台南5大交通方法！Uber用唔用得？實測最user-friendly台南app！

台北、台中、高雄都設有捷運路線，拍拖兩個人往來唔同景點都好方便，但台南唔單止無香港直航機可以抵達，更加無任何捷運路線，交通看似並唔方便。事實上，台南有5種交通工具，往來唔同景點一樣便利，除咗高鐵之外，到底重有咩交通方法？Uber App又可唔可以喺台南使用？今次E.A.Two順道為大家實測最user-friendly嘅交通App，即睇乘搭台南交通工具經驗！

台南市區交通方法（1）﹕台鐵

台鐵係台南重要嘅鐵路運輸系統，可以連接北端同南端，相當方便。由高雄去台南市區，其實並非乘搭高鐵，皆因「高鐵台南站」只係去到台南近郊一帶，落車位置為「MITSUI OUTLET PARK 台南」，距離台南市區有一大段距離。所以從高雄去台南，最方便嘅就係乘搭台鐵，可以直抵台鐵「台南車站」，前臨「台南車站圓環」迴旋處。

經台鐵從高雄去台車，會經過保安車站、中洲火車站等，車程僅約30至40分鐘，時間上同自駕無異。乘搭台鐵前，記得下載「雙鐵時刻表」，可以即時得悉列車抵達最近車站嘅時間，節省旅程不必要嘅等候時間。App內有列車抵達時間、查詢路線，如果搭車時只係用悠遊卡入閘、無另購指定席車票，記得留意只可登上「區間車」嘅列車。

建議使用台南App﹕雙鐵時刻表（IOS／Android）

台南市區交通方法（2）﹕公車

公車係台南另一個重要交通方法，要依靠台南公車穿梭台南各大景點，記得一定要下車在地公車App。事實上，App Store內有好多公車App，但E.A.Two始終覺得最user-friendly嘅係「大台南公車」！

本身台南都有好多條公車觀光路線，比如係「台灣好行」98號公車路線，可以來往台南市區、安平區、四草至七股鹽山。於「大台南公車」App內，可以直接search到指定公車路線，亦可自行規劃公車路線。無論公車路線，定係每條路線嘅收費，通通一覽無遺。

台南公車一般付費方式簡單，可以直接入台幣散紙，但要切記數目無找續，要數清楚金額先好入錢。而最簡單直接嘅方法就係使用刷悠遊卡、一卡通、愛金卡icash，一「嘟」就得！不過，用呢幾款卡上車，記得落車時要再拍一次卡確認呢！另外，如果係乘搭「台灣好行」98號公車，就可以直接以無限次乘搭嘅一日券乘搭，上車出示返就得，而單獨付款每程就只係TWD18。

如果唔知搭咩車，可以揀起點同終點嚟睇邊架車啱，又或者喺Google Map內睇附近有咩公車，然後直接search該車路線。App系統「動態公車」會顯示該公車路線目前去到邊個位置，重有幾多分鐘抵達某一個站，同埋列出去某個目的地所需時間，記得喺頂頭揀返自己想搭嘅方向！留意就算有部份公車官網寫明時刻表，但實際上屆時都未必係嗰個時間到達，而「大台南公車」App嘅抵達時間就會比較準確。若然公車已到達或準備到達某一個站，系統會馬上顯示「即將進站」，有部份公車有可能因塞車、延遲等問題，兩架車會差唔多時間到達。

建議使用台南App﹕大台南公車（IOS／Android）

台南市區交通方法（3）﹕呼叫小黃

講到台南Call車App，一定係「呼叫小黃」！呢個App係台南在地人推薦嘅選擇，只要於App Store下載「呼叫小黃」嘅App，登記返自己嘅資料，到時就可以嘗時使用。不過，要注意使用前就已經要畀TWD1個App先可以登入。

使用呢個App，好處係可以一早講低起點同終點，預先估算該車程嘅車費，可以得知每一程嘅距離大概幾多錢，唔需要擔心遇上DC9。選擇上車地點、落車地點、付款方式、人數，甚至以跳錶或報價作收費標準，然後搜尋附近5公里內嘅的士。簡單嚟講，呢個app同直接截車差唔多，都係台南的士。

建議使用台南App﹕呼叫小黃（IOS／Android）

台南市區交通方法（4）﹕的士

有部份人去台南會選擇自駕，其實大多數地方都唔需要自駕，因為週邊交通非常便利。就算唔識搭公車，都可以搭的士或call車，價錢並唔貴，CP值唔比自駕低。的士就係一個最常見嘅交通工具，只要做「伸手黨」，有空車就可以直接上車。

當中，「台南車站」同各火車站門口都會係比較多的士嘅地方，如果想較容易截車，最好前往比較人多嘅地方或者知名景點。一般嚟講，台南的士收費唔高，起錶價為TWD85，大概無200米就會跳錶一次，每次會加TWD5；若時速5km以下，每100秒會再加TWD5。如果係夜晚搭車，的士收費會比日光時間較高，比如夜晚11點之後，收費會高大概2成左右，而新年假期或颱風豪雨等情況又會加收TWD50。

實試乘搭台南的士之後，方才發現台南的士司機真係與別不同，比較年輕嘅司機有機會唔係太熟路況；但年紀比較大嘅司機就非常熟悉路面狀況，我哋遇到嘅都唔係DC9，唔會兜路之餘，反而會左穿右插，走一條最快抵達目的地嘅路線。以「大東夜市」前往「家樂福安平店」計算，最終收費只係TWD114，折合港幣HKD30有找，於台南搭的士，其實隨時比Call車價格更低廉！

建議使用台南App﹕N/A

台南市區交通方法（5）﹕uber

如果想更方便Call車，可以直接使用國際版嘅「Uber」App，因為台南係可以用到「Uber」App！只要登入「Uber」App，同平時Call車一樣，輸入返目的地資料，就可以直接Call車，等候在地司機接單。「Uber」App畫面會睇到附近有幾多使用呢個App接單嘅司機，有司機接單之後，只要喺原地等候指定司得就得。

「Uber」App收費雖然較一般的士多少少，但實際上都唔係話高好多，所以對旅客嚟講，呢個係一個非常方便嘅Call車App。以台南市區去安平區距離計算，當日使用「Uber」App，最終收費為TWD252；而由台南市區去「花園夜市」，車費為TWD131；從安平區去「大東夜市」、「大東東夜市」，車費就係TWD206；由安平區去「台南車站」，車費為TWD194。大多數每程折合港幣都係大概HKD30至50。

建議使用台南App﹕國際版Uber App（IOS／Android）

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 台南一般在地人係用「呼叫小黃」call車，但其實「uber」app都可以使用，用嚟call車都好方便，而價格都唔算貴。

❷ 如果要搭公車，建議一定要下載「大台南公車」app，可以詳細睇到指定公車路線即時位置同到達時間。

❸ 要乘搭台鐵嘅話，於「台鐵時刻表」app可以睇到即時嘅列車抵達時間，無得別買位、用悠遊卡嘅朋友，記得要留意「區間車」先好上車。

❹ 其實的士跳錶價錢係低過uber，所以做伸手黨直接截車都唔係壞事，如果遇到台南經驗老到嘅司機，甚至會識得走捷徑，路程更短之餘，車費亦都更低。