【曼谷酒店】全新開業、騎呢泳池似足金魚缸！入住Livable Hotel Bangkok歎即叫即煮免費早餐、最安全Tuk Tuk直達BTS！

曼谷酒店選擇不少，好多都值得拍拖兩個人入住，大部份價格都唔高，要揀CP值高嘅酒店就要稍花時間。今次E.A.Two入住一間近年先新開業嘅五星級酒店，唔單止每日有即叫即煮半開放式早餐，酒店亦有限時Tuk Tuk接駁至BTS，而最大特色就係有一個恍如金魚缸嘅開放式泳池！

「Livable Hotel Bangkok」譯名為「曼谷宜居酒店」，位於巷弄之間，但距離BTS僅有約10分鐘步程，交通便捷。酒店於2022年方才開業，E.A.Two於2024年入住，驟眼睇雖然表面係一間五星級酒店，室內外雖然地方不大，但都算企理新簇。

酒店範圍設有免費停車場、Wifi，亦有24小時櫃檯服務、行李寄存、meeting room，入住可以免費自助停車。最特別嘅地方係自設shuttle bus，每日均有時間表，7日都有車，但基本上只限朝早10點至下午1點前，大概20分鐘一班車，直接連接BTS站，但1點後就無車。唔少人因為安全問題怕喺曼谷坐Tuk Tuk，但坐酒店嘅Tuk Tuk式shuttle bus，可能係最安全嘅Tuk Tuk。整架車地方不大，車內比一般Tuk Tuk舒服，座位有前後座，得4個位左右。

甫踏入酒店範圍，一個長方形泳池馬上映入眼簾，泳池完全無遮擋，可以直接望到小巷，中間連一幅牆都無，背後就有綠油油樹樹景，似乎想設計成森林式泳池。而泳池位於停車場同餐廳之間，長方形設計嘅泳池前端極通透，前面更有一個圓形，感覺就似足一個金魚缸。

泳池大概只係得130米深，長度就只有約5至6米，雖然可以睇到泳姿，但游水就未必啱啦，網美打卡就幾適合。如果於泳池游水或打卡，就好似一條喺金魚缸暢泳嘅金魚，設計騎呢，但又幾獨特，落水打個卡都幾搞笑！當有任何人落水時，自然會吸引四週目光，無論酒店門口定餐廳嘅客人，都會好奇望向泳池方向。不過，要相信只要你唔尷尬，尷尬就係別人。

酒店外觀以純白設計，室內樓高8層，每層約有11間房，僅有76間房間，大多數係雙人房、四人房、家庭房。從房間大窗戶俯視，可以下瞰毗連酒店嘅公園風景，環境清幽。該酒店雖然係五星級酒店，但價格頗低廉，最低見過每晚僅需HKD261，相對於其他酒店，CP值極高！

辦理好入住手續後，職員會遞上房卡，每間房會有2張房卡，可以一張插冷氣位，另一張隨身攜帶。雖然酒店價格唔高，但房間地方偌大，一隅設有近落地大窗，可外樓下公園景。房內除咗智能電視，設有雪櫃、拖鞋、風筒、咖啡包、茶包、水壺、兩支免費水，當中亦有少量盥洗用品，但就無牙膏、牙刷、梳等即棄用品。另外，房內無衣櫃，但門後有擺衫衣架、保險箱、毛巾，更有小電筒作備用。

房間擺放雙人大床、長書檯之後，依然有大量空間剩餘，室內亦好光猛。一隅分別設有浴室、廁所，各有玻璃門，浴廁完全分開，連洗手盆都擺出面。至於浴室有兩個花灑，一個可拎落嚟，一個喺頂垂直落，熱水、凍水都可以自行調節，水溫控制幾穩定。

酒店地下一隅設有一間餐廳「Doux Cafe & Restaurant」，毗連游泳池，室內可以外望泳池景。凡入住酒店嘅客人都可以於朝早6點半到10點半到餐廳享用一份即點即煮嘅早餐，包括泰國菜。本身每一份早餐需280thb，但入住酒店就可以免費享用﹐每人每日早餐均可以自由選擇，重有素食可以揀。該餐廳係採半自助式，當中有沙律吧、飲品、咖啡、麵包、三文治、窩夫、生果等。每朝向店員報上酒店房號碼，點選主食，廚房就會即叫即製指定早餐，然後再由店員送餐。半自助式吧檯除咗有上述早餐小吃，亦少量有咖啡飲品，包括咖啡、橙汁、香茅汁等，其他就要另外加錢。

餐廳有全日早餐供應，可以自選炒蛋、奄列、煎蛋，每份都會配返沙律菜、麵包、蕃茄、火腿、腸仔等。另外，葷食選擇重有豬肉炒飯、雲吞湯、雞肉丸粥﹐雞肉丸粥係比較清淡嘅選擇，不過粥底加咗胡椒粉之類，都算係軟綿。E.A.Two覺得素食餐牌係餐廳嘅MVP，最驚喜嘅莫過於Tofu Pad Thai 豆腐炒河，其他重有豆腐炒飯、素食春卷、veggie gyoza、煎三蛋全日早餐、蘑菇湯。Pad Thai唔單止配料充足，河粉滑溜，炒得均勻，鑊氣十足，香氣四溢，感覺未必輸蝕於出面嘅Pad Thai。

即睇【Livable Hotel Bangkok】住宿價錢及限時優惠﹕Agoda｜ Booking.com｜Trip.com｜Expedia｜ Hotel.com 預訂

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭BTS至「Victory Monument站」，出站後經天橋，經過「Santiphap Park」，徙步約10分鐘即達。

❷ 留意泰國大多數酒店都係下晝2點check in。

❸ 入住酒店可享免費半自助早餐，每日可以選一款即煮早餐，但唔可以多點一款。

❹ 酒店泳池雖然寫有限時間，但其實位置係正對大門口，位於停車場、餐廳之間。日光時份有陽光，夜晚時份只係比較暗。