台灣過江龍No.1一人燒肉！燒肉smile旺角直營店全新餐牌取消放題、人均低至$68？

於香港營業嘅連鎖店，有好多都係特許經營模式，想要拍拖兩個人找尋直營店，真係要細心啲先得。今令E.A.Two去搵一人燒肉店，發現有2間頗受歡迎嘅名店，一間係「燒肉Like」，另一間係「燒肉Smile」，唔少人都會將2間比較，到底邊間先係值得大家去嘅燒肉餐廳呢？

「燒肉Like」雖然係日本連鎖燒肉店，主打一人燒肉體驗，但香港店其實係來自於香港美心餘團品牌旗下，係特許經營模式營運。而「燒肉Smile」就係來自於台灣築間集團直接經營嘅海外分店。我哋只係鍾意選擇由台灣直營嘅「燒肉Smile」，另一間就無意欲去食啦。網上見到「燒肉Smile」嘅餐牌都係半自助模式，或者係一啲價錢比較高嘅燒肉Set，但原來最近餐牌已經轉咗，同本來嘅餐牌大有分別。全新餐牌變成比較平民嘅選擇，價格都係百零蚊，最平只係$68，CP值好似更高！

於台灣，「燒肉Smile」係No.1嘅一人燒肉店，2020年起於台中開設不久，已大受在地人歡迎，擁有220萬會員，轉瞬於台北、台中、台南都有分店，2022年更獲得網絡人氣第1名單人燒肉品牌﹐翌年銷售額更有超過7億台幣。而香港首間分店就選址旺角鬧市，正對朗豪坊。事實上，該品牌餐廳不少，包括有「築間幸福鍋物」、「築間台灣鹹酥雞」、「築間酸菜魚」、「燒肉Smile」、「有之和牛鍋物放題」、「本格和牛燒肉放題」、「築間燒肉本命」、「絵馬別邸」、「紫木槿」、「朴庶韓國美食公社」、「築間麻辣火鍋」等。該品牌一早就將旗下其他餐廳進駐香港，同樣選址旺角，包括「築間酸菜魚」、「築間幸福鍋物」，「燒肉Smile」就係該品牌喺同一個商場內登陸香港嘅第3間舖，被指將呢處打造成「築間一條街」。

該店貫徹以一人燒肉為主，來自於日式燒肉風格。現時，店內最少都係雙拼套餐，最平只係$68，有100g嘅牛五花、現流冷藏雞腿，有配菜、米飯、湯，200g肉都係$98。套餐有唔同配搭，來來去去都係豬牛雞，價格介乎於$68至$128。基本上，肉類同之前餐牌無乜太大分別，選擇包括美國熟成牛花腩、美國板腱牛、豚五花腩、自然豚梅花、冷藏雞腿肉、鮮魷魚、鱸魚菲力、精選鮮蝦，肉類份量唔算少。

餐牌內主要有3個set，海陸牛特盛$138 包含板腱牛排、牛五花、現流冷藏雞腿、鮮蝦、鮮魷魚、鮮味鱸魚；Smile盛合$138 就包含牛五花、牛橫隔膜、豚五花、鮮蝦、鮮魷魚、鮮味鱸魚；海陸豚特盛$128 則包含豚五花、厚切梅花豚排、鮮味鱸魚、鮮蝦、鮮魷魚、現流冷藏雞腿。另外，既有牛肉盛位$138、豚肉盛合$128，前者有牛五花、板腱牛排、牛橫隔膜、蔥鹽牛舌，後者就有豚五花、厚切豚五花、松阪豚、豚老饕，亦有燒鳥組合$98，包含現流冷藏雞腿、雞松阪、雞軟骨。

一人套餐本身附有韓式泡菜、椒鹽聯蔥、越光米飯，重有一碗湯，可以自選雪濃牛骨湯或濟州海帶豆腐湯。此外，逢$98套餐可免費換成牛筋飯或蔥油拌飯，逢$128則可免費換成蔥花蘭王玉子飯。所謂蔥花蘭王玉子飯，其實就係蔥花加溫泉蛋飯，無乜特別。反而牛骨湯幾香濃，入口有牛味，湯汁鹹中有甜，頗為順口。套餐加$10可以加點一款甜點，不過就無乜特別，入面有少少似豆花溝椰果再加冰，其實都無乜特別，只係食完燒肉個口比較鹹，可以有返啲甜味。而各款飲品加$10至$17就有，不過亦無乜特別。

肉類可以自選唔同配料，例如係和風醬燒、日式麻油椒鹽等，醬料唔算太多，只係點到即止嘅味道，現切肉片以日式燒肉方式光製，鹹香質肉香夾雜，肉質其實唔差，只要牛肉唔好燒太耐。爐火頗猛，肉片燒一陣就已經熟，想慢慢食就要校細小小個火。如果於openrice訂位，每檯會額外多送一碟牛肉片，不過油花就當然無本身套餐咁靚。