【台中新景點】近動漫彩繪巷！日治時期武術道館搖身變國家漫畫博物館、打卡童趣浴場

台中市中心一帶聚集唔少知名景點，唔單止有「宮原眼科」、「審計新村」、「國立台灣美術館」、「臺中公園」、「秋紅谷」等，其中鄰近「台中第五市場」嘅「動漫彩繪巷」就係拍拖兩個人打卡必到嘅冷巷！而距離「動漫彩繪巷」不遠處，有一個全新景點，由日治時期武術建築物演變而成嘅「國家漫畫博物館」，喜愛動漫嘅朋友絕對不能錯過！

台中動漫彩繪巷

位於台中市區嘅「台中動漫彩繪巷」，近年一直都係著名打卡景點，雖則只係得一道大概100幾嘅小巷，但整道小巷美侖美奐，活力十足，IG打卡度唔輸蝕於台中彩繪村始祖「彩虹眷村」！

「動漫彩繪巷」毗鄰柳片河畔，距「台中第五市場」亦只有5分鐘步程，整道小巷以將動漫人物繪於牆壁上為主，幅幅栩栩如生，畫風細緻，恍如將原作還原！事實上，該冷巷最初只係來自於日本動漫《海賊王》，由附近機車行老細起筆，目的純粹唔想小巷空盪盪。後來，小巷牆壁內嘅動漫角色愈畫愈多，唔單止引起在地人注目，連外地遊客都慕名而至。

現時，牆壁上已經滿佈眾多動漫角色，但就以日本動漫題材為主打，皆為唔少人嘅童年回憶﹐角色繪畫得相當逼真，令各原著情節都馬上歷歷在目，真係一秒走到二次元動漫世界，亦係各位中二病患者必定喜愛嘅地方！

小巷內既有《SPY Family》、《一拳超人》、《Mario兄弟》、《美少女戰士》、《櫻桃小丸子》、《IQ博士》、《七龍珠》、《名偵探柯南》、《老夫子》《灌籃高手》、《火影忍者》、《龍貓》、《我們這一家》、《寵物小精靈》、《海棉寶寶》、《我的英雄學院》、《winner the pooh》、《哈姆太郎》、《蠟筆小新》、《加菲貓》、《Love Live》、《小魔女Do Re Mi》、《街霸》等卡通公仔，盡頭更有1:1嘅《海賊王》主角雕塑像！無論你係香港人定台灣人，必然對呢啲角色有共同回憶！

動漫迷除咗要去「動漫彩繪巷」之外，其實近月重有一處必到景點，皆因有一個漫博物館全新開放，室外係日治時期武道館建築，室內就搖身變成漫畫博物館，各位動漫迷必定要去朝聖。

臺中刑務所演武場／道禾六藝文化館／國家漫畫博物館NTMC

「國家漫畫博物館」係台中全新景點，建築物充滿日式風格，就似昭和感老宅。博物館地方偌大，同時滲出文青風，室內以漫畫為主，更設有8大主題展，建議走完「動漫彩繪巷」後，再參觀呢個國漫館！

事實上，該博物館本來係來自於日治時期，係武術道館式建築物，名為「臺中刑務所演武場」，用作臺中刑務所司獄官練武用途。由1937年起屹立至今，曾經係台中監獄，後來成為「道禾六藝文化館」。直到前年底，該館停止營運之後，有關當局先至將呢座建築物再改建，最後演變成「國家漫畫博物館」園區，於2024年先至正式重新開放。

「臺中刑務所演武場」來自於日治時期，可以追塑至昭和12年，歷史有超過130年。主館係和洋折衷風格，作為劍道場、柔道場用途，而園區唔單止有13個展館，亦有老榕樹下劇場等，全部都係日式木建築，壁柱、屋頂裝飾都係舊建築嚟，更結合日式庭院元素，將本來嘅特色完好保留，恍如走入小京都園區！

進入園區，會發現當中有13座相近嘅建築物，每幢旁邊都有豎立指示牌，如果唔清楚點遊覽，可以依1至13號順序而走。例如1號館就係最早期「臺中刑務所演武場」所在地，現時就係漫畫展覽「臺漫的魔幻時刻」；2號館就係演武場附屬設施，變成需要預約進場嘅「圖像味移－峰味＆風味」；而3號館同樣係演武場附屬設施，但就可以進入，現時係「林森路33號租書店」，有唔少日漫經典之餘，亦有台漫推薦作品，可以免費全睇！

至於4號館原先其實係宿舍，歷史名追塑至昭和時期，目前係「現地創作」展館；5號館就係打卡必到嘅「臺中刑務所浴場」，走入室內必須要先除鞋，入面以「泡漫畫」為主打，室內分男女浴池設計，還原舊時日式澡堂，浴場充滿童趣，入場參觀可以有偽公共澡堂體驗！而6號館、7號館、8號館同4號館一樣係宿舍，但就分別係戰後時期、大正時期嘅宿舍，同樣用作展館用途，6號館以「漫流來襲、貓貓蟲咖波」為題，7號館就係「Hostel Name Shop」，8號館就以「Hostel Name Hostel + Library」為題。

園區內展館眾多，9號館雖然都係昭和時期宿舍，但就係一個休息處，被餐廳「吳甜」、「喫茶．花覓」所進駐，分別於園區內售賣雪糕、和菓子；10號館目前則為籌備基地，但本來都係戰後時期宿舍。而11號館、12號館都係大正時期宿舍，目前都係漫畫展覽用途，11號館係「阿甘與阿諾－從漫畫、動畫到故事屋」，12號館就係「時代封面－臺灣漫畫雜誌流行回顧」、「新書畫廊」，同時有間主打日式拉麵嘅「甲拉麵」進駐該館。

最後係13號館，原本係「臺中刑務所典獄宿舍」，現時係「當臺漫成為光譜－臺日動漫美學特展」。另外，重有i館同S館，分別係服務中心「漫拍機」同主題特展館「職人魂．臺漫Alive」。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭台鐵或客運至「台中火車站」，轉搭51號／25號公車，於「林森三民路口站」／「忠信國小(柳川東路)站」，徒步約5分鐘即達「動漫彩繪巷」。而轉乘55號就可以於「地方法院站」落車，徒步約5分鐘即達「臺中刑務所演武場」。如果自駕前往，可以於將車輛停泊於「自治街停車場」，地址為自治街51號。

❷ 「臺中刑務所演武場」即係「國家漫畫博物館」，簡稱「國漫館」。如果要拍攝婚紗、COSPLAY、商業攝影，會酌量收取場地清潔費，需要事前致電預約。

❸ 兩個地方都唔需要門票進入參觀。兩個景點相距僅約10分鐘步程。

❹ 「動漫彩繪巷」近天成機車行，位於旁邊小巷內。