曼谷Victory Monument 3間按摩店每小時最平$60！24小時營業、近BTS、泰式／精油／腳底按摩任擇

去曼谷旅遊除咗食好嘢，唔少得係拍拖兩個人去按摩吓鬆一鬆，按走平時嘅疲憊。唔少人都係前往交通便捷、曼谷市中心Siam嘅按摩店，今次E.A.Two入住Victory Monument（勝利紀念碑）站附近嘅酒店，當中都有幾間地道按摩店可以選擇，即管去睇一睇、試一試。

SASI beautified boutique

曼谷好少按摩店係24小時營業，如果時間太夜，臨返酒店前又想按摩，就可以搵吓全日無休嘅店舖。由BTS站徒步約10分鐘，就會見到一間「SASI beautified boutique」嘅按摩店。只需要於左邊付款，從左邊進入，後面有小通道通重右邊比較暗嘅按摩空間。

該店係24小時營業，位於巷弄之間，如果入住附近酒店，例如我哋入住嘅「Livable Hotel Bangkok」，距離只係約200米，非常方便。不過，24小時營業嘅舖頭，當然唔會好似有時限嘅按摩店咁有一定水準。

該店有各款按摩選擇，泰式按摩、足部按摩每小時都係僅需250泰銖，頸肩按摩每小時就係350泰銖，精油按摩每小時則為500泰銖。另外，重有其他香薰按摩、症狀按摩、磨砂按摩、泰式壓縮按摩等。雖然價錢係最低，按摩師手勢就一般般，的確按足1小時，而且係由腳板按到小腿，再由小腿按到大腿。但大多數都係用死力，按完有啲痛，未可以完全紓緩疲勞。不過，做完腳底按摩，最後會送幾吓肩頸按摩，發覺按肩頸比按腳更紓緩。

Kayasiri Health Massage Victory Corner

而「Kayasiri Health Massage Victory Corner」係距離BTS最接近嘅按摩店，徒步2分鐘就可以抵達。不過，該店位置比較騎呢同難搵，行樓梯上去都唔知係2樓定3樓，

該店價格同樣唔高，如果做身體磨砂，大概699泰銖就可以做1小時，至於泰式按摩或足部按摩，價錢均為每小時350泰銖，價格都算低廉。雖然Google地圖寫營業至凌晨12時，但其實夜晚10點幾已經好似收舖，而且有人打地鋪瞓覺，我哋都不便打擾。

Nikko Thai Massage

「Nikko Thai Massage」係3間當中唯一位於大街上嘅按摩店，該店似乎都係一間遊客店，因為連KKDAY同KLOOK都有預訂套票。去該店之前，可以於網上預訂按摩療程，無需屆時於店內外等候。不過，該店營業至凌晨，我哋於夜晚10至11點前往都無需要等候。

於曼谷按摩店中，該店係中低價位按摩店，同上述按摩店無異。泰式全身按摩、足部按摩每小時均為350泰銖，其他按摩療程有頸肩按摩每小時500泰銖、香薰精油按摩每小時700泰銖，另有摩砂去角質、香薰精油等等。

呢間唔知算唔算連鎖店，單單勝利紀念碑站就有2間分店，而且位於同一條街道內。如果只係按腳，就於地下一層進行按摩；但若然係其他按摩療程，就需要稍移玉步到上層小包廂，單人多數都係用布簾分隔，燈光亦比較暗。而按摩師力度適中，都唔算完全用死力，會用陰力按落去，唔算高水準，但按完唔會痛，呢個價位可以消除當刻疲憊就算可以接受啦。