【台南住宿】台南郡象商旅近市中心、24小時點心吧、自助早餐！房間浴室有咩問題？

台南市區有好多間住宿飯店，本來E.A.Two打算入住「康橋商旅」，惟該日子剛好無房間提供，所以改為入住同樣位於市區內嘅「郡象商旅」。該飯店最大優點都係地理位置，因為靠近市區知名景點，拍拖兩個人入住都算方便。飯店內有提供24小時點心吧、自助早餐，但浴室有一個問題，到底係咩呢？

「郡象商旅」座落台南市中心一帶，距離知名地標「河樂廣場」、「海安路藝術街」僅有350米，來往「神農街」、「永樂市場」亦只需要約10分鐘步程，即使唔自駕、唔搭車，都可以徒步至市區景點，而「臺南市美術館」、「台南林百貨」亦喺咫尺之間。

該飯店於2017年先正式開業，其實至今只係一間2星飯店，整座飯店只係得一部電梯，不過每次都唔係等好耐。登記入住時，每間房只有1張房卡，房間內只有2支免費水同茶包。房間地方唔算好細，但亦唔大﹐但感覺係比較舊式風格，整體感覺好似啲泰國猛鬼酒店。至於大床，整體感覺係偏硬，但枕頭就係偏軟，個人覺得瞓覺唔係太舒服。

每次入住房間，都會打開晒所有櫃桶睇有無奇怪嘢，今次見到房間櫃桶內有支電筒，大概係方便地震等災難嘅時候使用。另外，房間重有一本聖經，而到底點解飯店房間會有聖經呢？部份飯店有可能係同宗教信仰有關，只係一本宗教刊物，給予客人閱讀。如果相信鬼神之說，見到房間有聖經，記得唔好隨手去接觸或揭頁，當無見過就得；唔信嘅話，亦唔需要特別去理會。事實上，好多人眼中，聖經通常有鎮邪作用，換言之若嗰個地方曾經有鬼怪出現，就會擺放一本聖經，信不信由你。

基本上，飯店設施並唔多，除咗免費洗衣房、免費停車場，就只係得地下一隅嘅餐廳，每朝有免費自助早餐，如果要素食可以特別指明。早餐提供時間為07:00至09:00，入座需要出示早餐券。早餐選擇唔算好多，無乜太大特別，有中式蔬菜、西式麵包、美式炸物、馬卡龍、水果，較特別嘅係迷你肉蛋漢堡包，以及自製古早味台南擔仔麵。入住食早餐可以自已整碗擔仔麵，包括淥麵同加肉燥等配料。

而同一個area內，有24小時自助點心吧，隨時有汽水、果汁、咖啡、茶等飲料，亦有窩夫、糖果小吃，但選擇好少﹐夜晚時間就有任食台灣雪糕。不過，雪糕只限樓下餐廳食用，唔可以拎返上房間。

浴室並無提供任何盥洗用品，需要自行準備，或者到櫃檯另外購買，比如每支牙刷TWD30，每把梳TWD20，但就有提供沐浴露同洗頭水。台灣好多飯店都已經唔會提供即棄用品，呢個其實唔係咩問題。拖鞋係兩對膠拖鞋，但拎出嚟好似幾污糟咁，似好多人著過。浴室最騎呢嘅地方，莫過於廁紙，第一次見到廁所嘅廁紙唔係一卷卷，反而係一包包薄面紙，就似餐檯上面嗰啲薄紙巾。如果去廁所要用紙巾，需要疊起至少十幾張先夠厚。