【台南景點】即食黑橋牌香腸！免費參觀全台第一間香腸博物館！創意手信聯乘祀典武廟！

台南博物館不少，每一個博物館都有詳細資訊，台灣好多時候都將本來嘅工廠打造成觀光工廠，唔少更容許旅客免費進入參觀。拍拖兩個人去台南，不妨搜尋吓在地觀光工廠，其中黑橋牌香腸就有一個博物館座落於台南市區一帶，唔單止免費進入，而且一程公車即達，交通方便！呢間係全店首間香腸博物館，入面重有各式手信，其中有款甚至聯乘祀典武廟，相當有趣！

由「台南車站」出發，乘搭一程公車，大概30分鐘就可以直達「黑橋牌香腸博物館」。台灣香腸非常為人熟悉，當中「黑橋牌」香腸就係好受歡迎嘅香腸品牌，由1957年至今，已經有超過50年歷史，最早係喺運河邊叫「烏橋仔」嘅地方第一個香腸禮盒曾經吸引唔少人大排長龍購買。今次參觀呢座博物館，於2012年落成，係台南其中一座觀光工廠之一，只係以香腸為主題，亦係台灣第一座香腸博物館，而創辦人陳文輝先生更加被稱為「台灣香腸之父」！

博物館樓高3層，甫踏入展館已經見到室內以復古街道風格叔計，入面更有五條港介紹牆。地面係售賣「黑橋牌」香腸嘅餐廳，以及各式「黑橋牌」香腸手信。樓上就有2層樓，3樓有基本「黑橋牌」大事記，以及歷史文化有關展覽，有好多仿製嘅場景畀遊人打卡，多數都係同「黑橋牌」本身脫不了關係，造景做得幾真實，打卡必到！而2樓就係更深入了解香腸工藝，甚至香腸世界地圖，可了解更多香腸知識，係香腸文化展覽部份。通過「黑橋牌香腸博物館」工廠迴廊步道，可以清楚了解當地食品製造，就似一個現代化工廠。

事實上，「黑橋牌」香腸唔單止採用新鮮現宰豬肉，而且生產到物流都通過標準認證。下層係了解「黑橋牌」嘅好機會，而上層就係通過香腸嚟環遊世界，台灣香腸其實只係香腸界嘅冰山一角。除咗有台灣米腸，亦有意式辣香腸、日本魚腸、德國血腸、薩維羅香腸、西班牙香腸、維也納香腸、法蘭克福香腸、熱狗、思華力香腸、廣式香腸同臘腸，不過唯獨欠做港式廚師腸！

由於工廠參觀步道必須要預約導賞，所以walk in就未能參觀，只能夠參觀3層展覽館部份，因為工廠真係內部區域，唔係可以隨便進入參觀。參觀完樓上資料庫，不妨折返地面一層，親嘗台灣原產香腸！小食部有多款「黑橋牌」香腸可以選擇，原產地注明豬肉係來自台灣，而豬腸衣就係來自法國。店內有經典香腸堡，包括香草墨魚香腸堡、原味飛魚卵香腸堡、巨無霸窮香腸堡，每份TWD100，而巨無霸香腸刘包只係TWD95。

「黑橋牌」香腸口味本來就不少，糯米腸每支TWD35、珍珠香腸每支TWD45，每3支TWD130；香腸原味就賣TWD65，墨魚香腸、原味飛魚卵香腸則為TWD45，部份香腸可以優惠價配搭2至3支。不過，當日飛魚卵香腸暫停供應，所以只係揀咗原味同墨魚味。「黑橋牌」嘅香腸向來都係台灣正宗香腸之一，唔似中式臘腸咁鹹同乾身，香腸有豬肉香，而且充滿肉汁，一咬入口有肉汁溢出，層次豐富。

手信店亦有好多「黑橋牌」主題香腸手信，大多數同平常「家樂福」等超市、便利店見到嘅差唔多﹐可以送禮，亦可以自用，不過就略嫌九成都無乜特別。而當中包裝最特別嘅一款香腸手信，莫過於同「祀典武廟」聯乘嘅「黑橋牌」香腸手信。基本上同一般條裝台式豬肉乾無異，只不過因為同廟宇聯乘，包裝設計唔一樣，每包TWD85，分為黃色、紅色、藍色，而且入面亦只係得3條肉乾！眾所週知，入廟宇拜神係需要3支香，估計因為呢個緣固，所以包裝內亦只有3條肉乾，概念上的確有意思，但就真係略嫌唔夠喉啦！