荃灣巷弄設自助販賣機還原日式拉麵店！魚介／海老／黑蒜油口味自己撳掣？

講到拉麵店，絕對唔可以同香港拉麵迷討論，因為大部份都係全香港最有品味嘅食家，無論食邊間都會有批評，無可能搵到一間無批評嘅拉麵店，或者餐廳。故此，呢個話題只係for喜愛拍拖兩個人週圍嘗鮮嘅朋友。今次E.A.Two前往荃灣冷巷內嘅一間拉麵店，最大特色係大門口擺放一部自助販賣機，令人感覺恍如一秒抵達日本拉麵店……不過，最黑仔就係竟然遇上自助販賣機維修！

位於荃灣近「荃新天地」一隅巷弄嘅「團日式拉麵」，一端係大街，另一端則近「楊屋道街市」同商場。該拉麵店從2018年開業至今，室內外都充滿日式風情。年輕人開店自然各師各法，奇招盡出，最大特色嘅就係門口有一部刻意訂造嘅自助販賣機，客人只要自己去拉麵機撳掣，就會直接點餐，半自助模式恍如日本地道拉麵店！不過，當日遇上自助拉麵販賣機需要維修，故只能到室內直接點餐。

呢部日式自助拉麵機操作簡單，只要於菜單選取拉麵，確認菜單同份數，然後投入紙幣或硬幣，最後喺下面攞返找續，就已經完成點餐步驟。取票後，進入店內交予店員就得，然後只係需要等待拉麵上檯。點餐機上都寫明各條款同步驟，使用點餐機購買時，入錢記得要逐張入，唔好一次過入，留意只係接受$100以下嘅紙幣或硬幣。基本上，喺上面螢光幕點餐就得，下面係裝飾嚟，畀你睇有咩選擇。

拉麵款式大致有6至8款，大部份都包含味付蛋、豚肉、海苔、筍，只有海老拉麵係並無筍絲提供，全部都可以揀曲麵或直麵，曲麵會較彈牙同掛湯，直麵就較順滑，但店內就直麵好過曲麵。魚介拉麵$83、櫻花蝦拉麵$85、黑蒜油拉麵$88、激辛味噌拉麵$90、醬油豚骨拉麵$78、海老拉麵$110，另有$88至90一碗嘅赤、綠拉麵，赤即係辛辣，綠即係蔥花。海老拉麵同醬油豚骨拉麵一樣寫明係期間限定，但其實都限定咗一段時間，大概係無改到？小食有煎餃子$22／3件、$50／5件，亦有溏心蛋$15／隻、厚切牛舌$30、軟骨棒$20，無乜太大衝動點選。

魚介拉麵表面平平無奇，但其實係以豚骨湯製，加入鰹魚粉，入口鮮甜濃郁。湯頭味道濃得剛好，香醇而唔會去到鹹嘅地步，只係好似爭少。拉麵擺咗一陣，有少少瓊咗一層皮，就似豬油，湯頭唔會感覺油膩，但質感黏稠，甚至係有啲漿口。拉麵碗內有2塊薄切嘅叉燒，筍絲就有3至4條，紫菜亦有2塊，叉燒偏粉紅，似慢煮叉燒，質感軟腍，但薄得容易夾到散晒。至於溏心蛋，係原隻上檯，熟成度亦恰到好處，一咬入口蛋汁溢出，浸喺熱湯內都未有變得太熟，值得加分，雖則蛋汁唔太甜同蛋香味唔太重。