【台中近郊】后里中社觀光花市四季皆宜！七彩花色輪流綻放、即睇必拍場景！大型花園旁設烤肉區！

喜愛影相打卡嘅讀者，拍拖兩個人去台中旅行必定要去呢個近郊景點，園區內滿佈花海，七彩花色輪流綻放，四季皆宜，春夏秋冬有唔同花卉，更有唔同打卡場景裝置。現時，進入花海參觀之餘，更可以同時前往烤肉區BBQ，但就只限週末開放！

距離台中市區有一段距離嘅「中社觀光花市」，一年四季入場都有唔同種類嘅花卉可以參觀。該觀光花市設有四季花海區，本身就有超過50種花色輪流綻放，園區內合共有約20萬株花卉，而1至3月更加有期間限定鬱金香綻放！

唔少遊客前往「中社觀光花市」都會直接call車或搭的士前往，但其實就算乘搭台鐵，落車後都可以徒步前往大門口。雖然「中社觀光花市」位於台中后里區，但要謹記唔好於「后里車站」落車，必須搭多個站去「泰安車站」，先至比較接近花市。而「泰安火車站」係一個比較復古嘅車站，懷舊氣息濃厚，月台更可以放眼週邊青翠風景。

走出車站之後，會見到有的士招客，如果唔想行可以直截了當轉乘的士，不過其實徒步而至都只係需要20分鐘，主要路段為一條大直路，兩側風景怡人，更可遠眺「麗寶樂園」呢！而「中社觀光花市」就位處三豐路交界，花市旁邊設有停車場，直接走入大門口就可以進入園區。

「中社觀光花市」入口旁邊可見盆栽區、烤肉區，觀賞花海嘅同時，都可以入去BBQ！而園區入場費就分淨賞花同BBQ連賞花，以成人收費計算，兩者相距大概係TWD260，賞花可以由朝早8點玩到傍晚6點，而BBQ用餐時間就只限3小時，換言之最遲可以夜晚9點先離場！不過，如果係拍拖兩個人前往，就需要加TWD100開爐費。

走入「中社觀光花市」園區，放眼都係花花花，真係全部都係花！而且花色五彩繽紛，琳瑯滿目，非常絢麗。而園區更分為唔同區域，七色花海加上多個裝置藝術點綴，有幾分歐洲色彩。兩個人既可以漫步穿梭其中，亦可以慢慢影相打卡！而該園區都係台中婚紗攝影好去處，只不過商業攝影都係最好預先聯絡園區預約。

園區內有種植有唔同種類嘅花卉，除咗有季節限定鬱金香，亦有玫瑰、向日葵、醉蝶花、飛燕草、紫色鼠尾草、一串紅、彩色海芋、炮仗花、金針花、荷花等。而百合花分為香水百合、黃金百合、姬百合，顏色比平常見到嘅更多；連菊花都有分大波斯菊、黃波斯菊，開得非常燦爛，構成天然花海，田園風滿滿，賞花必到！

為咗配合大片花海靚景，「中社觀光花市」園區內特別設有多組裝置藝術場景，比如係純白鋼琴、彩色小屋、月亮造型座椅、相框、韆鞦、荷蘭小風車等，令整體更有浪漫氛圍。雖然裝置藝術場景貌似比花海更受歡迎，但編輯覺得必須要配合花海先會更搶眼，花海先至係打卡必到！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 花海旁邊設有烤肉區，僅於逢星期六、日開放，而且營業時間延長時21:00，而烤肉區門票可以免費入場賞花海，人均為TWD380。如果唔夠4個人，會收取TWD100開爐費，用餐時間限3小時。

❷ 雖然花市係位於后里區，但乘搭台鐵就唔應該於「后里火車站」落車，反而應該乘搭台鐵至「泰安火車站」，徒步約20分鐘即達「中社觀光花市」，距離會比較接近。而花市旁邊自設停車場，自駕遊都可以將車輛停泊於停車場內。

❸ 中社觀光花市入場費人均為TWD120，必須遵守入園校規則。但花海區收費依季節而定，1至3月鬱金香花季人均為TWD150，其他月份先至係TWD120。

❹ 盆栽區同樣係免費開放，遊人皆可以自由選購花卉植物，最平TWD15都有。