【台南夜市】大大武花大花花！武聖夜市7間美食推薦﹕鹽封台灣鯛／豆乳雞／茶葉煲紅茶！每星期開3日、營業至凌晨、歷史最悠久！

台南夜市選擇不少，在地有一句說話概括夜市每星期嘅營業時間，為「大大武花大花花」，大多數台南夜市都只有3至4日營業，其中「武聖夜市」就係入面嘅「武」，每星期僅營業3日。想要拍拖兩個人去台南「武聖夜市」，就要留意營業時間，即睇呢個夜市7大小吃推薦！

「武聖夜市」位處武聖路，地方頗大，入面有超過250個攤檔﹐係台南人嘅在地夜市之一。呢個夜市於台南歷史最悠久，由1984年至今已有逾40年經驗，更有個可容納大量機車嘅停車場。夜市每星期僅有3日營業，由傍晚營業至凌晨，就算宵夜時份都有嘢食！台南人有一句口訣「大大武花大武花」，意思就係記住夜市每個禮拜嘅營業日子，當中嘅「武」指嘅就係「武聖夜市」，而其餘6個字分別指「花園夜市」、「大東夜市」等。

武聖夜市美食（1）﹕林家豆乳雞翅

「武聖夜市」內選擇不少，其中有「林家豆乳雞翅」，位於夜市外圍一帶，非常容易見到。豆乳雞TWD50至100、豆乳雞翅TWD25，一隻雞翼極相宜！人流唔算太多，但都要排吓隊，不時都有人到攤位前購買，油鍋頗乾淨，唔會炸到又黑又焦。

武聖夜市美食（2）﹕膳品香酥排骨

夜市內有間「膳品香酥排骨」，一份咔滋肉條TWD100至200，聞落頗香口，幾有酥香感，不時有在地人到小攤購買。呢間小吃於「新永華夜市」、「小北成功夜市」都有得食。

武聖夜市美食（3）﹕中藥口味沙威碼

另外，夜市有間「中藥口味沙威碼」，鄰近停車場，由未開店到開店之後都有在地人大排長龍，每份只係TWD50，好似肉片嚟，然後擺入烤過嘅麵包內，再加入生菜、沙律醬等，係中東土耳其口味嘅小吃。同「阿佳佳純手工蔥油餅」TWD50一份嘅價錢差唔多，都係人氣小吃。

武聖夜市美食（4）﹕孫媽十元打香腸

「武聖夜市」琳瑯滿目，內裏唔單止有小吃、彈珠台、射飛鏢、套圈圈等基本夜市攤檔，當中「孫媽十元打香腸」配搭古早味彈珠台，玩完彈珠嬴咗就有條香腸。其餘小吃有吃法新穎嘅「海苔甜玉米」，顏色鮮艷奪目嘅「一心水果球」TWD150至200，又或者「董家麻糬冰燒麻糬」，一份麻糬TWD55。

武聖夜市美食（5）﹕杏仁茶

食得太多小吃，必然係想飲返杯嘢飲，「杏仁茶」就係頗受台南人歡迎嘅飲品，每杯TWD40至65，以古早味製作，健康養生之餘，亦有養顏美容作用，聽聞有部份在地人鍾意配搭油條飲用。而「五番茶s tea」由2000年起開始售賣，內有三薰綠茶、阿薩姆紅茶、四季春青茶、鹿谷烏龍、桂花烏龍，每杯TWD20至30，當日睇住該店用茶葉煲出嚟，有兩壺紅茶剛煲好。

武聖夜市美食（6）﹕戲漁蒸鮮烤魚

燒烤往往係夜市必食之選擇，當中都有好多間以燒烤為主打，比如「醬燒雞排炭烤」，一份TWD90，有日式醬燒、蜂蜜芥末、泰式酸辣﹐「花園夜市」、「大東東夜市」都有得食。又例如「炭烤香魚」，寫明香魚世家，一份TWD100至150，每條都係原條烤，分埋公魚同母魚，母魚貴啲。

今次E.A.Two就被「戲漁蒸鮮烤魚」吸引，一份鹽封台灣鯛TWD250，為原條製作，寫明新鮮海物專賣。不過，點餐後要等半小時，記得拎號碼牌，確認時間到時返轉頭食就得。只需要keep好號碼牌，唔使怕過號，因為認牌唔認人，以牌換魚。

果然係鹽封台灣鯛，處理好鯛魚後，只係抹鹽調味，原條魚旁邊亦滿佈淮鹽同海量海鹽，重有青檸、蔥絲畀人辟腥味，鯛魚無腥味，魚質嫩滑肥美，有香烤味道，但又唔會被鹽醃得太鹹，有鮮味，又非常香口。

武聖夜市美食（7）﹕陳家阿嬤拔絲地瓜

講到排隊店，不得不提「陳家阿嬤拔絲地瓜」，門口旁邊直頭拉晒幾行畀人排隊。本來見到太多人打算一陣再食，不過當日返轉頭發現該店賣晒收工，未能一試，最終到其他夜市先食到。故此，強烈建議排咗先算、食咗自算！該店係拔絲薯條、QQ球創始店，有拔絲地瓜、芋頭、薯條、QQ球選擇，每份TWD50至100，分別可以揀12顆、24顆同款，或者兩種、三種、四種mix埋綜合口味，有唔同數量。而新年期間另有拔絲湯圓TWD50至100，平時就無得賣。拔絲地瓜其實就係蕃薯外面以薄脆糖衣包裹住，就似麥芽糖，令整體更有香甜味。