿TWD500可以抵1小時，滿TWD1000可抵2小時，而TWD2000就可抵3小時，而TWD3000元就可抵4小時，TWD4000可抵5小時，至於TWD5000則可抵6小時，最多可以抵5至6小時，TWD10000就可以免費泊車。

❸ 保齡球館保齡球平日球局收費﹕https://trk-sport.com/2Kjpa，假日球局收費﹕https://trk-sport.com/HwFBQ。

❹ 美食街並無用餐時間限制。