逾30年大埔名物魚肉燒賣／家鄉粉果！粉果佬冬菇亭起家、傳統味道似舊式擔挑賣粉果！

早前大埔區自發推出「大埔勁賞Fun」優惠，由「大埔為食友」群組發起活動，聚集52間小店，令我哋區外人都能夠拍拖兩個人有更多選擇。今次E.A.Two一次過走過4間小店，其中一間係於大埔歷史悠久嘅小食店，唔單止魚肉燒賣受到歡迎，最特別嘅係有而家好難再搵到嘅舊式粉果！

延伸閱讀﹕大埔為食友聯乘52小店推「大埔勁賞Fun」優惠！食店低至8折／第二份半價、訂座送鵝肝多士／每人一隻生蠔

位於大埔昌運中心地下嘅「粉果佬」，正對十字路口，既參加大埔小店活動，近年獲得「TimeOut Hong Kong 2024」推薦小店。該店本身其實係來自於舊式冬菇亭，屹今有超過30年歷史，搬完又搬，依然係大埔名物，受到街坊歡迎，更加係學生哥喜愛嘅小食店。

如果唔做資料搜集，真係唔知道原來「粉果佬」本身係一間經常大排長龍嘅排隊店，甚至曾一度吸引網紅同Youtuber去朝聖吸Like，不過源頭我哋就唔太清楚啦。但今次E.A.Two前往「粉果佬」，竟然唔多覺有排長龍嘅情況，所以幾乎即刻買到。「粉果佬」雖然曾經於觀塘開設分店，但目前就只剩低大埔店。

該店已經由大埔廣福邨「燒賣佬」變成目前嘅大埔昌運「粉果佬」，主打嘅依然係燒賣，只係表面好似將粉果排第一。店內魚肉燒賣$12／5粒、咖喱魚蛋$12／8粒，魚蛋就不予致評啦，因為真係麻麻哋，唔係手打質感。而魚肉燒賣則為手打燒賣，據悉係來自新鮮鯊魚肉、自製地魚粉，所以入口質感煙韌彈牙，而且有少少甜味，由手打魚漿變成紮實嘅燒賣質感，就好似魚膠。唔少網民都話要加自製辣椒油，但編輯當日唔食得辣，所以無加到，如果讀者食燒賣，記得要加辣椒油試試啦！

店內重有碗仔翅$24、生菜魚肉$24、生菜魚肉碗仔翅$24，但編輯對家鄉粉果$14／3個較有興趣。粉果真係一嘗便知龍與鳳，外表將餡料包起摺瓣，入面嘅餡少係炒製過，表皮煙韌，晶瑩剔透，粉果皮係略厚。粉果入面有蝦米仔、豬肉碎，亦有少量菜甫、沙葛、芹菜等，同而家坊間茶樓食到嘅粉果唔一樣，因為係完全無花生同蔥花。難得係食落似以前嘅舊式粉果，入面係有豬油鹹香，直頭係舊時於擔挑售賣嘅粉果！