灣仔／銅鑼灣有分店！家賀屋日式居酒屋午市定食CP值高、瞬間爆紅畫碟蛋糕須1個條件

最近港島有一間日式居酒屋忽然爆紅，皆因該店於甜品蛋糕碟上畫畫，而且將卡通人物公公畫得栩栩如生，有人更稱讚為「由畫家耽誤嘅廚師」，吸引唔少人拍拖兩個人朝聖！今次E.A.Two就前往呢間於灣仔、銅鑼灣都有分店嘅居酒屋，中午前往該店發覺人流並唔多，但各式午市定食都有逾30款，而畫碟甜品則需要1個條件。

隱身灣仔街頭樓上舖嘅「家賀屋」，分店位於隔離區銅鑼灣，兩間都係唔係地舖，同樣係一間由日本築地直送食材嘅日本餐廳。該店以壽司定食、刺身丼為主打，其中午市定食有壽司、刺身、丼飯、燒物、烏冬，加上其他料理就有超過30款可以選擇，另外重有日本地道酒肴，可以佐酒。

期間限定選擇有海膽龍珠卷折後$148，本鮪壽司5點盛折後$178、鹽燒本鮪魚下顎折後$98。而月見二重丼最平$168，該系列最貴嘅係極丼定食$245，包含月見海膽、三文魚籽、本鮪魚腩蓉。至卡其他料理則有鹽燒仙台熟成牛舌芯定食$168，燒物又有日本花魚一夜干定食$158至$228等，總之就係豐儉由人。

今次選擇午市定食套餐，不過就無揀到最貴嘅特選海鮮丼定食$348，而最平一款大概係$125至$135。一款係海三色丼定食$178，另一款就係本鮪三味丼定食$225。定食套餐基本上都會包含主食、海帶味噌湯、胡麻田園沙律、海鮮蒸蛋。其中，蒸蛋唔單止滑溜，內裏更可以發掘各式海鮮，包含有一隻帶子同兩隻蜆肉。

該店明顯就係以海鮮刺身壽司為主打嘅居酒屋，據悉早於灣仔已經屹立有逾13年，而且於日本自設漁商，難怪一嘗之下都發覺刺身係特別有水準，並非單單解凍得好。連醬油、山葵、米飯都別樹一格，入口同坊間質感有少少唔同，翻查資料發現醬油係自家製，山葵亦係生磨而成，而米飯亦係來自新潟縣上等越息吹米，加上琥珀赤醋，飯底都係經過醬漬，並非單純白飯。

海三色丼包含有2隻赤海蝦、3片三文魚、3片油甘魚，赤海蝦頗大隻，爽口彈牙，其他魚類都係入口肥美鮮甜，又有魚香味，並無欺場。而本鮪三味丼就包含有2片本鮪赤身、2片本鮪赤身醬油漬、2片中本鮪魚腩、手切本鮪魚腩蓉，即係以鮪魚為主，係4種唔同嘅鮪魚食法。鮪魚刺身都算係代表作，新鮮腍嫩，魚油香十足，入口會逐步溶化。

套餐加冰咖啡$15，同時可以加芝士蛋糕$15或北海道千層雲呢嗱蛋糕$22。熱咖啡同丼飯、壽司、刺身都唔係太夾，但冰咖啡則尚可，咖啡雖然配有奶等可以自行調配口味，但個人覺得呢杯咖啡就似一杯精品咖啡，唔需要加任何額外調味，反而更可以咖嚐原始咖啡香。咖啡入口係帶有少許苦澀味，但尚算可以接受。

而蛋糕就有2款可以選擇，包括芝士蛋糕、北海道千層雲呢嗱蛋糕，後者水蛇春咁長，上檯後方才恍然大悟，咪即係千層蛋糕，而且係同舊時先會食嘅Lady M千層蛋糕無異。千層蛋糕保持冰涼，質感紮實，唔會一桔就散開晒，確實層層堆疊整齊，而甜度亦適中。不過最近因線條精細、畫功極強而於Threads爆紅嘅「家賀屋」畫碟甜品，造型雖然維肖維妙，但就只限預訂適用，當日就算你有錢都無得提供服務，如果想要慶祝生日或紀念日等日子，就記得一定要事前預訂啦！