【台中火鍋】湯棧人氣日式個人鍋營業至凌晨！必揀獨特在地燒酒／麻油／剝皮辣椒味！

台灣最出名嘅夜市，但火鍋都係高人氣嘅選擇，適合一班朋友聚會，亦適合拍拖兩個人烚吓烚吓，增進感情。今次E.A.Two前往台中一間營業至凌晨2點嘅火鍋店，該店本身係來自於日本品牌，將日式火鍋同台式美食混合，唔單止以個人鍋為主，亦加入剝皮辣椒、麻油、燒酒湯底，果然值得一試！

位於台中市區嘅「湯棧」，於台中只有3間分店，來自日本「輕井澤集團」。呢個集團其中一間為同名火鍋店「輕井澤」，另外兩間就叫做「湯棧」，分別近「台中中央公園」同「文心森林公園」。「輕井澤集團」本身已經傳承到第三代，而「湯棧」就以日式火鍋為主打，但就將火鍋加入台灣地道古早味，就似返回40至50年代。

近年台中捷運站開通，要來往市區更方便，其中一間毗鄰捷運「水安宮站」，徒步約5分鐘即達。「湯棧」室外內都以日式木質為主調，屋頂以黑瓦鋪砌，入面樓底特高，唔會好侷促，而天花板就有桁架，牆身亦係日式風格。該集團本身就以鍋物為主，今次「湯棧」就做返老本行，係受台中人歡迎嘅火鍋店。

每張餐檯都以個人鍋設計，如果兩個人用餐，每人可以點一款湯底，自然可以試兩個湯底。該店有2人檯、4人檯或6至8人檯，2人檯比較細，但就好快有位，如果點餐點得太多嘢，張檯未必夠位擺，當時剛巧有空位，店員將我哋搬到一張4人檯。該店係半自助式用餐，除咗用app點餐，更有送餐機械人，但醬料、飲品就需要自行到大廳自取，皆為無限供應。

而店內除咗有常見嘅昆布湯、沙茶湯、蔬食湯，特別以剝皮辣椒、麻油、燒酒湯底為主打，部份湯底加入濃郁酒香。今次點咗一鍋冷藏黑豚腹肉剝皮辣椒火鍋TWD458、一鍋冷藏極上牛腹肉燒酒火鍋TWD809。燒酒湯底含有酒，而剝皮辣椒湯底同燒酒、麻油湯底一樣都含有鍋底雞肉，一鍋有4至5嚿雞肉，蘸少少胡椒鹽會更惹味。燒酒火鍋只係開頭有些少酒香味，但一路食落去就無乜太大特別，或者係揮發晒；反而剝皮辣椒火鍋則貌似溝埋日式醬油湯底，所以剝皮辣椒唔會好辣，反而帶有些微甜味，愈食愈吸引。

據悉，該店嘅冷藏肉品係以低溫運送兼高等級保存，令肉質保持新鮮度。火鍋底本身就有一盤肉，每鍋都有一份菜盤﹐每人亦可以加購一份極緻海鮮拼盤TWD198，火鍋套餐本身可以配白飯，但都可以換一份麻油麵線，不過麵線同白飯差唔多，味道都係比較清淡。

加購嘅海鮮拼盤有魚片、兩款蝦肉、蜆肉，大概係基圍蝦、竹節蝦、車厘蜆，份量上唔算多，但價格上就唔算貴，大概只係加HKD50，而蔬菜盤就有蜆、蔬菜、菇同少量丸類。

火鍋配菜都有唔少選擇，比如水蓮TWD48、芋頭貢丸TWD60、薑絲米血TWD45，而一杯台灣金牌啤酒TWD50，以呢個份量嚟講，兩個人埋單約TWD1400，人均約TWD700至800，折合每人港幣只需約HKD200。另外，每人亦會附送冬瓜茶、冰沙，所以就算唔另外點餐都會有嘢飲。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 湯棧最好事前預訂座位，否則需要現場候位，線上訂位：https://pse.is/NWYB4，24小時都可以預訂。

❷ 店內有自助送餐，醬料、飲品可以到大廳自取。

❸ 該店本身既需要app點餐，但要入wifi先可以點餐，而wifi收唔到。點餐亦需要online付款，但同店員講可以直接點餐。該店只接受指定台灣app付款，如果遊客就要於櫃檯付款。

❹ 店內並無收取加一服務費。