勿去錯西環！此加記不同彼加記、認實鴨脷洲店！特大多汁生炸雞髀可配沙律／咖喱汁撈飯似Risotto？

曾經有讀者提過港島「加記」呢個名，而港島竟然有兩間名稱完全一模一樣嘅「加記」，細心啲自然會發現其實兩間「加記」係截然不同，而且係完全無任何關係！所以拍拖兩個人如果想去「加記」食生炸雞髀，記得要認實鴨脷洲店，唔好去錯西環啦！

如果於網絡上搜尋「加記」，Google或飲食平台都會出現唔同嘅「加記」嘅茶餐廳，總之唔好去西環皇后大道中嗰間就包無錯啦！唔知情嘅人真係好大機會會被模糊，以為係鴨脷洲「加記」嘅分店，同名餐廳感覺疑似有人想混水摸魚誤導大家。

我哋依讀者所講嘅指示前往鴨脷洲，終於見到正牌「加記」，呢間先至係值得推薦嘅「加記茶餐廳」！本身唔了解該區真係好混亂，都唔知邊間打邊間。雖然兩間並無任何關係，但當日招牌竟然被街坊發現係一式一樣！

鴨脷洲「加記茶餐廳」雖然室內地方細小，屈喺海怡半東商場一角，只係典型港式茶記格局，完全無諗過樓面嗰個係太子爺。最大特色就係中式廣東小菜為主，份量夠大，而且真材實料。當日留意到隔離茶餐廳客人點選星洲炒米、乾炒牛河等，發覺鑊氣小炒水準都係不俗，狀似大排檔，細心會發現大門口隔離就係即炒嘅廚房。另外，餐牌內有一款秘製薑檸樂$27，但就無得跟餐，所以窮人只係點選加$3嘅凍檸茶。不過，檸茶檸檬足，紅茶都算濃，而非淡如水。

當中，最聞名嘅就係港式生炸雞髀，店內餐牌甚至寫住「招牌推介」，無論正餐定下午茶都可以選擇大雞髀。下午茶特大多汁雞髀沙律$52，沙律量不少，而且配搭千島醬嘅沙律清新感較大，配搭香口油膩嘅炸雞髀係能夠平衡返嘅。而正常餐就有特大多汁雞髀飯$64，可選茄汁、黑椒汁、咖喱汁，分別在於有例湯，當日為青紅蘿蔔湯，湯底其實算料足清甜，只係嫌落鹽太重手，太鹹啦。

咖喱汁睇落都係其得意之作，一般咖喱飯都係差唔多價錢，只係將雞扒、豬扒、牛腩變成炸髀。咖喱汁撈飯醬汁濃稠，配有軟腍入味嘅薯仔，咖喱汁醬與純白米飯二合為一之後，白飯粒粒黏滿咖喱汁，醬汁稠身，感覺竟然似足意大利飯Rissoto質感！

講返「加記」重點生炸雞髀，size頗大隻，佔隻碟嘅一半空間，叫「特大」又真係無違反商品說明條例嘅。港式生炸雞髀店愈來愈少，有啲嘢就嚟被摧毀得一乾二淨，所以淨返依然尚存而唔差嘅生炸雞髀店，大家一定要好好珍惜！「加記」嘅炸雞髀，表皮脆卜卜，唔單止入口滋滋作響，而且脆皮係摘碟有聲，只係真係比較乾身。生炸雞髀唔單止表皮呈金黃色，炸得香脆可口，而且內裏都係保持肉汁，不失juicy感覺，雞肉唔會變得乾柴嚡口。