大埔墟街市隱藏客家咸雞、咸鴨店！知味棧馳名手撕雞$80／半隻、迷你版盆菜$650二人適用！

於傳統大型街市內，基本上係極難搵到一間可以值得拍拖兩個人去嘅香港人小店。今次E.A.Two又喺「大埔為食友」參與活動名單中搜羅食店，發覺當中有唔少都係隱身於該區而比較少人發掘嘅餐廳或外賣店，行過3間大埔區小店後，最後嚟到大埔墟街市，樓上竟然有間售賣客家咸雞咸鴨嘅舖頭，最平$50至$60有交易，當中重有盆菜提供，2人盆菜更$700有找！

延伸閱讀﹕大埔為食友聯乘52小店推「大埔勁賞Fun」優惠！食店低至8折／第二份半價、訂座送鵝肝多士／每人一隻生蠔

座落大埔墟街市內嘅「知味棧咸雞咸鴨專門店」，想要前往唔使經街市正門，亦唔需要經濕漉漉嘅魚檔，只要於側邊上扶手電梯就得。電梯頂會見到火車景，走入街市轉左就會見到該店舖招牌。

店內主打係客家咸雞、咸鴨，更有招牌手撕雞，不過編輯當日比較晏前往，所以只賣淨一隻雞。成隻客家醃咸雞賣$110，半隻就賣$60；手撕雞都有成隻賣，一隻$150，半隻份量就賣$80。除咗客家咸雞、手撕雞，重有客家咸鴨，一隻賣$180，半隻賣$90，$50亦可以買到四份一隻。其他選擇有秘製糯米鴨$380／隻，牛肝菌蒸鴨$360／隻，玫瑰豉油雞$110／隻、$60／半隻。

一隻咸雞可以擺滿兩個飯盒，該店可以幫手斬雞，同時會丟棄雞頭、雞頸、雞蘿柚等唔食嘅部位。一隻雞配上每樣兩盒嘅蔥油、酸菜，就似客家食法，不過我哋覺得該店嘅雞肉已經醃得有足夠味，所以唔需要蘸任何嘢。整隻咸雞都係啖啖肉，雞皮爽彈，雞肉白白滑滑，肉質嫩滑，特別帶有鹹香味，第一日食雞肉唔算好鹹，味道恰好，係啲骨有啲紅，唔知係咪未夠熟，常識嚟講應該就係因為來自於冰鮮雞，雞肉係剛剛熟。

同一盒咸雞肉，第一日食既可以就咁食雞，亦可以配搭瀨粉等食用，發覺配上街市嘅瀨粉時，簡直神還原燒臘舖嘅咸雞瀨。而第二日食同一盒咸雞肉，味道就比較鹹，鹹味滲晒出嚟，所以配搭雞粥就會比較適合，將雞腳等部位熬粥，再佐以其他部位咸雞，鹹度變成剛剛好。

比較意外嘅係盆菜選擇，平常盆菜多數都係要多人享用，該店12至14人用嘅大盆$1580，8至10人用嘅中盆$1380，4至6人用嘅細盆$980，當中更有2至4人用嘅迷你版$650！盆菜係需要預訂，入面有客家咸雞、客家咸鴨、肉香腩肉、時令粉香芋、開心笑蝦蝦、金黃炸魚蛋、香滑冬菇、鮮味原隻鮑魚、清甜蘿蔔、爽脆豬皮、惹味豆卜、甘香蠔豉，睇落其實同坊間差唔多，分別有包含店內主打嘅咸雞、咸鴨。