隱身九龍灣啟業邨！屋邨冬菇亭合興大排檔麻甩味濃！$50大碟炒飯／鑊氣小炒／潮州打冷

近年，想搵港式大排檔並唔容易，最為人熟悉嘅只係分店依然林立嘅「楚撚記大排檔」，該店裝潢比較新式同企理。拍拖兩個人想要於小店中找尋舊式街邊大排檔非常困難，今次E.A.Two就前往隱身於九龍灣屋邨內嘅冬菇亭大排檔，該店夜晚有鑊氣小炒，中午就係附近地盤工嘅飯堂，麻甩味極濃，大大碟鑊氣碟頭飯最平只係$50！

座落於九龍灣啟業邨內嘅「合興大排檔」，位置正正係屋邨冬菇亭，大排檔毗連馬路，正對九龍灣運動場，可遠眺Megabox商場。小店係傳統半露天大排檔模式，一張又一張大圓檯、膠櫈擺放店內，據悉夜晚將透明簾落下，重會有冷氣開放。店內午市餐牌擺放圓檯上，而抬頭亦可以見到有晚餐嘅鑊氣小炒可以選擇。

「合興」係香港傳統舊式大排檔，屹今已有超過30年歷史，有堂食同外賣供應。店內星期一至六午市有唔少地盤工前往，係地道麻甩飯堂之一，皆因店內碟頭飯份量充足，足夠需要力氣工作嘅地盤工食用，佢哋豪氣到中午都隊幾支大啤。如果係電視迷，應該會認得呢個地方，因為電視節目《膠戰》同Mirror成員呂爵安嘅MV都曾經於大排檔取景。

晚餐以小炒為主，當中有套餐可擇，3款小菜大概就係二三百蚊。店內小炒有煎蠔餅、椒鹽九肚魚、laughing雞、水煮烏江魚片、酸菜魚、手渣西施骨，亦有當紅炸子雞、豉椒炒蜆、豉椒炒蟶子、豆豉鯪魚油麥菜、椒鹽蝦、香橙骨、滷水鵝、西檸雞、豆腐火腩煲、蒜蓉粉絲蒸扇貝、蒜蓉開邊蒸蝦、黃金鮮魷、避風塘炒蟹、琵琶豆腐、泰式烏頭等等，不外乎港式小炒、海鮮，重有潮州打冷小菜。

今次我哋午市前往，所以點港式碟頭飯，難得係餐牌寫幾多，張單價錢就寫幾多，點支裝汽水甚至唔需要另外收費！每一碟飯人均$50至$78，選擇有楊州炒飯、魚香茄子飯、乾炒牛河、椒鹽豬扒飯、粟米肉粒飯、羅漢齋飯、紅燒豆腐飯、時菜斑腩飯、肉絲炒飯、鹹魚雞粒炒飯、蠔仔粥、生炒骨飯、豆腐火腩飯、豉椒鮮魷飯、福建炒飯、瑤柱蛋白炒飯、乾燒伊麵、芙蓉蛋飯、中式牛柳飯、合興炒麵等。

如果要選擇，大排檔必然係揀炒嘢，今次我哋點咗西炒飯$50、星州炒米$55，兩碟都好大份，份量真係豪邁型，的確經濟實惠。星州炒米同西炒飯配料充足，炒米粉夠乾爽，香辣惹味，西炒飯就係帶有少少黏身，又唔會太過濕潤，蝦仁量都唔少，均勻散佈。無論炒飯、炒米都有鑊氣，上檯熱焫焫，又真係有舊時大排檔風味嘅，只係同以前比較係爭咁少少。