【台中老街】南屯犁頭店老街臺中第一街！聚集古建築／老舖！高評分冰烤地瓜、古早麵線、百年狀元糕

台中老街不少，比較為人熟悉嘅老街有「旱溪老街」、「大甲老街」、「西屯老街」等，今次E.A.Two就帶大家拍拖兩個人去座落南屯區嘅台中第一街「南屯老街」，唔單止有在地人高人氣美食，亦有地道手信店，原來整條老街全長只係得200米！

台中捷運開通後，前往好多景點都好方便。位於南屯區嘅「南屯老街」，又叫做「犁頭店街」，既係台中老街，亦係台中第一街，有超過300年歷史，亦即係台中第一條老街！該老街歷史可以追塑至清朝康熙年間，當時叫「犁頭店街」，最初以賣犁頭農具為主，後來就變成賣其他貨物。而從捷運「南屯站」出站，只係徒步約10至15分鐘即可抵達該老街。

「南屯老街」一帶又叫做南屯三角街，皆因地形就係呈三角形，入口座落於萬和路、南屯路交界，一端既有「南屯市場」，另一端亦有被列為國家三級古蹟嘅「萬和宮」，全長僅約200米。遊走呢條老街，不難發現老街上有大量古建築依舊保留，牌樓更以巴洛克風格設計，部份街屋則有日治時期風格。老街上更有大量老店舖，例如賣中藥、賣豆腐、打鐵、賣米麩等，甚至舊式雜貨店，令整條老街更古色古香。

呢道「台中第一街」遊客唔多，雖然地方不大，但可以尋幽懷古，聚集嘅美食不少，有好多都係在地人喜愛到嘅小吃，於Google評分都幾高，如果拍拖兩個人前往，不妨參考一下呢個老街美食列表！

南屯老街美食（1）﹕台農57號冰烤地瓜

位於「三角街」十字路口嘅「台農57號冰烤地瓜」，創始於1991年，以地瓜為主，有麥芽地瓜、地瓜牛奶可以選擇。最特別之處就係冰之烤地瓜，即係冰糖烤地瓜，小份TWD60、大份TWD100，加花生粉多TWD5，簡單小吃卻受到在地人歡迎。

呢款冰糖烤地瓜現點現烤，一盒擺滿地瓜粒粒，粒粒色澤金黃，每一粒就好似黏滿冰糖糖漿，裏面烤得暖笠笠，而外層就係一層冰糖，入口甜絲絲。地瓜內餡相當綿密，入口Q軟，本身現烤地瓜已經飄香撲鼻，有少少炭火香。蜜地瓜表面冰糖層就似可以牽絲咁，冰絲透亮，入口香甜又唔會太過甜膩。

南屯老街美食（2）﹕金牛角

同樣處於「三角街」交界嘅「金牛角」，同招牌標誌一樣，都係以牛角包為主，店內重有手挪包、手工熬煮鳳梨，更有鳳梨冰沙可以選擇。店內嘅牛角包有多款口味，除咗原味、地瓜味，亦有菠蘿味、紅豆味、朱古力味、奶露味等。

南屯老街美食（3）﹕涼心冰室

位於「南屯老街」比較前端嘅「涼心冰室」，以古早味挫冰為主，四季皆宜，唔單止有綿密雪花冰，一邊可以消暑，而另一邊重有暖笠笠嘅甜湯。

南屯老街美食（4）﹕阿有麵店

「南屯老街」內有間「阿有麵店」，有超過50年歷史，招牌作係餛飩，內有豬肉餡，而且係自家製作﹐新鮮飽滿，適宜配搭陽春麵。一碗麵只係賣TWD40，人均極低廉，據悉內裏有滿滿肉燥，銅板價就可以食到飽。

南屯老街美食（5）﹕廖記老街麵線

位於「南屯老街」中段嘅「廖記老街麵線」，主要係賣地道古早味小食，當中有綜合麵線、板條、肉羹、魯肉飯、陽春麵等地道小吃。該店於朝早7點已經開始營業，就算一大清早去參觀老街，都有嘢可以食！

南屯老街美食（6）﹕阿嬤の店麵食館

近三角街嘅「阿嬤の店」就係一間麵食館，近南屯市場巷，店內有魠魚羹、米糕、麻醬麵等古早味小吃。一碗土魠魚羹只係TWD70，可以配搭麵線、米飯、米粉、冬粉，碗碗價格低廉，受到在地人喜愛，CP值不低。

南屯老街美食（7）﹕林金生香

走到三角街「南屯老街」近盡頭位置，唔單止會見到一間廟宇「萬和宮」，亦有一間百年糕點手信店「林金生香」，係在地伴手禮專門店TWD660有三包。該店係地道糕餅老店，創立於1866年，屹今有158年歷史，內有在地人導覽，可以了解傳統習俗同民間建築歷史。

該店雖然有唔少小吃手信，包括傳統壽桃、囍餅、土鳳梨酥、太陽餅等。不過，該店主打其實係狀元糕，口味眾多，包括有梅子、南瓜、芝麻、綠豆、杏仁、麻芛，一盒賣TWD380，有齊6款口味，送禮自用皆宜。其中，麻芛口味係最有在地台中特色，入口會偏甜。今次單賣咗2件試試，狀元糕外形似杏仁餅，但質感係軟腍，入口係帶甜味，的確係創意糕點，不過就唔係編輯口味。