【台南住宿】長悅旅棧鄰近火車站！自助早餐歎虱目魚／牛肉湯／義豐冬瓜茶！房間驚現古早銅錢餅？

去台南快閃旅行，最方便當然係找尋市區住宿，更便利嘅就一定係選擇「台南火車站」附近嘅飯店，徒步就可以抵達飯店，適宜拍拖兩個人入住。平常飯店早餐都未必好食，但呢間嘅自助早餐水準不俗，更有台南知名小吃可以選擇，例如虱目魚、牛肉湯，亦有聯乘義豐嘅冬瓜茶。房間內更有兩塊銅錢餅，到底係咩嚟呢？即睇E.A.Two入住經驗、飯店每晚價格！

「長悅旅棧」距離「台南火車站」僅有約800米，徒步10分鐘可以抵達。飯店既靠近火車站，亦有24小時櫃檯服務，方便隨時乘搭火車去到台南，唔需要擔心太早或太夜，亦唔使要四圍搵車或擔心搵唔到車搭去飯店。而飯店並無自設停車場，但職員有介紹附近有幾個收費停車場，若以一晚計算，價位平均大概就係TWD300，換算港幣大概就係HKD50。

飯店於2016年先至開業，翌年就曾經進行一次翻新，至今只係一間3星飯店，但整體都係企企理理，感覺唔單止係快閃遊嘅選擇，更加設係商務旅館。櫃檯前有少量糖果，亦有可愛小書籤，畫風似台南地標，上面寫有平安、健康、幸福等字樣。飯店地下大廳同餐廳一層頗有藝術感，因為當中包含有日本藝術家村上隆嘅作品，亦有藝術家雜誌可以閱讀。

飯店雖然只有一部電梯，上落都係同一部，但等候時間亦唔算太耐。雖然樓高11層，不過電梯就無4字樓，換言之即係得10層。入住客人有2張房卡，一人一張都算方便，因為每次上樓必須刷卡。房間四正，地方唔細，簡潔明亮，中間擺放有頗舒適嘅大床。床頭旁邊有掛衫地方，下面有足夠位擺行李。而床頭同書檯都有幾個插頭，足夠叉電使用。

房間內唔單止有2支免費水、茶包、咖啡包，更特別之處係有2塊銅錢餅！到底銅錢餅係乜東東呢？銅錢餅入口有啲微甜，有少少似黑糖定麥芽糖味道，不過質感有少少酥感，但就偏腍身。原來銅錢餅係一種歷史悠久嘅小食，亦係台南嘅古早味小吃，外觀似足一個古代銅錢，多數上面都會寫「招財進寶」，所以叫「銅錢餅」。

房間浴廁乾濕分離，以中間洗手盆分隔，浴室有提供沐浴露、洗頭水，水壓充足，而廁所嘅廁紙就離奇地多，唔單止有兩卷擺喺度，後面重有後備廁紙。雖然浴室無提供即棄盥洗用品，但房間衣架下面就有提供即棄拖鞋。浴室內有個220V插頭，因為風筒同熱水壺都係用呢種插頭。而220V正正係香港使用嘅三腳插頭，所以就算你唔記得帶轉換插頭，入住呢間飯店都唔需要擔心無得叉電，當然唔好連普通插頭都唔記得帶啦！

入住飯店有免費早餐提供，呢間飯店嘅半自助式早餐頗特別，而水準亦唔差，唔似其他飯店咁一般。只要憑有早餐券於07:00至10:30就可以有其中1小時用餐。入座後，會見到餐廳內有沙律吧，蔬菜、中式熟食、西式麵包，就似一般飯店自助早餐，一隅重有可愛兒童餐具，適合有小朋友嘅客人。入住嘅時候，職員會詢問早餐用餐時間，建議盡早用餐，因為太晏有部份餐點有可能未必會再補上。

飯店餐廳早餐限定有新鮮虱目魚湯、台南牛肉湯、營養豐富嘅素食鮮菇湯，每人可以三選一，故兩個人就可以揀2款菜式，另可加點滷肉飯。虱目魚湯、牛肉湯其實唔輸蝕於外面專門店嘅質素，兩個湯都好清甜，唔油膩，魚肉同牛肉入口皆軟嫩。自助吧比較特別嘅係府城古早味肉燥飯、咖哩醬意麵，飲料吧就有聯乘之作義豐冬瓜茶，其他飲料就有米漿，以及採用ucc咖啡豆嘅咖啡。